સેમ કરનનો તરખાટ, પંજાબ સામે દિલ્હીનો નાટ્યાત્મક પરાજય

કરનનો તરખાટ, દિલ્હીનો નાટ્યાત્મક ધબડકો

IPL2019માં સોમવારે રમાયેલી લીગની 13મી મેચમાં કિંગ્સ ઈલેવન પંજાબે દિલ્હી કેપિટલ્સને 14 રને હાર આપી. આ પંજાબનો લીગમાં ત્રીજો વિજય છે. પંજાબના 167 રનના ટાર્ગેટ સામે દિલ્હી 152 રનમાં ઓલઆઉટ થઈ હતી. એક સમયે દિલ્હીનો સ્કોર બે વિકેટે 144 રન હતો જ્યાંથી તે 152 રનમાં ઓલઆઉટ થઈ હતી. પંજાબ માટે સેમ કરને 11 રનમાં ચાર વિકેટ ઝડપી જ્યાકે અશ્વિન અને શમીએ 2-2 વિકેટ લીધી.

પત્તાના મહેલની જેમ વિખેરાઈ ગઈ દિલ્હી

અગાઉ 167 રનના સ્કોરનો પીછો કરવા ઉતરેલી દિલ્હીની શરૂઆત ખૂબ ખરાબ રહી અને ગત મેચનો હીરો પૃથ્વી શૉ પહેલા બોલે જ આઉટ થઈ ગયો. બાદમાં શિખર ધવન(30), શ્રેયસ ઐયર (28), રિષભ પંત(39) અને કૉલિન ઈન્ગ્રામ (38)એ ઉપયોગી ઈનિંગ્સ રમી હતી. એક સમયે દિલ્હી આસાનીથી મેચ જીતી જાય તેમ લાગતું હતું પણ 144 રનના સ્કોરે પંતની વિકેટ પડ્યા બાદ દિલ્હીનો અણધાર્યો રકાસ શરૂ થયો અને જોતજોતામાં ટીમ 152 રનના સ્કોર પર ઓલઆઉટ થઈ ગઈ.

પંજાબે બનાવ્યા 9 વિકેેટે 166 રન

અગાઉ દિલ્હીએ ટૉસ જીતીને પંજાબને બેટિંગ આપી હતી. પંજાબ તરફથી ડેવિડ મિલરે 43 અને સરફરાઝ ખાને 39 રનનું યોગદાન આપ્યું હતું અને પંજાબે 20 ઓવરના અંતે 9 વિકેટે 166 રન બનાવ્યા હતા. પંજાબ એક સમયે 180થી ઉપરનો સ્કોર બનાવે તેમ લાગી રહ્યું હતું પણ છેલ્લી પાંચ ઓવરમાં થયેલો રકાસ અને ધીમી રનગતિના કારણે તે 166 સુધી જ પહોંચી શક્યું હતું. દિલ્હી તરફથી ક્રિસ મોરિસે ત્રણ, કગિસો રબાડા અને સંદીપ લાછિમાનેએ 2-2 વિકેટ ઝડપી હતી.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat https://ift.tt/2D02Lfh