સલામ! સરકારની રાહ જોયા વિના અમદાવાદીઓએ જાતે જ ચોખ્ખી કરી દીધી ઉવારસદની વાવ 😮

દીકરીનો બર્થ ડે ઉજવ્યોઃ

પાર્થ શાસ્ત્રી, અમદાવાદઃ છેલ્લા 15 વર્ષથી આખી દુનિયામાંથી અમદાવાદની મુલાકાતે આવનારા પ્રવાસીઓને અમદાવાદના પ્રચલિત હેરિટેજ સ્થળોની મુલાકાત કરનાર ગાઈડ કપલ નીરવ અને ઉર્વશી પંચાલે તેમની દીકરીનો બર્થડે ગુરુવારે અમદાવાદની એક હેરિટેજ સાઈટ પર ઉજવ્યો હતો. આ જગ્યા હતી અમદાવાદ નજીક આવેલી 350 વર્ષ જૂની ઉવારસદની વાવ. આ વાવ અડાલજ વાવથી માત્ર છ કિ.મી દૂર આવેલી છે. તમને જાણીને નવાઈ લાગશે કે છ મહિના પહેલા આ વાવ ફોટો પાડવા લાયક પણ નહતી. કચરાનો ઢગલો બની ગયેલી આ વાવ અસામાજિક તત્વોનું ઘર અને જાહેરમાં જાજરૂ કરવાની જગ્યા બની ગઈ હતી.

હવે એક મેસેજ મોકલી WhatsApp પર મેળવો અમારા ન્યુઝ, Start કરવા અહીં ક્લિક કરો

સ્થાનિકોની પહેલઃ

ચાર જ મહિના પહેલા હેરિટેજ સંરક્ષકોના માર્ગદર્શન હેઠળ સ્થાનિકોએ વાવમાં ઉતરીને ઝાડુ તથા ડોલ લઈને વાવની સફાઈ હાથ ધરી. આજે ઉવારસદ વાવનો નવો અવતાર જોઈને તે રાણકી વાવ અને વર્લ્ડ હેરિટેજ સિટી અમદાવાદ જેવા પ્રચલિત હેરિટેજ સ્થળો ધરાવતા ગુજરાતમાં હેરિટેજ કન્ઝર્વેશન માટે કેસ સ્ટડી બની શકે તેમ છે. તમને જાણીને નવાઈ લાગશે પણ 50 ગ્રામજનો અને નિષ્ણાંતોએ 10,000 કરતા પણ ઓછા ખર્ચે આ વાવની ચમક પાછી લાવી હતી.

આટલા ઓછા ખર્ચમાં ચમકાવી જગ્યાઃ

હેરિટેજ કન્ઝર્વેશનિસ્ટ કપિલ ઠાકર જણાવે છે, “અમે ડિસેમ્બર મહિનામાં અતુલ્ય વારસો ગૃપના ભાગરૂપે પહેલ શરૂ કરી હતી. અમે સરપંચ ગૌરી ઠાકોર અને તેમના પતિ જગાજીને ટેકો મેળવવા માટે મળ્યા. તેમણે અમને પૂરેપૂરો સપોર્ટ આપ્યો. 10,000થી ઓછા ખર્ચમાં અમે આખી વાવ અને તેની આસપાસના વિસ્તારને ચમકાવી દીધો.”

બદલાયુ વાવનું સ્વરૂપઃ

ગૌરી ઠાકોર જણાવે છે, “વારસાની જાળવણી આપણા બધાની જવાબદારી છે. આ નાની વાવનું બદલાયેલું સ્વરૂપ સૂચવે છે કે નાની પહેલ પણ મોટો ફરક લાવી શકે છે. અડાલજની વાવ અમારી નજીક જ આવી છે. પરંતુ અમારી પાસે ઉવારસદની વાવ છે અને અમે તેને જાળવવાના શ્રેષ્ઠ પ્રયત્ન કરીશું. અમે અહીં વાવનું મહત્વ સમજાવવા માટે ઈન્ટરપ્રિટેશન સેન્ટર ઊભુ કરવાનો પ્રસ્તાવ મૂકવામાં આવ્યો છે. હવે નવા ટૂરિસ્ટ્સ અહીં મુલાકાતે આવી રહ્યા છે અને અમે ફરક જોઈ રહ્યા છીએ.”