એપ્રિલમાં AC, ફ્રીજ, કોલ્ડ ડ્રિંક્સના વેચાણમાં ‘ગરમી’

69213271

વૃતાંકર મુખરજી

કોલકાતા: વેચાણ માટે માત્ર ઉનાળાના મહિનાઓ પર આધારિત કંપનીઓ માટે આ વખતે એપ્રિલ છેલ્લા ત્રણ વર્ષમાં સૌથી સારો રહ્યો છે. 45 ડિગ્રીના પારાને કારણે એર કન્ડિશનર્સ (AC),રેફ્રીજરેટર્સ, ઠંડા પીણાં અને આઈસક્રીમનું બંપર વેચાણ થયું છે.

એપ્રિલના આંકડા પ્રમાણે ACના વેચાણમાં 15 ટકા, રેફ્રીજરેટર્સમાં 8 ટકા, જ્યૂસ અને આઈસક્રીમમાં 15-18 ટકા તેમજ લસ્સી, મિલ્ક શેક, છાશ સહિત ઠંડા પીણાંના વેચાણમાં 30 ટકાથી વધુ ઉછાળો નોંધાયો છે.

ગયા વર્ષે ઉનાળામાં ACનું વેચાણ બે ટકા, રેફ્રીજરેટર્સનું પ ટકા તેમજ પેકેજ્ડ કોલ્ડ બેવરેજિસ અને આઈસક્રીમનું વેચાણ 10-14 ટકા વધ્યું હતું.

ITC, અમૂલ, ડાબર, વોલ્ટાસ, ડાઈકિન અને ગોદરેજ એપ્લાયન્સીસના જણાવ્યા અનુસાર દેશભરમાં ગરમીના ઊંચા પારાને કારણે એપ્રિલ-જૂન ક્વાર્ટરમાં આ તમામ કંપનીઓને વોલ્યુમમાં નોંધપાત્ર વૃદ્ધિનો અંદાજ છે. અગાઉ ઉદ્યોગને આશંકા હતી કે, લોકસભા ચૂંટણીને કારણે ગ્રાહકોના સેન્ટિમેન્ટ પર પ્રતિકૂળ અસર થશે.

જાપાનની AC કંપની ડાઈકિન ઈન્ડિયાના એમડી કવંલજીત જાવાએ જણાવ્યું હતું કે, ઉદ્યોગને જેનો ડર હતો એ ચૂંટણીની વેચાણ પર કોઈ અસર થઈ નથી. દક્ષિણ ભારતમાં માર્ચ મહિનામાં વેચાણ વધવાની શરૂઆત થઈ હતી અને દેશના બાકીના ભાગોમાં એપ્રિલથી વેચાણને વેગ મળ્યો હતો. ક્વાર્ટરમાં 12-15 ટકા વૃદ્ધિનો અંદાજ છે.

ટાટા જૂથની કંપની વોલ્ટાસના એમડી પ્રદીપ બક્ષીએ જણાવ્યું હતું કે, બજારમાં એકંદરે બંપર માંગ જોવા મળી છે. દક્ષિણ અને મધ્ય ભારતમાં વેચાણ સૌથી વધુ રહ્યું છે. સેકન્ડરી વેચાણ બે આંકડામાં વધ્યું છે, જે મે મહિનામાં પણ ચાલુ રહેવાનો અંદાજ છે.

from Page Array – I Am Gujarat http://bit.ly/2ZXjJVn