રામ સેહગલ
મુંબઈ:સોમવાર સુધીના 11 ટ્રેડિંગ સત્રમાં ટાટા મોટર્સના શેરમાં 33 ટકાનો ઊછાળો આવ્યો છે ત્યારે દલાલ સ્ટ્રીટમાં સવાલ ફરતો થયો છે કે, આ કાઉન્ટરમાં હજુ પણ રેલી માટે અવકાશ છે? આનો જવાબ ડેરિવેટિવ્સ ડેટામાં છુપાયેલો છે, જે સંકેત આપે છે કે, 25 એપ્રિલે ડેરિવેટિવ્સ એક્સ્પાયરી થાય ત્યાં સુધી ટાટા મોટર્સના શેરમાં 8 ટકા વૃદ્ધિની સંભાવના છે.
સોમવારે મંદીવાળા ઊંઘતા ઝડપાયા હતા અને તેમની શોર્ટ પોઝિશન કવર કરવા દોડતા થઈ ગયા હતા, જેના કારણે 5.7 કરોડ શેર્સના જંગી વોલ્યૂમની વચ્ચે ટાટા મોટર્સનો શેર સોમવારે 7.4 ટકા વધીને ₹232એ બંધ રહ્યો હતો. ઉપરાંત, ડેટા દર્શાવે છે કે, પુટ વેચવાવાળા મારફતે નવી લોંગ પોઝિશન લેવાઈ હતી. વાયદાના કોન્ટ્રાક્ટમાં છેલ્લી કલાકમાં લોંગ પોઝિશન લેવાઈ હતી કારણ કે, ટ્રેડર્સ નફો બૂક કરવા માટે અધીરા બન્યા હતા.
અત્યારે ટાટા મોટર્સના શેરમાં મજબૂત પ્રતિકારક સપાટી (₹230) છે અને જો તે તૂટશે તો પ્રારંભમાં ભાવ 3.4 ટકા વધીને ₹240 થશે, જે એક્સ્પાયરી સુધીમાં મજબૂત પ્રતિકારક સપાટી છે.
જો તેનો શેર ચાલુ સપ્તાહે (બે રજા હોવાથી ચાલુ સપ્તાહ ટૂંકું છે) આ લેવલ ટેસ્ટ કરશે તો મંદીવાળાને તેમની પોઝિશન કવર કરવાની ફરજ પડી શકે છે અને પરિણામે, ₹250ના લેવલે એક્સ્પાયરી આવવાનો માર્ગ મોકળો થશે એમ મોતીલાલ ઓસવાલ સિક્યોરિટીઝના ડેરિવેટિવ્સ એનાલિસ્ટ ચંદન તાપરિયાએ કહ્યું હતું.
સોમવારે એક મહત્ત્વનો ફેરફાર સામે આવ્યો હતો: તેનો ઓપન ઈન્ટરેસ્ટ પુટ-કોલ-રેશિયો (PCR) 1.23એ પહોંચ્યો હતો, જે શુક્રવારે 0.87 હતો. જે ટ્રેડર્સના ઈન્ટરેસ્ટમાં નિર્ણયાત્મક ફેરફાર થયો હોવાના સંકેત આપે છે, એટલે કે, તેમણે સોમવારે આ સ્ટોકના કોલ કરતાં વધારે પુટ વેચ્યા હતા.
“આ તમામ સંકેતો વર્તમાન રેલી લંબાવાનો ઈશારો કરી રહ્યાં છે. વર્તમાન સંજોગો દર્શાવે છે કે, તેજીવાળા વધુ પુટ વેચવા તૈયાર છે” એમ એક્સિસ સિક્યોરિટીઝના ડેરિવેટિવ્સ હેડ રાજેશ પાલવિયાએ સમજાવ્યું હતું.
25 એપ્રિલે એક્સ્પાયર થનારી ₹210, ₹220, ₹225 અને ₹230ના સ્ટ્રાઈકમાં મહત્તમ પુટ પોઝિશન જોવા મળી હતી, જેથી PCR વધ્યો હતો, જે તેજીના સંકેત આપે છે. ₹220ની સ્ટ્રાઈકમાં જંગી કોલ પોઝિશન માંડવાળ થઈ હતી અને ₹230ની સ્ટ્રાઈકમાં પણ આવી થોડીક સ્થિતિ જોવા મળી હતી. આઉટસ્ટેન્ડિંગ પોઝિશન્સનો મહત્તમ ઉમેરો ₹250ના કોલમાં જોવા મળ્યો હતો.
from Page Array – I Am Gujarat http://bit.ly/2v9M78g
No comments:
Post a Comment