બેન્કો સામે NBFCનો નવો પડકાર

68846107

આત્મદીપ રે

કોલકાતા:નોન બેન્કિંગ ફાઇનાન્સ કંપનીઓ બોન્ડમાં ઊંચા વળતર ઓફર કરીને બચતકર્તાને આકર્ષી રહી હોવાથી બેન્કો માટે થાપણો મેળવવામાં નવા પડકાર ઊભા થયા છે. 15 માર્ચે પૂરા થયેલા પખડિયામાં બેન્કોની કુલ ડિપોઝિટમાં ₹4,410કરોડનો ઘટાડો થયો હતો. હવે આશરે અડધો ડઝન નોન બેન્કિંગ ફાઇનાન્સ કંપની અથવા NBFC નોન કન્વર્ટિબલ ડિબેન્ચર્સ (એનસીડી) મારફત ₹3,000કરોડ એકત્ર કરવાની યોજના ધરાવતી હોવાથી બેન્કો માટે નાણાપ્રવાહ મેળવવાનું મુશ્કેલ બન્યું છે.

નાના બચતકારો ઇક્વિટી અને મ્યુચ્યુઅલ ફંડ્સ તરફ પણ ઢળ્યા છે. તેથી રિઝર્વ બેન્ક ઓફ ઇન્ડિયાએ વ્યાજદરમાં ઘટાડો કર્યો હોવા છતાં બેન્કો તેમની થાપણોને વ્યાજદરમાં ઘટાડો કરતી નથી. શ્રેઇ ઇન્ફ્રાસ્ટ્રક્ચર ફાઇનાન્સ, મેગ્મા ફિનકોર્પ, શ્રીરામ સિટી યુનિયન અને મુથૂટ હોમફિન જેવી કંપનીઓ આગામી ત્રણ સપ્તાહમાં આશરે ₹2,050કરોડ એકત્ર કરી રહી છે, તેથી બેન્કો માટે થાપણો મેળવવાની તીવ્ર સ્પર્ધા છે.

એલ એન્ડ ટી ફાઇનાન્સે તાજેતરમાં એનસીડી ઇશ્યૂ મારફત ₹1,000કરોડ એકત્ર કર્યા હતા. શ્રેઇના ચીફ એક્ઝિક્યુટિવ ઓફિસર રાકેશ ભટોરિયાએ જણાવ્યું હતું કે, “રિઝર્વ બેન્કે વ્યાજદરમાં તાજેતરમાં ઘટાડો કર્યા બાદ નાના રોકાણકારો માટે યોગ્ય ભાવના એનસીડી પસંદગીનું રોકાણ માધ્યમ બન્યા છે.” શ્રેઇએ બોન્ડના વેચાણ મારફત ₹500કરોડ એકત્ર કરવાની યોજના બનાવી છે.

NBFC 8.6 ટકાથી 10.75 ટકા સુધીનો કુપન રેટ ઓફર કરી છે, જે બેન્કોની થાપણના વ્યાજદર કરતાં ઊંચા છે. સ્ટેટ બેન્ક ઓફ ઇન્ડિયા પાંચ વર્ષની ડિપોઝિટ માટે મહત્તમ 6.85 ટકા વ્યાજદર ઓફર કરી રહી છે. બંધન બેન્ક 18 મહિનાથી બે વર્ષ સુધીની થાપણો માટે 7.75 ટકા વ્યાજદર ઓફર કરે છે.

રિઝર્વ બેન્કના ડેટા મુજબ ગયા પખવાડિયાએ બેન્કોની થાપણોમાં ઘટાડો થયો હતો, પરંતુ લાંબા ગાળાના ટ્રેન્ડ મુજબ તેમાં વાર્ષિક 10ટકા વધારો થયો છે. આ વૃદ્ધિ નોટબંધી પહેલાં જેટલા છે, પરંતુ લોન ગ્રોથ કરતાં નીચો છે, એમ કોટક ઇન્સ્ટિટ્યૂશનલ ઇક્વિટીએ એક નોટમાં જણાવ્યું હતું.

રિસર્ચ નોટમાં જણાવાયું હતું કે ડિપોઝિટ અને લેન્ડિંગ માર્કેટના માળખાનો મુખ્ય પડકાર એ છે કે પ્રાઇવેટ બેન્કોમાં લોન ગ્રોથ કરતાં ડિપોઝિટ ગ્રોથ નીચો છે. બજારમાં સ્પર્ધાને કારણે બેન્કો માટે થાપણદરમાં વધારો કરવાનું મુશ્કેલ બન્યું છે.

બીજી તરફ લિક્વિડિટીની તંગીને કારણે એનબીએફસીને ઊંચા રેટ ઓફર કરવાની ફરજ પડી રહી છે. શ્રીરામ સિટી યુનિયન ફાઇનાન્સ ₹750કરોડ એકત્ર કરવા બજારમાં પ્રવેશી છે. મેગ્મા ₹500કરોડ અને મુથૂટ હોમફિન ₹400કરોડ એકત્ર કરવા માંગે છે. આ ઇશ્યૂમાં ઓવરસબસ્ક્રિપ્શન જાળવી રાખવાનો પણ વિકલ્પ છે.

from Page Array – I Am Gujarat http://bit.ly/2X3J5yz