અમેરિકનો સાથે ભેદભાવ બદલ HCL ટેક સામે કેસ

68739147

જોશેલ મેન્ડોન્કા

બેંગલુરુ: ભરતીની પ્રક્રિયામાં અમેરિકનો સાથે ભેદભાવ રાખવાના આરોપ હેઠળ HCL ટેક્‌નોલોજિસ સામે ક્લાસ-એક્શન કેસ દાખલ થયો છે. લગભગ તમામ ભારતીય IT સર્વિસિસ કંપની સામે કેસ કરનારી કાનૂની કંપની કોચેન એન્ડ લો દ્વારા આ કેસ કરવામાં આવ્યો છે.

ઉલ્લેખનીય છે કે, નવેમ્બર 2018માં TCS સામે કેસ હાર્યા બાદ કોચેન એન્ડ લો દ્વારા ભારતીય IT કંપની સામે આ પહેલો કેસ થયો છે. કોર્ટે ચુકાદો આપ્યો હતો કે, TCSએ ભરતીની કાર્યવાહીમાં અમેરિકનો સાથે ભેદભાવ રાખ્યો નહોતો.

કોચેન એન્ડ લો દ્વારા ગયા વર્ષના ઓગસ્ટમાં HCL ટેક સામે HCL ટેક્‌નોના ભૂતપૂર્વ કર્મચારી રીઝ વોલ વતી પણ કેસ કરવામાં આવ્યો હતો. આ કેસમાં જાન્યુઆરીમાં HCL ટેકને સફળતા મળી હતી.

કોચેન એન્ડ લો ભૂતકાળમાં ભારતની IT કંપનીઓ સામે અનેક કેસ કરી ચૂકી છે. 2013માં તેણે ઇન્ફોસિસ સામે, 2018માં વિપ્રો અને કોગ્નિઝન્ટ સામે તથા ટેક મહિન્દ્રા સામે તેણે કેસ કર્યો હતો. 2015માં તેણે TCS સામે પણ કેસ કર્યો હતો, પરંતુ આ કેસમાં TCS નવેમ્બરમાં જીતી ગઈ હતી.

HCL ટેકએ ઇકોનોમિક ટાઇમ્સને પાઠવેલા ઇ-મેઇલમાં જણાવ્યું હતું કે, “કંપની અત્યારે આ કેસની સમીક્ષા કરી રહી છે અને યોગ્ય સમયે જવાબ આપશે. કંપની તેની અમેરિકન સબસિડિયરી (HCL, અમેરિકા)માં કાર્યરત વિવિધ દેશોના કર્મચારીઓની ભરતીમાં અને પ્રમોશનમાં જે પ્રેક્ટિસનું પાલન કરે છે તેનો કંપનીને ગર્વ છે. કંપની અમેરિકામાં 15,000 કર્મચારી ધરાવે છે, જેમાંથી 63 ટકાની ભરતી અમેરિકામાં લોકલ સ્તરેથી થઈ છે. આ કેસમાં કંપની પોતાનો બચાવ આક્રમકપૂર્વક કરશે.”

HCL સામે ગયા મહિને દાખલ થયેલો તાજો કેસ ગેસ ગ્રેગરી હેન્ડસોલર વતી થયો છે અને તેણે દલીલ કરી છે કે, તે 2017 અને 2018ની વચ્ચે પાંચ વખત HCLમાં કામ કરવા માટે લાયક ઠર્યો હતો, પરંતુ કંપનીએ તેની ‘ભેદભાવભરી નીતિ’ યથાવત્ રાખીને ભરતી કરી નહોતી. કંપનીએ ભારતીય ઉમેદવારોને પ્રાધાન્ય આપ્યું હોવાથી એક વખત તેની ભરતી થઈ નહોતી.

from Page Array – I Am Gujarat http://bit.ly/2uMYozp