IT કંપનીઓના Q4 માર્જિન દબાણમાં રહેશે

68775699

જોશેલ મેન્ડોન્કા

બેંગલુરુ:મોટા ઓર્ડર મળવાથી અગ્રણી IT કંપનીઓ ચોથા ક્વાર્ટરની આવકમાં પ્રોત્સાહક વૃદ્ધિ દર્શાવશે, પણ અમેરિકામાં વધી રહેલા કર્મચારી ખર્ચને કારણે તેમનું માર્જિન દબાણમાં રહેશે. IT કંપનીઓને ફરી મોટી ડીલ્સ મળવાનું શરૂ થયું છે, પણ અમેરિકા, યુરોપમાં તેમણે કર્મચારીઓની ભરતી અને ટેલેન્ટ શોધવા સબકોન્ટ્રાક્ટર્સ પર વધુ ખર્ચ કરવો પડશે.

IT કંપનીઓ ભારતમાં કર્મચારીઓની નિપુણતામાં ફેરફાર માટે લાખો ડોલર ખર્ચી રહી છે, જેથી ઓફશોર બેઝ બનાવી શકાય. કોટક ઇન્સ્ટિટ્યૂશનલ ઇક્વિટીઝના એનાલિસ્ટ કંવલજિત સલુજાએ જણાવ્યું હતું કે, “ઇન્ફોસિસ, TCS અને HCL ટેકની આવકમાં પ્રોત્સાહક વૃદ્ધિ તેમજ વિપ્રો અને ટેક મહિન્દ્રાની વૃદ્ધિમાં દબાણ સાથે અમને સ્થિર ક્વાર્ટરનો અંદાજ છે.

ઓનસાઇટ ખર્ચમાં વધારાને કારણે કંપનીઓની નફાકારકતાની કસોટી થશે.” સલુજાના અંદાજ પ્રમાણે ચોથા ક્વાર્ટરમાં ઇન્ફોસિસ આવકમાં કોન્સ્ટન્ટ કરન્સી ધોરણે 1.9 ટકા વૃદ્ધિ દર્શાવશે. તેમણે જણાવ્યું હતું કે, “TCS 1.5 ટકા, વિપ્રો 2.5 ટકા, HCL ટેક 2.5 ટકા અને ટેક મહિન્દ્રા 1 ટકા વધારો નોંધાવશે.”

TCS અને ઇન્ફોસિસ 12 એપ્રિલે ચોથા ક્વાર્ટરનાં પરિણામની જાહેરાત સાથે IT કંપનીઓ માટે ‘રિઝલ્ટ સીઝન’નો પ્રારંભ કરશે. એનાલિસ્ટ્સના જણાવ્યા અનુસાર ટેલેન્ટની તંગીના કારણે વેતન વધવાની શક્યતાને કારણે 2019-’20માં માર્જિનનો અંદાજ બહુ મહત્ત્વનો બન્યો છે. રિલાયન્સ સિક્યોરિટીઝના એનાલિસ્ટ હરિત શાહે જણાવ્યું હતું કે, “માર્જિન ધીમે ધીમે ઘટી રહ્યું છે અને યુટિલાઇઝેશન ઘણા ઊંચા સ્તરે છે. ડોલર સામે રૂપિયાના મૂલ્યમાં ઘટાડાનો ફાયદો ઘટી રહ્યો છે અને ડિજિટલ વૃદ્ધિ માટે બિઝનેસમાં રોકાણ જરૂરી છે.”

ઇન્ફોસિસે ગયા વર્ષે ટાર્ગેટ માર્જિનની રેન્જ અગાઉના 23-25 ટકાથી ઘટાડી 22-23 ટકા કરી હતી. અમેરિકામાં કર્મચારીઓની ભરતી ખર્ચ વધવાની ધારણાએ કંપનીને માર્જિન ઘટવાનો અંદાજ હતો. ઇન્ફોસિસે અત્યાર સુધીમાં 10,000 ટાર્ગેટ સામે 7,500 સ્થાનિક અમેરિકન્સની ભરતી કરી લીધી છે. જોકે, કેટલાક એનાલિસ્ટ્સના મતે કંપનીએ માર્જિનની રેન્જમાં વધુ ઘટાડો કરવો પડશે.

મોતીલાલ ઓસ્વાલના રિસર્ચ એનાલિસ્ટ આશિષ ચોપરાએ જણાવ્યું હતું કે, “ઇન્ફોસિસનું માર્જિન ગાઇડન્સ વધુ ઘટીને 21-23 ટકા થવાનો અંદાજ છે.” 2019-’20ની નાણાકીય કામગીરી અંગે મેનેજમેન્ટના વિચાર પર પણ બજારની નજર રહેશે. બ્રેક્ઝિટ અંગેની મેક્રો-ઇકોનોમિક અનિશ્ચિતતા તેમજ અમેરિકામાં સંભવિત મંદીને કારણે IT બજેટમાં ધીમો વધારો નોંધાયો છે.

જોકે, મોટી ડિજિટલ ડીલ્સ કંપનીઓને વૃદ્ધિદર જાળવી રાખવામાં મદદ કરશે. કોટકનાં સલુજાએ જણાવ્યું હતું કે, “2019-’20માં IT સેક્ટર સમાન વૃદ્ધિ દર્શાવશે. અમારા અંદાજ મુજબ ઇન્ફોસિસ, HCL ટેક અને ટેક મહિન્દ્રા 2019-’20માં ઝડપી વૃદ્ધિ દર્શાવશે.” એનાલિસ્ટ્સના અંદાજ મુજબ ઇન્ફોસિસ 2019-’20 માટે 8-10 અને HCL ટેક લગભગ 15 ટકા વૃદ્ધિનું ગાઇડન્સ આપશે. TCS વૃદ્ધિનો અંદાજ આપતી નથી. જ્યારે વિપ્રો ત્રિમાસિક ધોરણે વૃદ્ધિનું ગાઇડન્સ આપે છે.

from Page Array – I Am Gujarat http://bit.ly/2uPDrE4