રાઘવ ઓહરી
નવી દિલ્હી:એન્ફોર્સમેન્ટ ડાયરેક્ટરેટ (ઇડી)એ જણાવ્યું છે કે કોર્પોરેટ લોબિસ્ટ દીપક તલવારે માત્ર નાગરિક ઉડ્ડયન મંત્રાલયના અધિકારીઓ સાથે લોબિંગ કર્યું હતું એટલું જ નહીં, તે વિવિધ સરકારી એજન્સીઓ સાથે પણ ઘરોબો ધરાવતા હતા. તેમાં નાણામંત્રાલય, કાનૂન, કોર્પોરેટ બાબતો, ટેક્નોલોજી મંત્રાલય, ફોરેન ઇન્વેસ્ટમેન્ટ પ્રમોશન બોર્ડ, બેન્કિંગ, મીડિયા અને પબ્લિક રિલેશન્સ પણ સામેલ હતા.
એજન્સીએ જણાવ્યું કે તલવારે વહીવટી અધિકારીઓ, રાજકારણીઓ, મંત્રીઓ અને બીજા અધિકારીઓ સાથે નિકટના સંબંધોનો ફાયદો ઉઠાવ્યો હતો અને યુએઇ, એર અરેબિયા તથા કતાર એરલાઇન્સના ફેવરેબલ એર ટ્રાફિક રાઇટ્સ મેળવ્યા હતા.
એજન્સીએ પોતાના આરોપનામામાં તત્કાલીન નાગરિક ઉડ્ડયન મંત્રી પ્રફુલ્લ પટેલનું નામ આપીને તેમને તલવારના નિકટના મિત્ર ગણાવ્યા હતા. ઇટીએ આ આરોપનામું જોયું છે. તે મુજબ પ્રફુલ્લ પટેલ તલવાર સાથે ‘સામાજિક’ મુલાકાતો કરતા હતા. એજન્સીએ હજુ સુધી પ્રફુલ્લ પટેલને બોલાવ્યા નથી. પરંતુ તેમને પૂછપરછ માટે બોલાવવામાં આવી શકે છે. અહીં એ સ્પષ્ટતા કરવી જરૂરી છે કે ચાર્જશિટમાં પ્રફુલ્લ પટેલનું નામ આરોપી તરીકે નથી.
એજન્સીએ દીપક તલવાર દ્વારા તૈયાર કરવામાં આવેલા કેટલાક ડ્રાફ્ટ લેટર્સ એટેચ કર્યા હતા જે ત્રણ એરલાઇન્સ વતી લખવામાં આવ્યા હતા અને તે પ્રફુલ્લ પટેલ, ડીજીસીએ અને કોન્સ્યુલેટ જનરલ ઓફ ઇન્ડિયાને મોકલાયા હતા તથા તે એરલાઇન્સના લેટરહેડ પર હતા. સૂત્રોએ કહ્યું કે પટેલ અને તલવાર વચ્ચે કોઈ ઇ-મેઇલથી વ્યવહાર થયો નથી.
from Page Array – I Am Gujarat http://bit.ly/2WiwBmI
No comments:
Post a Comment