બેરસ્ટો-વૉર્નરના તોફાન બાદ નબીનો તરખાટ, RCBની 118 રને શરમજનક હાર

નબીનો તરખાટ, બેંગ્લોરનો સતત ત્રીજો પરાજય

જૉની બેરસ્ટો અને ડેવિડ વૉર્નરની શાનદાર સદીઓ બાદ મોહમ્મદ નબીની તરખાટ મચાવતી બોલિંગની મદદથી સનરાઈઝર્સ હૈદરાબાદે IPL2019ની 11મી મેચમાં રોયલ ચેલેન્જર્સ બેંગ્લોરને 118 રનના મોટા અંતરની હરાવી દીધી. SRHના 232 રનના ટાર્ગેટ સામે RCB 19.5 ઓવરમાં ફક્ત 113 રન જ બનાવી શકી હતી. હૈદરાબાદ તરફથી નબીએ 11 રનમાં ચાર જ્યારે સંદીપ શર્માએ 19 રનમાં ત્રણ વિકેટ લીધી. આ RCBનો સતત ત્રીજો પરાજય છે જ્યારે હૈદરાબાદે ત્રીજી મેચમાં બીજો વિજય મેળવ્યો છે.

RCBના તમામ મોટા નામ નિષ્ફળ

232 રનના વિશાળ ટાર્ગેટની સામે RCBની શરૂઆત ખૂબ જ કંગાળ રહી. પાર્થિવ પટેલ (11), શિમરોન હેટમાયર(9), વિરાટ કોહલી(3), એબી ડિ વિલિયર્સ(1), મોઈન અલી(2) જેવા મોટા નામ સંદતર ફેલ રહ્યાં હતા. એક સમયે તો RCBનો સ્કોર 30 રને પાંચ વિકેટ હતો અને 50 રન પર માંડ કરી શકે તેમ લાગતું હતું પણ કોલિન ડિ ગ્રાન્ડહોમ(37)અને પ્રયાસ બર્મન (19)ની ઈનિંગ્સની મદદથી છેવટે તે 19.5 ઓવરમાં 113 રન સુધી પહોંચી શક્યું હતું.

એક જ મેચમાં બંને ઓપનર્સની સદીનો ઈતિહાસ

અગાઉ સનરાઈર્ઝ હૈદરાબાદે ઓપનર જૉની બેરસ્ટોના 56 બોલમાં 114 અને ડેવિડ વૉર્નરના 55 બોલમાં બોલમાં અણનમ 100 રનની મદદથી 20 ઓવરમાં 2 વિકેટે 231 રનનો પહાડ જેવો સ્કોર બનાવ્યો હતો, IPLના અત્યાર સુધીના ઈતિહાસમાં આ પ્રથમ એવી ઘટના છે જ્યારે બંને ઓપનર્સે એક જ મેચમાં સેન્ચુરી ફટકારી હોય.

બેરસ્ટો-વૉર્નરની 185 રનની રેકોર્ડતોડ ભાગીદારી

અગાઉ બેંગ્લોરના કેપ્ટન વિરાટ કોહલીએ ટૉસ જીતી પ્રથમ ફિલ્ડીંગ કરવાનો નિર્ણય લીધો. જે ટીમને અતિશય મોંઘો પડ્યો. બેરસ્ટો અને વોર્નરની જોડીએ RCBના દરેક બોલરની ધોલાઈ કરી. બેંગ્લોરને પ્રથમ વિકેટ 17મી ઓવરમાં મળી હતી જ્યાં સુધી SRH એક જંગી સ્કોર તરફ અગ્રેસર થઈ ગઈ હતી. જૉની બેરસ્ટોએ 56 બોલમાં 12 ચોગ્ગા અને 7 છગ્ગા સાથે 114 રનની ઈનિંગ રમી હતી. તેણે વૉર્નર સાથે પ્રથમ વિકેટ માટે 185 રનની ભાગીદારી નોંધાવી જે અત્યાર સુધી સૌથી મોટી ઓપનિંગ ભાગીદારી છે.

બેરસ્ટો બાદ વોર્નરે પણ ફટકારી સેન્ચુરી

બેરસ્ટો ચહલની બોલિંગમાં આઉટ થયો બાદમાં વૉર્નરે મોરચો સંભાળ્યો હતો અને છેલ્લી ઓવરમાં સેન્ચુરી પૂરી કરી હતી. આ દરમિયાન તેણે 55 બોલનો સામનો કરી પાંચ ચોગ્ગા અને પાંચ છગ્ગા ફટકાર્યા હતા. RCBના તમામ બોલર્સે સરેરાશ 10થી વધુની ઈકોનોમી સાથે રન ખર્યા હતા અને યુઝવેન્દ્ર ચહલને એકમાત્ર વિકેટ મળી હતી. વિજય શંકર રનઆઉટ થયો હોઈ બીજા કોઈ બોલરના ફાળે સફળતા ગઈ નહોતી.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat https://ift.tt/2U6qc0S