DCvsSRH : વૉર્નર-બેરસ્ટોના આક્રમણ સામે દિલ્હી બચાવી શકશે કોટલાનો કિલ્લો?

કોટલાના મેદાન પર દિલ્હી-હૈદરાબાદની ટક્કર

નવી દિલ્હી: દિલ્હીની યુવા ટીમ આ સીઝનમાં જ્યારે હોમગ્રાઉન્ડ પર પોતાની પ્રથમ મેચમાં અનુભવી ચેન્નઈ સુપરકિંગ્સ સામે ટકરાઈ હતી ત્યારે તેને હારનો સામનો કરવો પડ્યો હતો. આજે ફરી એકવાર તેનો સામનો પોતાના હોમ ગ્રાઉન્ડ પર અનુભવી ખેલાડીઓથી સુસજ્જ ટીમ સનરાઈઝર્સ હૈદરાબાદ સાથે થશે. એક તરફ હૈદરાબાદ પોતાની છેલ્લી બંને મેચોમાં જીત મેળવી છે જ્યારે દિલ્હીને ગત મેચમાં પંજાબ સાથે નાના અંતરથી હારનો સામનો કરવો પડ્યો હતો.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

ગજબના ફોર્મમાં SRH

હૈદરાબાદની ટીમ હાલ ગજબના ફોર્મમાં છે. તેને પોતાની ત્રણેય મેચોમાં દેખાડી દીધું છે તે મોટા ટાર્ગેટથી ગભરાય છે અને વિરોધી ટીમ તેને મોટો સ્કોર બનાવતા રોકી શકતી નથી. પૉઈન્ટ ટેબલની વાત કરીએ તો દિલ્હી ચાર મેચોમાં બે જીત સાથે પાંચમા સ્થાને છે જ્યારે હૈદરાબાદની ટીમ 3 મેચોમાં બે જીત સાથે ત્રીજા સ્થાને છે.

SRHના ઓપનર્સ દિલ્હી માટે મોટો પડકાર

દિલ્હી માટે આ મેચમાં મોટો પડકાર હૈદરાબાદના ઓપનર્સ ડેવિડ વૉર્નર અને જ્હૉની બેરસ્ટો હશે. RCB વિરુદ્ધ આ બંનેએ સેન્ચુરી ફટકારી હતી. બંને સીઝનની ત્રણેય મેચોમાં અત્યાર સુધી સેન્ચુરીની ભાગીદારી નોંધાવી ચૂક્યા છે. ખાસ કરીને વિરાટ કોહલીની ટીમ સામે બંનેએ જે રીતે હુમલો કર્યો હતો તે જોતા દિલ્હી ચિંતામાં જરૂર હશે. વૉર્નર તો ગજબના ફોર્મમાં દેખાઈ રહ્યો છે. તેણે ત્રણેય મેચોમાં 50+ રન બનાવ્યા છે. અત્યાર સુધી તે અનુક્રમે 85, 69 અને અણનમ 100 રનની ઈનિંગ્સ રમી ચૂક્યો છે.

અનિયમિત ફોર્મથી ઝઝૂમી રહી છે દિલ્હી

બીજી તરફ દિલ્હીની ટીમમાં હજુ સુધી નિરંતરતાનો અભાવ દેખાઈ રહ્યો છે. પૃથ્વી શૉએ કોલકાતા વિરુદ્ધ 99 રન જરૂર બનાવ્યા પણ પંજાબ સામેની મેચમાં પ્રથમ બોલે જ આઉટ થઈ ગયો. રિષભ પંત અને શિખર ધવન પણ કઈ ખાસ કરી શક્યા નથી. કેપ્ટન શ્રેયસ ઐયર પણ જોઈએ તેવા ફોર્મમાં દેખાયો નથી. આ ઉપરાંત દિલ્હીની સૌથી મોટી ચિંતા તેનો લોઅર ઑર્ડર રહ્યો છે. ટી20માં 11મા ક્રમના બેટ્સમેનથી પણ એક-બે મોટા શૉટ્સની આશા રાખવામાં આવે છે પણ કોલકાતા સામેની મેચમાં ટીમ છેલ્લી ઓવરમાં છ રન ન બનાવી શકી તો પંજાબ સામે છેલ્લી સાત વિકેટ આઠ રનમાં ગુમાવી દીધી. બોલિંગની વાત કરીએ તો દિલ્હી પાસે કગિસો રબાડા સિવાય બીજો કોઈ અનુભવી બોલર દેખાતો નથી જ્યારે હૈદરાબાદ પાસે રાશિદ ખાન, ભુવનેશ્વર કુમાર, સિદ્ધાર્થ કૌલ જેવા દમદાર બોલર્સ છે.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2CYjKyt