મુંબઈ:રિલાયન્સ ઇન્ડસ્ટ્રીઝ બ્રિટિશ ટોય સ્ટોર ચેઇન હેમ્લીઝને હસ્તગત કરવા વાટાઘાટ કરી રહી છે. બિઝનેસ ન્યૂઝવેબસાઇટ મનીકંટ્રોલે બુધવારે સૂત્રોને ટાંકી આ માહિતી આપી હતી. રિલાયન્સ જૂથ કન્ઝ્યુ સેગમેન્ટમાં વિસ્તરણ માટે સક્રિય છે. જેના ભાગરૂપે રિલાયન્સ રિટેલ સોદા માટે આક્રમક છે.
વેબસાઇટના જણાવ્યા અનુસાર હેમ્લીઝના સોદા માટે ડ્યૂ ડિલિજન્સ નિર્ણાયક તબક્કામાં છે અને સોદો સફળ રહેશે તો રિલાયન્સ રિટેલ 259 વર્ષ જૂની ટોય ઉત્પાદક હેમ્લીઝને ભારતમાં લાવશે. જેનું આગામી ત્રણ વર્ષમાં લગભગ 200 સ્ટોર્સમાં વેચાણ કરાશે, જે આંકડો હાલ 50ની આસપાસ છે. જોકે, રિલાયન્સે આ બાબતે કંઈ કહેવાનો ઇનકાર કર્યો હતો. રિલાયન્સના પ્રવક્તાએ જણાવ્યું હતું કે, “પોલિસી તરીકે અમે મીડિયાની અટકળો અને અફવા અંગે નિવેદન કરતા નથી. કંપની સતત વિવિધ તકોનું મૂલ્યાંકન કરતી રહે છે.”
ઉલ્લેખનીય છે કે, રિલાયન્સ રિટેલ પાસે ભારતમાં હેમ્લીઝની પ્રોડક્ટ્સ વેચવાનો હક છે. સ્કાય ન્યૂઝે ઓક્ટોબરમાં જણાવ્યું હતું કે, ચીનની ફેશન રિટેલર સી બેનર ઇન્ટરનેશનલ હોલ્ડિંગ્સ ભારે ખોટ પછી હેમ્લીઝને વેચવાનું વિચારી રહી છે. સી બેનર હોંગકોંગના શેરબજાર પર લિસ્ટેડ છે. ચીનની કંપનીએ 2015માં હેમ્લીઝને 10 કરોડ પાઉન્ડ (13.06 કરોડ ડોલર)માં હસ્તગત કરી હતી. હેમ્લીઝની સ્થાપના 1760ની સાલમાં કરવામાં આવી હતી.
રિલાયન્સ ઇન્ડસ્ટ્રીઝે છેલ્લાં કેટલાંક વર્ષમાં રિફાઇનિંગ અને પેટ્રોકેમિકલ્સના કોર બિઝનેસ સિવાય અન્ય સેક્ટર્સમાં પણ વિસ્તરણ કર્યું છે. ટેલિકોમ અને રિટેલ સેક્ટરમાં તે મજબૂત હરીફ તરીકે ઊપસી છે. ઓક્ટોબર-ડિસેમ્બર ક્વાર્ટરમાં રિલાયન્સ રિટેલે કરવેરા અગાઉ બમણી વૃદ્ધિ સાથે ₹1,680 કરોડનો નફો કર્યો હતો. ટેલિકોમ સેક્ટરમાં રિલાયન્સ જિયોએ પ્રોત્સાહક કામગીરી દર્શાવી છે. ઉપરાંત, કંપની હવે બ્રોડબેન્ડ નેટવર્કના વિસ્તરણ માટે આક્રમક બની છે. રિલાયન્સ આગામી સમયમાં ઇન્ડસ્ટ્રીઝ ઇ-કોમર્સ ક્ષેત્રે પ્રવેશવાની યોજના ધરાવે છે. તે એમેઝોન અને વોલમાર્ટની માલિકીની ફ્લિપકાર્ટને પહોંચી વળવા નાના રિટેલર્સ માટે ઓનલાઇન શોપિંગ પ્લેટફોર્મ લોન્ચ કરવાનો ઇરાદો ધરાવે છે.
from I Am Gujarat http://bit.ly/2vckn2U
No comments:
Post a Comment