લક્ઝરી કાર્સના બદલે રિક્ષા, બસ, ટેક્સીમાં પ્રવાસ કરે છે ઢોલીવુડ સ્ટાર્સ, કારણ જાણી નવાઈ લાગશે

બસ, રિક્ષા, ટેક્સી છે ઢોલીવુડ સ્ટાર્સના ફેવરિટઃ

દીપાલી ચટવાની, અમદાવાદઃ આપણે જ્યારે પણ કોઈ સેલેબ્સની ગ્લેમરસ લાઈફ વિષે વિચારીએ ત્યારે લક્ઝુરિયસ ઘર, ડિઝાઈનર કપડા અને મોંઘીદાટ શૉફર ડ્રિવન કાર્સનો વિચાર આપણને ચોક્કસ આવે. તમે કલ્પના પણ કરી શકો કે આ સેલેબ્સ બસ અને ટ્રેન જેવા પબ્લિક ટ્રાન્સપોર્ટ્સનો ઉપયોગ કરતા હશે? જો કે ઢોલીવુડ સ્ટાર્સની વાત કરીએ તો તેમને પર્સનલ કારને બદલે પબ્લિક ટ્રાન્સપોર્ટનો ઉપયોગ કરવો વધુ ગમે છે. પહેલું કારણ એ છે કે તેને કારણે હરવા-ફરવામાં આસાની પડે છે અને ખાસ ખર્ચો પણ નથી થતો. આ સેલેબ્સ હવે આતુરતાથી મેટ્રોની રાહ જોઈ રહ્યા છે જેથી તેમની લાઈફ આસાન બની જાય. હવે નેક્સ્ટ ટાઈમ તમે બસ કે ટ્રેનમાં જતા હોવ તો ધ્યાનથી આજુબાજુ જોજો, ક્યાંક તમને તમારો ફેવરિટ સ્ટાર ન ભટકાઈ જાય!

હવે એક મેસેજ મોકલી WhatsApp પર મેળવો અમારા ન્યુઝ, Start કરવા અહીં ક્લિક કરો

ભક્તિ કુબાવતઃ

ઝડપથી પહોંચી જવાય, સસ્તુ પડે અને આસાન છે. પબ્લિક ટ્રાન્સપોર્ટમાં આ બધું જ મળી જાય. ભારતમાં હું પબ્લિક ટ્રાન્સપોર્ટ એટલે યુઝ કરુ છું જેથી રસ્તા પર કાર્સ ઓછી થાય અને પ્રદૂષણ ઘટે. કાર પૂલિંગ અને પબ્લિક ટ્રાન્સપોર્ટનો ઉપયોગ જરૂરી છે. હું જ્યારે વિદેશમાં રજા માણતી હોવ ત્યારે હું પબ્લિક ટ્રાન્સપોર્ટ એટલે યુઝ કરુ છું કે ત્યાંનું કલ્ચર માણી શકુ.

રોનક કામદારઃ

અમદાવાદમાં લોકોને પબ્લિક ટ્રાન્સપોર્ટ યુઝ કરવાની આદત નથી. મોટાભાગના અમદાવાદીઓ પોતાનું વાહન યુઝ કરવાનું પસંદ કરે છે. પબ્લિક ટ્રાન્સપોર્ટ વાપરવાથી સમય અને પૈસા બંને બચે છે અને તમે ફિટ પણ રહો છો. તમે નેવિગેશન યુઝ કર્યા વિના ધારેલી જગ્યા પર પહોંચવા માટે રૂટ્સ નક્કી કરો તેની મજા જ કંઈ ઓર છે. હું આજકાલ રિલેક્સ થવા માટે પબ્લિક ટ્રાન્સપોર્ટમાં જાવ છું. અને મને મજા આવે છે કારણ કે મારે ડ્રાઈવ નથી કરવું પડતું

ડિમ્પલ બિસ્કુટવાલાઃ

પબ્લિક ટ્રાન્સપોર્ટે મારી લાઈફ સ્ટ્રેસફ્રી બનાવી દીધી છે. કેબ કે રિક્ષામાં જવાથી ઘણો સમય અને પૈસા બચી જાય છે. તેનાથી તમારી લાઈફ એક્ટિવ બને છે કારણ કે રીક્ષા, બસ કે ટ્રેન પકડવા થોડુ ચાલવું પડે છે. હવે મેટ્રો આવી રહી છે તો હું મેટ્રોમાં પણ પ્રવાસ કરવા માંગીશ. જવાબદાર નાગરિક તરીકે હું રસ્તા પર કારની સંખ્યા ઘટાડી શકું અને પર્યાવરણને વધુ સ્વચ્છ બનાવી શકું.

નીલ ભટ્ટઃ

હું ઘણીવાર પબ્લિક ટ્રાન્સપોર્ટ યુઝ કરુ છું, ખાસ કરીને રીક્ષા. હું મુંબઈમાં રહુ છું અને અહીં ઘણું કન્સ્ટ્રક્શન ચાલે છે. આવા સંજોગોમાં પાર્કિંગ મળવું મુશ્કેલ છે. મારી પાસે SUV છે અને સાંકડા રસ્તા પર તે ચલાવવી શક્ય નથી. આથી હું રીક્ષામાં જાઉં છું. તે મને મારા કૉલેજકાળના દિવસો યાદ કરાવે છે.

વ્યોમા નાંદીઃ

હું ઈન્ડિયામાં ડ્રાઈવ નથી કરી શકતી કારણ કે હું અહીંના ટ્રાફિક રુલ્સથી ટેવાયેલી નથી. આ ઉપરાંત હું ક્યાંક જાઉં તો મારે પાર્કિંગની ચિંતા નથી કરવી પડતી. જો વધુને વધુ લોકો પબ્લિક ટ્રાન્સપોર્ટનો ઉપયોગ કરશે તો રસ્તા પર ભીડ ઘટી જશે.

દીપના પટેલઃ

હું ઘણીવાર મુંબઈમાં મેટ્રો યુઝ કરુ છું કારણ કે તે ટ્રાફિકથી બચાવી લે છે. આ ઘણું આસાન પણ પડે છે. એકથી બીજા શહેરમાં જવા માટે હું ચેરકાર ટ્રેનનો ઉપયોગ કરુ છું. અમદાવાદથી વડોદરા હું આ જ રીતે આવુ છું. હું ડ્રાઈવિંગ અવોઈડ કરીને ટ્રેનમાં જાઉં છું કારણ કે તેની ફ્રિક્વન્સી સારી છે. મને ટ્રેન, બસ કે મેટ્રોમાં ટ્રાવેલ કરતી વખતે વાંચવુ ગમે છે. વળી તેનાથી ઘણા પૈસા પણ બચી જાય છે. તેનાથી વધારે સમયની બચત અને સમયસર ક્યાંક પહોંચવું મહત્વનું છે.

પ્રતીક ગાંધીઃ

મુંબઈમાં એક જગ્યાએથી બીજી જગ્યાએ પહોંચવું મુશ્કેલ છે. મુંબઈમાં ઘણું સારુ પબ્લિક ટ્રાન્સપોર્ટ છે જેથી લોકો અમુક જગ્યાએ સમયથી પહોંચી જાય છે. મુંબઈની લોકલ ટ્રેન ફાસ્ટ છે. ટ્રાફિક, પાર્કિંગની તકલીફ અને પોલ્યુશન જેવા કારણસર હું જાહેરસેવાનો ઉપયોગ કરુ છું.

યશ સોનીઃ

તમે જ્યારે જાહેર સેવાનો ઉપયોગ કરો ત્યારે લાઈફ વધુ આસાન બની જાય છે. તમે ફ્યુઅલ બચાવી શકો અને પ્રદૂષણ પણ ઘટે છે. મારા માટે આ લોકો સાથે જોડાવાનો એક સરસ રસ્તો છે. પબ્લિક ટ્રાન્સપોર્ટમાં તમે અજાણ્યા શખ્સો સાથે ટચમાં આવો છે, વાતચીત કરો છો, તેમનું નીરિક્ષણ કરી શકો છો. આ પર્સનલ કનેક્ટ આજકાલ ગુમ થઈ ગયો છે. પબ્લિક ટ્રાન્સપોર્ટથી તમે શહેર અને શહેરના લોકો સાથે જોડાઈ શકો છો.

મલ્હાર ઠાકરઃ

પબ્લિક ટ્રાન્સપોર્ટ સેફ છે અને હું એટલે એ પસંદ કરુ છું કારણ કે તેમાં તમે ફ્રી રહી શકો છો. હું ડેસ્ટિનેશન પર પહોંચુ ત્યાં સુધીમાં અનેક કૉલ્સ કરી શકું છું, લેટેસ્ટ ન્યઝ વાંચી શકું છું, સોશિયલ મીડિયા અને મેઈલ પર ફેન્સને જવાબ આપી શકું છું. તમે જાતે ડ્રાઈવ કરો ત્યારે આ શક્ય નથી બનતું. આથી મારી કાર ડ્રાઈવ કરવા કરતા મને પબ્લિક ટ્રાન્સપોર્ટ સારુ પડે છે.

from Entertainment News in Gujarati: Latest Entertainment News, Read Breaking Entertainment News – Page Array – I Am Gujarat http://bit.ly/2WbnzI3