12 સાયન્સનું રિઝલ્ટ નીચું આવતા ખાનગી એન્જિનિયરિંગ કોલેજો મોટી મુશ્કેલીમાં

35,000 બેઠકો ખાલી રહે તેવી શક્યતા

અમદાવાદ: શિક્ષણમાં ખાનગીકરણ વધવાના પ્રતાપે ગુજરાતની એન્જિનિયરિંગ કોલેજોમાં આજની તારીખે 61,000 બેઠકો ઉપલબ્ધ છે. જોકે, આ વર્ષે 12 સાયન્સમાં માત્ર 34,000 સ્ટૂડન્ટ્સ જ એન્જિનિયરિંગમાં એડમિશન મેળવી શકે તેવું રિઝલ્ટ લાવ્યા છે. જેના કારણે આ વખતે એન્જિનિયરિંગ કોલેજોમાં 35,000 જેટલી બેઠકો ખાલી રહેવાના પૂરા ચાન્સ છે.

હવે સીધા Whatsapp પર મેળવો મહત્વના ન્યૂઝ, શરુ કરવા ક્લિક કરો

એક સ્ટૂડન્ટના ભાગે બે બેઠકો આવે તેમ છે!

d

આ શૈક્ષણિક વર્ષમાં ફાર્મસી અને એન્જિનિયરિંગમાં એડમિશન લેવા ઈચ્છતા સ્ટૂડન્ટ્સને કોઈ ખાસ માથાકૂટ નહીં કરવી પડે. સૂત્રોનું માનીએ તો, એન્જિનિયરિંગમાં 60,937 બેઠકો ઉપલબ્ધ છે, અને તેમાંય 1500 બેઠકોનો ઉમેરો થવાનો છે. આમ આ વખતે એન્જિનિયરિંગ સીટ્સનો કુલ આંકડો 63,437 પર પહોંચશે.

બધા સ્ટૂડન્ટ એડમિશન લે તો પણ બેઠકો ખાલી રહે

એન્જિનિયરિંગમાં જેટલી બેઠકો ઉપલબ્ધ છે, તેની સામે આ વખતે 38,848 સ્ટૂડન્ટ્સ જ પાસ થયા છે. એડમિશન પ્રક્રિયા સાથે સંકળાયેલા અધિકારીઓના જણાવ્યા અનુસાર, જો સીબીએસઈના 7000 સ્ટૂડન્ટ્સ પણ ઉમેરી દેવામાં આવે તો પણ કુલ સ્ટૂડન્ટ્સનો આંકડો 45,948 પર પહોંચશે. જેનો મતલબ સાફ છે કે જો સાયન્સમાં પાસ થયેલા ગુજરાતના બધા સ્ટૂડન્ટ્સ એન્જિનિયરિંગમાં એડમિશન લે તો પણ 17,498 બેઠકો ખાલી રહી જાય.

નિયમોમાં છૂટ અપાશે

ગયા વર્ષે ગુજરાતમાં પ્રવેશના માપદંડો ખાસ્સા હળવા કરાયા બાદ પણ એન્જિનિયરિંગમાં 32,000 બેઠકો ખાલી રહી હતી. આ વખતે પણ ધારાધોરણોમાં છૂટ આપવામાં આવે તેવી પૂરી શક્યતા છે. નિયમ અનુસાર, મેથ્સ, ફિઝિક્સ અને કેમેસ્ટ્રીમાં 45 ટકા લાવનારા સ્ટૂડન્ટને જ એન્જિનિયરિંગમાં એડમિશન મળે છે. જોકે, આ નિયમને અનુસરાય તો ગુજરાત બોર્ડ તેમજ સીબીએસઈના 40 ટકા લાવનારા કુલ 38,000 સ્ટૂડન્ટ્સ જ એન્જિનિયરિંગમાં એડમિશન મેળવવાને લાયક ઠરે.

ગ્રામ્ય વિસ્તારની કોલેજોની હાલત ખરાબ થશે

એલડી એન્જિનિયરિંગના પ્રિન્સિપાલ અને એડમિશન કમિટિના ઈન્ચાર્જ જીપી વડોદરિયાના જણાવ્યા અનુસાર, આ વખતે ખાનગી કોલેજોમાં 35,000 બેઠકો ખાલી રહેવાની શક્યતા છે. તેમાંય ગ્રામ્ય વિસ્તારોમાં આવેલી કોલેજોને વિદ્યાર્થીઓ મળવા મુશ્કેલ બની જશે. આ વર્ષે ખાલી પડેલી બેઠકોનો આંકડો સર્વોચ્ચ સપાટીએ પહોંચી જાય તો નવાઈ નહીં.

from Page Array – I Am Gujarat http://bit.ly/2Hbi5qt