એવું તો શું થયું કે મોહમ્મદ શમીની પત્નીની પોલીસે કરવી પડી ધરપકડ?

ઘરમાં ઘૂસીને કર્યો હંગામો

લખનઉઃ ભારતીય ક્રિકેટ ટીમના ઝડપી બોલર મોહમ્મદ શમીની પત્ની હસીન જહાંની પોતાના પતિના ઘરમાં ઘૂસીને હંગામો કરવાના આરોપસર પોલીસે ધરપકડ કરી હતી. જોકે, પછી જામીન પર તેને છોડી મૂકાઈ હતી. હસીન જહાં રવિવારે મોડી રાતે ઉત્તર પ્રદેશના અમરોહા જિલ્લાના સહસપુર ગામમાં પોતાના પતિ શમીના ઘરે પહોંચી હતી. જ્યારે તેને ઘરની બહાર જવાનું કહેવામાં આવ્યું ત્યારે તેણે પોતાને અને બાળકને એક રુમમાં બંધ કરી દીધાં હતાં.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

સર્જાયો હાઈ વોલ્ટેજ ડ્રામા

ભારતીય ક્રિકેટ ટીમના બોલર મોહમ્મદ શમીની પત્ની હસીન જહાં મોડી રાતે અમરોહામાં તેના ઘર પર પહોંચી હતી. જ્યાં તેણે હાઈ વોલ્ટેડ ડ્રામા કર્યો હતો. કાલે સાંજે તે દીકરી બેબો અને આયા સાથે સાસરીયામાં પહોંચી હતી અને હસીન જહાએ ઘરના એક રુમમાં પોતાને અને દીકરીને બંધ કરી હતી. જે પછીથી સમગ્ર મામલે હાઈ વોલ્ટેજ ડ્રામા સર્જાયો હતો અને પોલીસે હસીન જહાંની અટકાયત કરી હતી.

બન્ને વચ્ચે સમાધાનમાં નિષ્ફળ રહી પોલીસ

જે પછી પોલીસ શમીના ઘરે પહોંચી હતી. પોલીસ જ્યારે બન્ને વચ્ચે સમાધાન કરાવવામાં નિષ્ફળ રહી ત્યારે પોલીસે હસીન જહાંની અટકાયત કરી હતી. જોકે, પછી તેને જામીન પર છોડી મૂકાઈ હતી. હસીને મીડિયાને કહ્યું કે,’હું અહીં મારા પતિના ઘરે આવી છું અને મને અહીં રોકાવાનો હક છે. મારા સાસરીયાઓ મારી સાથે ખરાબ વર્તન કરી રહ્યાં છે. પોલીસ તેમનું જ સમર્થન કરી રહી છે. પોલીસે તેમની ધરપકડ કરવી જોઈએ તેના બદલે મને પોલીસ સ્ટેશન લઈ જઈ રહ્યાં છે.’

પોલીસ પર લગાવ્યા આરોપ

હસીન જહાંએ કહ્યું કે,’મોહમ્મદ શમીની લાગવગ અને રુપિયાના કારણે ઉત્તર પ્રદેશ પોલીસ તેને પરેશાન કરી રહી છે.’ આ દરમિયાન મીડિયાની મદદ માગતા હસીન જહાંએ કહ્યું કે,’શા માટે યોગી આદિત્યનાથ સરકાર આ મામલાને નથી જોતી? બેટી બચાઓ, બેટી પઢાઓ, હું પણ એક દીકરી છું. કઈ રીતે મારી સાથે વ્યવહાર કરવામાં આવી રહ્યો છે. રાતે બાર વાગ્યે મને મારી પથારીમાંથી ધક્કા મારીને લાવવામાં આવી. મારા હાથમાંથી ફોન છીનવી લેવાયો. હું મદદ માગવા કોની પાસે જઉં. હું હકની લડાઈ લડું છું અને પોલીસ મને પરેશાન કરી રહી છે.’

પતિ સાથે ચાલી રહ્યો છે વિવાદ

ઝડપી બોલર શમી હાલ આઈપીએલ-12માં કિંગ્સ ઈલેવન પંજાબની ટીમ તરફથી રમી રહ્યો છે. 27 વર્ષના શમી પર તેની પત્નીએ આ પહેલા પણ ઘણાં ગંભીર આરોપો લગાવ્યા હતાં. હસીને શમી પર ડોમેસ્ટિક વાયોલન્સ, લગ્ન પછી અફેરથી લઈને મેચ ફિક્સિંગ સુધીના આરોપ લગાવ્યા હતાં. હસીને એ પણ કહ્યું હતું કે શમીના એક પાકિસ્તાની યુવતી સાથેના સંબંધ છે. જે તેને રુપિયા આપે છે. આ મામલે હાલ તપાસ ચાલી રહી છે. જોકે, મેચ ફિક્સિંગના આરોપમાં BCCIએ શમીને નિર્દોષ જાહેર કર્યો હતો.

from Lifestyle Tips in Gujarati, જીવનશૈલી ટીપ્સ, Daily Lifestyle Tips – Page Array – I Am Gujarat http://bit.ly/2ZGkpyh