અમદાવાદ: 2017માં થયેલી વિધાનસભા ચૂંટણીમાં દ્વારકા બેઠકના પરિણામને ગુજરાત હાઈકોર્ટે રદ્દ કર્યું છે. આ બેઠક પર ભાજપના ઉમેદવાર પબુભા માણેક જીત્યા હતા. જોકે, કોંગ્રેસના ઉમેદવાર મેરામણ આહીરે પબુભાની જીતને ગુજરાત હાઈકોર્ટમાં પડકારી હતી. જેના પર સુનાવણી કરતા કોર્ટે આજે પોતાનો ચુકાદો જાહેર કરતા દ્વારકા બેઠકના પરિણામને રદ્દ કર્યું છે.
પબુભા માણેકે જે ઉમેદવારી પત્રક ભર્યું હતું, તેમાં તેમના પ્રસ્તાવકે બેઠકનું નામ ન લખ્યું હોવાથી તેને રદ્દ કરવામાં આવે તેવી માગ કરતી અરજી હાઈકોર્ટમાં કરવામાં આવી હતી. અરજકર્તાનો દાવો હતો કે, જો ઉમેદવારીના ફોર્મમાં આ વિગત ન દર્શાવાઈ હોય તો તે માન્ય રાખી શકાય નહીં. આ મામલે જસ્ટિસ પરેશ ઉપાધ્યાયે બંને પક્ષોની દલીલો સાંભળીને દ્વારકા વિધાનસભા બેઠકનું પરિણામ રદ્દ કરવાનો ચુકાદો આપ્યો હતો.
મેરામણ આહીરે આ જ મુદ્દો રિટર્નિંગ ઓફિસર સામે પણ ઉઠાવ્યો હતો. જોકે, તેમણે આ મામલે પબુભાનું ફોર્મ રદ્દ કરવાનો ઈનકાર કરી દીધો હતો. હાઈકોર્ટના ચુકાદા સાથે પબુભા માણેકને ચૂંટણી જીત્યા હોવા છતાંય પોતાનું ધારાસભ્ય પદ છોડવું પડશે, અને દ્વારકા બેઠક પર પેટાચૂંટણી યોજાશે. ઉલ્લેખનીય છે કે, પબુભા માણેક દ્વારકા બેઠક પર સતત સાતમી વાર ધારાસભ્ય તરીકે ચૂંટાયા હતા. 2017ની ચૂંટણીમાં 5943 મતોથી તેમની જીત થઈ હતી.
from Page Array – I Am Gujarat http://bit.ly/2UdTaa6
No comments:
Post a Comment