PVR કરતાં આઇનોક્સ વધુ આકર્ષક

68760036

રાજેશ નાઈડુ

ઇટી ઇન્ટેલિજન્સ ગ્રૂપ

ફિલ્મ સ્કીનની સંખ્યાના સંદર્ભમાં ભારતની બીજા ક્રમની સૌથી મોટી મલ્ટિપ્લેક્સ આઇનોક્સ લીઝરના શેરમાં ચાલુ વર્ષે 28 ટકાની તેજી આવી છે. આ સમયગાળામાં બજારમાં મોખરાનું સ્થાન ધરાવતી પીવીઆરના શેરમાં 2.8 ટકા વધારો થયો છે, જે આઇનોક્સ માટેના વધુ વ્યાપક આશાવાદનો સંકેત આપે છે.

બ્લૂમબર્ગના ડેટા અનુસાર ચાલુ વર્ષે અત્યાર સુધીના સમયગાળામાં 2019-’20ના નાણાકીય વર્ષ માટે આઇનોક્સની શેર દીઠ કમાણી (ઇપીએસ)ના અંદાજમાં ચાર ટકાનો વધારો થયો છે, જ્યારે પીવીઆરના અર્નિંગ અંદાજમાં 1.3 ટકા વધારો થયો છે. એનાલિસ્ટ્સે જણાવ્યું હતું કે ભૂતકાળમાં પીવીઆરએ વ્યૂહાત્મક શહેરોમાં આક્રમક વિસ્તરણ કર્યું હતું અને તેનાથી રોકાણકારો તેના શેર તરફ આકર્ષાયા હતા. આની સામે આઇનોક્સે સ્ક્રીન ક્ષમતામાં વધારો કરવા માટે આવો આક્રમક અભિગમ અપનાવ્યો ન હતો.

જોકે છેલ્લા એક વર્ષમાં આઇનોક્સે દર વર્ષે 60થી 70 સ્ક્રીનનો ઉમેરો કરવાની સ્પષ્ટ વ્યૂહરચના જાહેર કરી છે. ચાલુ વર્ષે અત્યાર સુધી કંપનીએ સ્ક્રીનની સંખ્યામાં ૭૧નો વધારો કર્યો છે. હાલમાં આઇનોક્સ પાસે 570 સ્ક્રીન છે અને આગામી વર્ષમાં તેમાં 857નો વધારો કરવાની યોજના છે. આ વિસ્તરણ મહત્ત્વના શહેરોમાં છે, તેથી આગામી ક્વાર્ટર્સમાં ટિકિટના સરેરાશ ભાવમાં વધારો થવાની ધારણા છે. એટ્રિયા મોલ, વરલી અને આર સિટી, ઘાટકોપર (મુંબઈ) કંપનીની સ્થળ કેન્દ્રીત વિસ્તરણ વ્યૂહરચનાનો ઉદાહરણો છે.

આઇનોક્સે એડ્વર્ટાઇઝિંગ રેટમાં વધારો કર્યા બાદ છેલ્લાં ત્રણ વર્ષમાં તેની એડ્વર્ટાઇઝિંગ આવકમાં ઊંચી વૃદ્ધિ જોવા મળી છે. ૨૦૧૮-‘૧૯ના નાણાકીય વર્ષમાં એડમિટ દીઠ એડ્વર્ટાઇઝિંગ આવક ₹30 રહી હોવાનો અંદાજ છે, જે 2016-’17ના નાણાકીય વર્ષમાં ₹18 હતી.

આ ઉપરાંત સીએલએસએના અહેવાલ અનુસાર ફૂડ એન્ડ બેવરેજમાં ગ્રાહક દીઠ ખર્ચમાં સુધારો થયો છે. તેનો આ ખર્ચ પીવીઆર કરતાં ઊંચો છે. ડિસેમ્બર 2018 ક્વાર્ટરમાં ગ્રાહક દીઠ એફ એન્ડ બી ખર્ચમાં આશરે છ ટકાનો વધારો થયો હતો.

CLSAના જણાવ્યા અનુસાર છેલ્લાં ત્રણ વર્ષમાં આ બે પરિબળોને કારણે એડમિટ દીઠ EBIDTA 2016-’17ની ₹27થી વધીને ₹47 થવાનો અંદાજ છે. આઇનોક્સે ભંડોળ એકત્ર કરવામાં પણ તાજેતરમાં ત્વરિત કામગીરી કરી છે. તેને પ્રમોટર ગ્રૂપ એકમ ગુજરાત ફ્લોરોકેમિકલના પ્રેફરન્શિયલ એલોટમેન્ટ મારફત ₹160 કરોડ એકત્ર કર્યા હતા. તેનાથી રોકાણકારોની એવી અપેક્ષાને વેગ મળ્યો હતો કે કંપનીએ આગામી ક્વાર્ટરમાં એક્વિઝિશન માટે પૂર્વતૈયારી કરી છે. ₹350 કરોડના રિયલ એસ્ટેટ મૂલ્ય અને 4.5 ટકા ટ્રેઝરી સ્ટોક સાથે કંપનીને બેલેન્સશીટ એક્વિઝિશનને ટેકો આપી શકે તેટલી મજબૂત છે.

એક વર્ષ પહેલાં આઇનોક્સનો શેર આ સેગમેન્ટમાં મોખરાનું સ્થાન ધરાવતી પીવીઆર કરતાં 33 ટકા ડિસ્કાઉન્ટે ટ્રેડ થતો હતો. હાલમાં આ ડિસ્કાઉન્ટ ઘટીને 27 ટકા થયું છે.

from Page Array – I Am Gujarat http://bit.ly/2Vw15Bk