વર્લ્ડકપમાં ‘ડાર્કહૉર્સ’ સાબિત થઈ શકે છે આ ટીમ, બધાએ રહેવું પડશે સાવધ

વર્લ્ડકપમાં મોટો ઉલટફેર કરી શકે છે વેસ્ટ ઈન્ડીઝ

નવી દિલ્હી: એક સમયે ક્રિકેટની સૌથી ખતરનાક ટીમ તરીકે જાણીતી વેસ્ટ ઈન્ડિઝનું પ્રદર્શન છેલ્લા કેટલાક વર્ષોથી સતત ખરાબ રહ્યું છે. પણ આ વખતે આન્દ્રે રસેલ અને ઘણા અન્ય પાવર હીટર્સની હાજરી તેને ઈંગ્લેન્ડમાં યોજાનારા ક્રિકેટના મહાકુંભમાં ‘છૂપા રુસ્તમ’ બનાવી શકે છે. ‘યૂનિવર્સલ બોસ’ ક્રિસ ગેઈલ ભલે આઈપીએલમાં પોતાના આગવા અંદાજમાં ન દેખાયો હોય પણ રસેલના બેટમાંથી જે રીતે રનોનો ધોધ વહ્યો છે તેનાથી દુનિયાભરના બોલર્સમાં ખળભળાટ મચી ગયો હશે.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

ટીમ પાસે એકથી એક ચડિયાતા પાવર હીટર્સ

કેરેબિયન ટીમ તેના બેટના દમ પર નવી સંજીવની મેળવવાની આશામાં હશે. રસેલ ઉપરાંત કાર્લોસ બ્રેઈથવેટ અને ડેરેન બ્રાવો પણ ટીમમાં શામેલ હશે, જ્યારે યુવા બેટ્સમેન શેમરૉન હેટમાયર પણ વન-ડેમાં 100થી વધુના સ્ટ્રાઈક રેટથી રન બનાવી રહ્યો છે. ઓપનિંગ બેટ્સમેન શાઈ હોપ ટૉપ ઓર્ડરમાં છે અને આ તમામની હાજરીમાં વેસ્ટ ઈન્ડીઝ મોટો ઉલટફેર કરી શકે છે. વેસ્ટ ઈન્ડીઝ ક્રિકેટ બોર્ડ અને ખેલાડી વચ્ચે વળતર વિવાદની અસર ટેસ્ટ અને વન-ડેમાં ઈન્ટરનેશનલ ટીમના રૂપમાં વેસ્ટ ઈન્ડીઝના પ્રદર્શન પર થઈ છે.

ગેઈલ ટીમમાં, પોલાર્ડ, બ્રાવો પણ રમી શકે છે

ગેઈલ, કેરોન પોલાર્ડ અને ડ્વેન બ્રાવો જેવા ખેલાડીઓ ટીમની બહાર પણ રહ્યા. વેસ્ટ ઈન્ડીઝની ટીમે આત્મવિશ્વાસ ગુમાવી દીધો, જે અત્યાર સુધી પરત મેળવી શકી નથી. હવે ગેઈલ ટીમમાં છે, જ્યારે બ્રાવો અને પોલાર્ડ પણ રિઝર્વમાં છે ત્યારે આ વર્લ્ડકપમાં કેરેબિયન ક્રિકેટની દશા અને દિશા બદલાઈ શકે છે. ઈંગ્લેન્ડના નાના મેદાન અને સપાટ પિચો કેરેબિયન બેટ્સમેનોને તેમની પાવરગેમ રમવાની ભરપૂર તક આપશે. જે રીતનું ટેલેન્ટ તેમની પાસે છે, વર્લ્ડ રેંકિંગમાં તે આઠમાથી વધુ સારા સ્થાનના હકદાર છે.

વર્લ્ડ રેંકિંગમાં આઠમા સ્થાને કેરેબિયન ટીમ

બાંગ્લાદેશની ટીમ પણ રેંકિંગમાં તેનાથી ઉપર છે અને 70-80ના દાયકામાં ભયનો પર્યાય બની ચૂકેલી આ ટીમની નીચે માત્ર શ્રીલંકા અને અફઘાનિસ્તાન છે. વેસ્ટ ઈન્ડીઝના સુવર્ણ યુગની શરૂઆત ઈંગ્લેન્ડમાં જ 1975નો વર્લ્ડકપ જીતીને થઈ હતી અને ફરી એકવાર તેની પાસે જૂનું ગૌરવ મેળવવાની તક છે. જોકે, આના માટે આખી ટીમે એક યૂનિટ તરીકે ખૂબ સારું પ્રદર્શન કરવું પડશે.

વેસ્ટ ઈન્ડીઝની વર્લ્ડકપ ટીમ

જેસન હોલ્ડર (કેપ્ટન), ક્રિસ ગેઈલ, કેમાર રોચ, ડેરેન બ્રાવો, આન્દ્રે રસેલ, શાઈ હોપ, શેલ્ડન કોટરેલ, ઈવિન લુઈસ, શેનોન ગેબ્રિએલ, કાર્લોસ બ્રેઈથવેટ, એશ્લે નર્સ, શિમરૉન હેટમાયર, ફેબિયન એલન, ઓશેન થૉમસ, નિકોલસ પૂરન.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2HJpEVG