ઉમા શશિકાંત
માર્ચ એ નાણાકીય રીતે મહત્ત્વનો મહિનો છે. આપણે આખા વર્ષનાં ટ્રાન્ઝેક્શન આ મહિનામાં પૂરાં કરવા માટે પ્રયાસ કરીએ છીએ અને ટેક્સ રિટર્ન ફાઇલ કરવા માટેનાં કાગળિયાં તૈયાર કરીએ છીએ. કેટલાક નિર્ણયો બદલ આપને અફસોસ થાય છે અને કેટલાક નિર્ણયોના કારણે આનંદ મળે છે. આગામી વર્ષમાં વધુ સારો દેખાવ કરીશું તેવી આશા સાથે ચાલુ વર્ષ પૂરું થાય છે. એપ્રિલથી નવું નાણાકીય વર્ષ શરૂ થાય તે માટેનાં કેટલાંક રિમાઇન્ડર અહીં આપ્યાં છે.
પ્રથમ, તમે રોકાણ માટે સારી તકની શોધમાં હોવ તે દરમિયાન તમારાં નાણાંને નિષ્ક્રિય રહેવા ન દો. આપણે રોકાણને કાળજીપૂર્વકની ચોઇસ સાથે સાંકળીએ છીએ. આખા વર્ષમાં તમારે એવી કેટલીક પસંદગી કરવાની છે જેથી તમને યોગ્ય વળતર મળે અને તેનો અમલીકરણ પણ સરળ હોવો જરૂરી છે.
તમારે એક ડિફોલ્ટ પ્લાન તૈયાર રાખવો જોઈએ. તે તમારી પસંદગીનો ઇન્ડેક્સ પણ હોઈ શકે. અથવા તમે ટ્રેક કરતા હોવ તેવાં કેટલાંક ફંડનો સમાવેશ કરી શકાય. તમે અમુક સ્ટોક પણ ખરીદી શકો જેના પર ઘણા સમયથી તમારી નજર હોય. તમારા બેન્ક એકાઉન્ટમાંથી તે નાણાં ઉપાડીને આ ચીજોમાં રોકાણ કરો.
બીજું, રોકાણ કર્યા પછી તેની સાથે સતત ચેડાં ન કરો. આપણે માનીએ છીએ કે રોકાણ એટલે સતત મોનિટરિંગ કરવું, સતત ખરીદી અને વેચાણ કરવું અથવા ખરાબ સમય આવે તે પહેલાં રોકાણ ઉપાડી લેવું. આ ખોટી માન્યતા છે. એકસાથે એટલી બધી ચીજો માટે આયોજન ન કરો જેથી તેનો અમલીકરણ મુશ્કેલ બની જાય. તમારી રોકાણની સ્ટ્રેટેજીને શક્ય એટલી સરળ બનાવો.
ત્રીજું, પોર્ટફોલિયોની વાર્ષિક સમીક્ષા કરવી જરૂરી છે. કઈ ચીજ કામ કરે છે અને કઈ ચીજ કામ નથી કરતી તે નક્કી કરવા માટે સમય ફાળવો. પોર્ટફોલિયો જેમ હોય તેમ જ રહેવા દેવો એ સ્ટ્રેટેજી નથી પણ આળસ છે. તેથી વર્ષમાં કમ સે કમ એક વખત તમારી તમામ એસેટનું વર્તમાન મૂલ્ય લખો અને તેની સમીક્ષા કરો. તમારી પાસે શું છે, તેની વેલ્યૂમાં કેવો ફેરફાર થયો છે અને તે કયા પ્રમાણમાં છે તે જુઓ. આ સમરી પર નજર નાખવાથી તમને લાંબા ગાળાના લક્ષ્ય સિદ્ધ કરવા માટે શું કરવું તેનો અંદાજ મળશે.
ચોથું, તમારાથી કોઈ ભૂલ થાય તો તેને સ્વીકારવા તૈયાર રહો. કોઈ પ્રોડક્ટ જ્યારે અત્યંત સારો દેખાવ કરતી હોય ત્યારે આપણે એટલા ઉત્સાહમાં આવી જઈએ છીએ કે તેને વેચીને નફો બૂક કરીએ છીએ.
જો કોઈ પ્રોડક્ટનો દેખાવ સારો ન હોય તો આપણે તેને યથાવત્ રહેવા દઈએ છીએ. ખોટ કરતું રોકાણ સામાન્ય રીતે લાંબા ગાળાનું રોકાણ બની જાય છે. તેના કારણે તમારાં નાણાંને કેવી અસર થાય છે તેનો વિચાર કરો. આપણે નફો કાપીએ છીએ, ખોટ જાળવી રાખીએ છીએ જે યોગ્ય સ્ટ્રેટેજી નથી. દરેક રોકાણ હંમેશા સારો દેખાવ કરે તે જરૂરી નથી. તેના કારણે જ પોર્ટફોલિયોમાં ડાઇવર્સિફિકેશનનું મહત્ત્વ છે. આપણે સમગ્ર પોર્ટફોલિયો પર ધ્યાન કેન્દ્રિત કરવું જોઈએ. થોડો સમય આપીને કઈ ચીજ યોગ્ય પ્રદર્શન કરતી નથી તેનું મૂલ્યાંકન કરો અને તેને પોર્ટફોલિયોમાંથી દૂર કરો.
પાંચમું, વાર્ષિક લિક્વિડિટી પ્લાનનો વિચાર કરો. શું તમારે કોઈ મોટો ખર્ચ કરવાનો છે? જેમ કે ઘરનું રિનોવેશન કરવાનું હોય અથવા બાળકોને શાળામાં મોકલવાનાં હોય? તમારી પાસે માસિક રોકાણપાત્ર સરપ્લસ છે કે કેમ? તમે બેઝિક અને રૂટિન ખર્ચને કવર કરી શકો તેમ છો? આપણામાંથી મોટા ભાગના લોકો રેગ્યુલર આવક પ્રમાણે લાઇફ સ્ટાઇલને સેટ કરે છે અને થોડા સમયે થોડી સરપ્લસ પણ બચાવે છે.
આપણે તે સરપ્લસને રોકાણ કરવાની આદત પાડીએ તો મોટા ખર્ચને પણ નિયંત્રણમાં લઈ શકાય છે. મોટા ખર્ચને પહોંચી વળવા માટે ઇક્વિટી ઇન્વેસ્ટમેન્ટ વેચી નાખીશું તેમ માનીને ન ચાલો. કારણ કે બજારમાં ઇન્વેસ્ટમેન્ટનું મૂલ્ય ગમે ત્યારે ઘટી જતું હોય છે. તમારાં નાણાંને લો-રિસ્ક ઇન્વેસ્ટમેન્ટ જેમ કે બેન્ક એફડી અને શોર્ટ ટર્મ ડેટ તથા લિક્વિડ ફંડમાં ખસેડો અને આવી જરૂરિયાતને તેની મદદથી પહોંચી વળો.
છઠ્ઠું, ક્રેડિટ કાર્ડના ખર્ચની સમીક્ષા કરો. આપણામાંથી મોટા ભાગના લોકો ક્રેડિટ કાર્ડના બિલને સમયસર ચૂકવી દે છે પરંતુ તેના વિશે આગળનો વિચાર કરતા નથી. આપણે ક્રેડિટ કાર્ડ દ્વારા કયો ખર્ચ કરીએ છીએ અને તેમાંથી કેટલો ખર્ચ આવશ્યક છે તથા કયો ખર્ચ ટાળી શકાય તેમ છે તે વિચારો. મોજશોખ માટે નાણાં ખર્ચ કરતા રહેવાથી તેની આદત પડી જાય છે અને તે અંકુશ બહાર જાય છે.
from Page Array – I Am Gujarat http://bit.ly/2P9ZQFB
No comments:
Post a Comment