ગેંગરેપની પીડિતાનો ચિત્કાર: મારી જિંદગી નર્ક બનાવી દેનારા પાંચેયને ફાંસી આપો

12મા ધોરણમાં ભણતી હતી પીડિતા

થાણાગાજી (રાજસ્થાન): 20 વર્ષની યુવતી પર પાંચ નરાધમો દ્વારા કરાયેલા ગેંગરેપની ઘટનાએ સમગ્ર રાજસ્થાનમાં ચકચાર મચાવી છે. આ ઘટનાનો ભોગ બનનારી યુવતી 12મા ધોરણમાં અભ્યાસ કરી રહી હતી. હજુય ભરના ઓથાર હેઠળ થરથર કાપી રહેલી પીડિતાએ ટાઈમ્સ ઓફ ઈન્ડિયા સાથે વાત કરતા જણાવ્યું હતું કે, તેની ઈજ્જત લૂંટનારા પાંચેય નરાધમોને ફાંસીની સજા થવી જોઈએ.

હવે સીધા Whatsapp પર મેળવો મહત્વના ન્યૂઝ, શરુ કરવા ક્લિક કરો

ફાંસીથી આકરી કોઈ સજા હોય તો તે આપો

અલવર જિલ્લાના થાણાગાજી ગામની આ ઘટનાની પીડિતાનું કહેવું છે કે, તેની જિંદગી હવે નર્ક સમાન બની ગઈ છે. મારા પર રેપ કરનારા, તેનો વીડિયો ઉતારનારા લોકોને ફાંસી થવી જોઈએ. જો તેનાથી પણ વધારે કોઈ આકરી સજા હોય તો તમામ નરાધમોને તે સજા આપવી જોઈએ. સ્થાનિક પોલીસે પણ આ યુવતીની ઈજ્જત લૂંટનારાને પકડવાને બદલે જે વર્તન પીડિતા સાથે કર્યું તેનાથી પણ તે આઘાતમાં છે.

પોલીસની નફ્ફટાઈએ હદ વટાવી

પીડિતાના ગેંગરેપનો વીડિયો સોશિયલ મીડિયા પર વાયરલ થયો ત્યારે પણ પોલીસે તેની અલગથી FIR નોંધવાની ના પાડી દીધી હતી. આખા ગામમાં પોતાના રેપનો વીડિયો ફરતો થઈ જતાં પીડિતા અને તેનો પતિ પોલીસ સ્ટેશન પહોંચ્યાં હતાં, પરંતુ પોલીસે સ્ટાફ નથી તેવું બહાનું બતાવી FIR નોંધવાનો ઈનકાર કરી દીધો હતો. પોલીસે એવું પણ કહ્યું હતું કે ચૂંટણી હોવાના કારણે 5-6 મેના રોજ કોઈ કામ નહીં થઈ શકે.

આજે પણ તે દિવસ યાદ કરતા ધ્રુજી ઉઠે છે પીડિતા

તે ભયાનક દિવસને યાદ કરતા પીડિતાના પતિએ જણાવ્યું હતું કે, તેઓ ઘેરથી નીકળ્યા તેની દસ જ મિનિટમાં પાંચ લોકોએ અમને ઘેરી લીધા હતા, અને અવાવરું જગ્યાએ લઈ જઈ જબરજસ્તી અમારા કપડાં ઉતરાવ્યાં હતાં. અમે પ્રતિકાર કર્યો તો અમને મારવામાં આવ્યાં, અને અમારા કપડાં ફાડી નાખવામાં આવ્યાં. ત્યારબાદ ત્રણ કલાક સુધી મારી પત્ની પર પાંચ નરાધમો બળાત્કાર કરતા રહ્યા.

બળાત્કારીઓને ફાંસી નહીં થાય ત્યાં સુધી નહીં ઝંપીએ

રેપ કેસ નોંધાઈ ગયા બાદ પણ નરાધમોએ તેમને ફોન કરી ધમકી આપી પૈસા માગવાનું ચાલુ રાખ્યું હતું. શરુઆતમાં ડરને કારણે તેઓ પોલીસ પાસે નહોતા ગયા, પરંતુ તેમને લાગ્યું કે જો તેઓ કેસ નહીં કરે તો તેમની સાથે જે થયું તે કોઈ બીજા સાથે પણ થશે. પીડિતાના પતિનું કહેવું છે કે હવે તેને કોઈનો ડર નથી. બળાત્કારીઓની માત્ર ધરપકડથી તે સંતુષ્ટ નથી, તમામને ફાંસીની સજા નહીં થાય ત્યાં સુધી તે ઝંપીને નહીં બેસે.

from Page Array – I Am Gujarat http://bit.ly/2LzjlZO