SRHvsRCB : આ પાંચ દિગ્ગજો પર રહેશે નજર

કોહલી અને કેન વચ્ચે ટક્કર

ઈન્ડિયન પ્રીમિયર લીગની સીઝન 12ની 11મી મેચમાં સનરાઈઝર્સ હૈદરાબાદ અને રોયલ ચેલેન્જર્સ બેંગ્લોર ટક્કર થઈ રહી છે. હૈદરાબાદના રાજીવ ગાંધી ઈન્ટરનેશનલ સ્ટેડિયમ પર રમાઈ રહેલી આ મેચમાં RCBએ ટૉસ જીતીને હૈદરાબાદને પ્રથમ બેટિંગ માટે આમંત્રણ આપ્યું છે. વિરાટની કેપ્ટનશિપમાં બેંગ્લોરની ટીમ પોતાની પ્રથમ જીત શોધી રહી છે જ્યારે હૈદરાબાદે પણ અત્યાર સુધી બે મેચો રમી છે જેમાં તે એકમાં જીતી મેળવી ચૂકી છે. આવામાં ચલો જોઈએ કે, આજની મેચમાં કયા ખેલાડીઓ પર રહેશે બધાની નજર…

ડેવિડ વૉર્નર

ઑસ્ટ્રેલિયન ખેલાડી ડેવિડ વૉર્નર ગજબના ફોર્મમાં છે. તે અત્યાર સુધીની બંને મેચોમાં ફિફ્ટી ફટકારી ચૂક્યો છે. તેણે પહેલી મેચમાં કોલકાતા વિરુદ્ધ શાનદાર 85 અને બીજી મેચમાં 69 રન બનાવ્યા હતા. બંને ઈનિંગ્સ વિસ્ફોટક રહી. બે મેચોમાં તેણે 77ની એવરેજથી 154 રન ફટકાર્યા છે. એક તરફ જ્યાં હૈદરાબાદને તેની પાસેથી એક મોટી ઈનિંગની આશા હશે ત્યાં બીજી બાજુ વિરાટ એક ખાસ તૈયારી દ્વારા તેની વિકેટ જલ્દી લેવાનો પ્રયત્ન કરશે.

વિરાટ કોહલી

IPL સીઝનની શરૂઆતથી જ વિરાટની કેપ્ટનશિપ પર સતત સવાલ ઉઠાવામાં આવી રહ્યાં છે. અત્યાર સુધી રમાયેલી બંને મેચોમાં તેની ટીમ જીત મેળવી શકી નથી. હવે જો ત્રીજી મેચમાં પણ તેની ટીમ હારે છે તો આલોચકો પાસે વધુ એક તક હશે. આવામાં વિરાટની ટીમ હાર બિલકુલ પસંદ નહીં કરે. મુંબઈ વિરુદ્ધ તેણે 32 બોલમાં શાનદાર 48 રન બનાવ્યા હતા, પણ ટીમને જીત અપાવી શક્યો નહોતો. હૈદરાબાદ વિરુદ્ધ તે જીતનું ખાતું ખોલાવવા માગશે.

એબી ડિ વિલિયર્સ

ફેન્સની વચ્ચે ‘મિસ્ટર 360 ડિગ્રી’ નામથી જાણીતો એબી ડિ વિલિયર્સ ફોર્મમાં આવી ગયો છે અને તે મુંબઈ વિરુદ્ધ પોતાની ટીમને જીત અપાવવાથી સ્હેજ માટે ચૂકી ગયો હતો. તેણે 41 બોલમાં 4 ચોગ્ગા અને 6 છગ્ગાની મદદથી શાનદાર 70 રનની ઈનિંગ રમી હતી. વિરાટ તેને ઓપનિંગમાં ઉતારી શકે છે. અત્યાર સુધી તેણે ઓપનિંગમાં પાર્થિવ પટેલ સાથે પોતાને અને એક મેચમાં મોઈન અલીને અજમાવ્યો છે પણ કામ બન્યું નથી.

યુઝવેન્દ્ર ચહલ

IPLમાં બોલર્સની ચર્ચા થાય ત્યારે ફાસ્ટ બોલર્સનો ઉલ્લેખ પહેલા થાય છે પણ આ સિઝનમાં લેગ સ્પિનર યુઝવેન્દ્ર ચહલ ધમાલ મચાવી રહ્યો છે. તેણે બે મેચોમાં 5 વિકેટો ઝડપી છે. મુંબઈ વિરુદ્ધ તેણે શાનદાર પ્રદર્શન કરતા 4 વિકેટો ઝડપી હતી. અહીં પણ તેના પર નજર રહેશે.

ભુવનેશ્વર કુમાર

ડેથ ઓવરમાં સ્પેશિયાલિસ્ટ માનવામાં આવતો ભુવનેશ્વર આ સીઝનમાં હજુ સુધી પ્રભાવી રહ્યો નથી. તેને હજુ પણ પોતાની પ્રથમ વિકેટની શોધ છે. KKR વિરુદ્ધ તે ખૂબ મોંઘો સાબિત થયો. તેણે કોઈ વિકેટ લીધા વિના 55 રન ખર્ચી નાખ્યા. તે ટીમનો સ્ટ્રાઈક બોલર છે. કેપ્ટન કેન વિલિયમ્સન ઈચ્છશે કે, તે પોતાનું ફોર્મ મેળવી લે કારણ કે, કારણ કે RCBની પાસે વિરાટ કોહલી અને એબી ડિ વિલિયર્સ જેવા વિસ્ફોટક બેટ્સમેન છે.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat https://ift.tt/2FHWlSt