VIL, એરટેલની આવક છેલ્લાં 11 ક્વાર્ટરમાં પ્રથમવાર વધવાની શક્યતા

68776140

કલ્યાણ પરબત

કોલકાતા: જાન્યુઆરી-માર્ચ 2019 ક્વાર્ટરમાં વોડાફોન આઇડિયા (VIL) અને ભારતી એરટેલની મોબાઇલ સર્વિસ રેવન્યુ 11 ક્વાર્ટર્સમાં પ્રથમવાર ઉત્તરોત્તર ધોરણે વધે તેવી શક્યતા છે. બંને કંપનીએ મિનિમમ રિચાર્જ પ્લાન્સ લોન્ચ કર્યા હતા તેમજ વધુ ને વધુ ગ્રાહકોએ ઊંચા ભાવનાં વોઇસ અને ડેટા પેક ખરીદ્યા હોવાથી આ ક્વાર્ટરમાં રાહત મળશે એવો અંદાજ એનાલિસ્ટ્સ વ્યક્ત કરી રહ્યા છે.

સપ્ટેમ્બર 2016માં ટેલિકોમ માર્કેટમાં પ્રવેશીને ભારે ઊથલપાથલ મચાવનારી રિલાયન્સ જિયો ઇન્ફોકોમ તેની આ બંને હરીફ કરતાં ચડિયાતું પ્રદર્શન જાળવી રાખે તેવી પ્રબળ શક્યતા છે. જિયો ગ્રાહકોની સંખ્યામાં વધારો કરીને તેની નેટ પ્રોફિટ તથા રેવન્યુ ગ્રોથમાં મજબૂત વૃદ્ધિ જાળવી રાખશે. જિયો દ્વારા જે ભાવયુદ્ધ શરૂ થયું હતું તે હવે શાંત થઈ ગયું હોય તેવું લાગે છે અને ઉદ્યોગમાં સ્થિરતા પાછી ફરી રહી હોવાના સંકેત મળે છે.

“એરટેલ અને VIL ફરી વૃદ્ધિના માર્ગે પાછા ફરે તેવા સંકેત છે, કારણ કે ટેરિફ મોટા ભાગે સ્થિર થયા છે. મિનિમમ રિચાર્જ પ્લાન લોન્ચ થવાથી આવક વધશે અને મોનેટાઇઝેશન સુધરવાથી ફાયદો થશે.” એમ BNP પારિબા દ્વારા તૈયાર થયેલી નોટમાં નોંધવામાં આવ્યું છે, જેની એક નકલ ઇકોનોમિક ટાઇમ્સ પાસે છે.

બેન્ક ઓફ અમેરિકા-મેરિલ લિન્ચ (BoA-ML)ને અંદાજ છે કે, ચોથા ક્વાર્ટરમાં એરટેલ ઇન્ડિયાની મોબાઇલ રેવન્યુ ડિસે ’18 ક્વાર્ટરની સરખામણીએ 4 ટકા વધશે જ્યારે BNP પારબિાએ VILની રેવન્યુ 1 ટકા વધ‌વાનો અંદાજ આપ્યો છે.

એનાલિસ્ટ્સ માને છે કે, જિયોના આગમન બાદ માર્કેટમાં જે ખળભળાટ મચી ગયો હતો અને ગળાકાપ સ્પર્ધા શરૂ થઈ હતી, તેનો તબક્કો પૂરો થયો છે. BoA-MLને અપેક્ષા છે કે, એરટેલની એવરેજ રેવન્યુ પર યુઝર (ARPU) 21 ટકા વધીને ₹126 થઈ જશે. BNP પારિબાને અંદાજ છે કે, VILની ARPU 19 ટકા વધીને ₹106 થશે. બંને ટેલિકોમ કંપનીએ આવક ન કરાવી આપતાં હોય તેવા ગ્રાહકોથી પીછો છોડાવવા અને ARPUમાં વધારો કરવા માટે ગયા ઓક્ટોબરમાં મિનિમમ રિચાર્જ પ્લાન્સ લોન્ચ કર્યા હતા.

BNPને અપેક્ષા છે કે, એરટેલ અને VIL માર્ચ ક્વાર્ટરમાં પ્રત્યેક 90-100 લાખ મોબાઇલ બ્રોડબેન્ડ ગ્રાહકો ઉમેરશે. VILનો ડેટા વોલ્યુમ ગ્રોથ વધશે. મુકેશ અંબાણીની રિલાયન્સ જિયો સતત છઠ્ઠા ક્વાર્ટરમાં પ્રોફિટમાં વૃદ્ધિ કરે તેવી શક્યતા છે જ્યારે એરટેલ અને VIL તેમના ભારતીય મોબાઇલ બિઝનેસમાં ખોટ જાળવી રાખશે. BoA-ML જણાવે છે કે, જિયોનો નેટ પ્રોફિટ વાર્ષિક ધોરણે 64 ટકા વધીને ₹840 કરોડ થશે કારણ કે, જિયોના ગ્રાહકોમાં અંદાજે 2.95 કરોડ ગ્રાહકોનો ઉમેરો થયો હતો.

BoA-MLના અંદાજ મુજબ, જિયોની આવક વાર્ષિક ધોરણે 57 ટકા અને ત્રિમાસિક ધોરણે 8 ટકા વધીને ₹11,210 કરોડ થશે જ્યારે માસિક ARPU ત્રિમાસિક ધોરણે બે ટકા ઘટીને ₹127 થઈ શકે છે, જે એરટેલની ARPU કરતાં થોડીક વધારે હશે.

એરટેલ ₹599 કરોડથી ₹1,300 કરોડની રેન્જમાં નેટ કોન્સોલિડેટેડ લોસ નોંધાવશે, જે લગભગ 16 ક્વાર્ટરમાં પહેલીવાર હશે. CLSAને અંદાજ છે કે, એરટેલનો હોમ બ્રોડબેન્ડ અને DTH બિઝનેસ આવકમાં ત્રિમાસિક ધોરણે 3 ટકા ઘટાડો નોંધાવશે.

માર્ચ ’19 ક્વાર્ટરમાં એરટેલની ભારતની મોબાઇલ સર્વિસ રેવન્યુ ₹10,289-10,342 કરોડની વચ્ચે રહેવાનો અંદાજ છે, જે જિયોની આવક કરતાં આ વખતે પણ ઓછી હશે. એરટેલની કોન્સોલિડેટેડ રેવન્યુ ₹20,506 કરોડથી ₹20,930 કરોડની વચ્ચે રહેશે. એરટેલ આફ્રિકાના 15 દેશોમાં પણ મોબાઇલ સર્વિસ ઓફર કરે છે.
BNPના એનાલિસ્ટ્સે આગાહી કરી છે કે, વોડાફોન આઇડિયાની રેવન્યુ ઉત્તરોત્તર ધોરણે 1 ટકા વધીને ₹11,882.4 કરોડ થશે.

from Page Array – I Am Gujarat http://bit.ly/2VuTF11