શૈલેષ મેનન
મુંબઈ:દિલ્હી અને કોલકાતામાં ખાનગી લોકર્સ અને સેફ્ટી વોલ્ટ્સ પર આવકવેરા વિભાગના દરોડાને કારણે લોકર બિઝનેસને મોટો ફટકો પડ્યો છે. અગ્રણી વોલ્ટ પ્રોવાઇડર્સે નો યોર કસ્ટમર (KYC) પ્રક્રિયાને કડક બનાવી છે, પણ કેટલીક નાની કંપનીઓએ તો કાયમી ધોરણે બિઝનેસ બંધ કરી દીધો છે.
મુંબઈની એક વોલ્ટ ફર્મ પણ આગામી છ મહિનામાં બિઝનેસ બંધ કરવાની યોજના ધરાવે છે. તેના પ્રોપ્રાઇટરે જણાવ્યું હતું કે, “તાજેતરના દરોડાને કારણે અમારી પાસે જે થોડોઘણો બિઝનેસ પણ હતો તે છીનવાઈ ગયો છે.” તેમણે વધુમાં જણાવ્યું હતું કે, “નોટબંધી પછી ખાનગી લોકર બિઝનેસ તરત જ પડી ભાંગ્યો હતો. હવે બહુ ઓછા બિઝનેસમેન મોટા પ્રમાણમાં રોકડ રાખે છે. ITના દરોડાએ અમારી સમસ્યામાં ઉમેરો કર્યો છે.”
ચાલુ વર્ષે કોલકાતાના વરદાન માર્કેટમાં આવકવેરા વિભાગે 600 લોકર્સ સાથેની વોલ્ટ સ્પેસ પર દરોડા પાડ્યા હતા. જેમાં કરોડો રૂપિયાનાં ઘરેણાં અને રોકડ મળ્યાં હતાં. છ મહિના પહેલાં દિલ્હીના ચાંદની ચોક વિસ્તારમાં દરોડા પડ્યા હતા. જેમાં આવકવેરા વિભાગને ₹25 કરોડની બિનહિસાબી રોકડ મળી હતી.
બંને વોલ્ટમાં ગ્રાહકોના પૂરતા દસ્તાવેજ (KYC રેકોર્ડ)નો અભાવ હતો. તેને લીધે ટેક્સ વિભાગ માટે લોકરના માલિકને શોધવાનું મુશ્કેલ બન્યું હતું. નવકેતન લોકર્સના ડિરેક્ટર પીયૂષ કે ડાકે જણાવ્યું હતું કે, “મુંબઈમાં પણ કેટલાક વોલ્ટ્સ છે, જે ગ્રાહકોના પૂરતા KYC રેકોર્ડ રાખતા નથી.” નવકેતન લોકર્સ મહારાષ્ટ્ર, ગુજરાત, તેલંગણા સહિત વિવિધ રાજ્યોમાં લોકર સુવિધા આપે છે.
ડાકે વધુમાં જણાવ્યું હતું કે, “અમારા લોકરમાં મુકાયેલી ચીજો કાયદેસરની હોય ત્યાં સુધી અમને વાંધો નથી, પણ તપાસ એજન્સી પૂછપરછ માટે આવે ત્યારે ગ્રાહકનો સંપર્ક થઈ શકે તેમ હોવો જોઈએ. ઉપરાંત, અમારા લોકર્સમાં પડેલી ચીજો અંગે અમને આશંકા હોય તો અમે પોલીસનો સંપર્ક કરીશું.”
વોલ્ટ ઓપરેટર્સના જણાવ્યા અનુસાર નોટબંધી પહેલાં 2016 સુધી ખાનગી સેફકીપિંગ બિઝનેસ તેજીમાં હતો. તેમની સેવાનો ઉપયોગ મહદ્ અંશે નાના બિઝનેસમેન અને વેપારીઓ કરતા હતા. જેમાં જ્વેલર્સ અને હીરાના વેપારીઓનો સમાવેશ થતો હતો. જોકે, નોટબંધી પછી આ ટ્રેન્ડમાં તીવ્ર ઘટાડો નોંધાયો છે.
ધનાઢ્ય પરિવારો હજુ જ્વેલરી, દસ્તાવેજો અને અમુક વખત રોકડ રાખવા ખાનગી લોકર્સનો ઉપયોગ કરે છે. દિલ્હી સેફ ડિપોઝિટ કંપનીના વી કે ગુપ્તાએ જણાવ્યું હતું કે, “ઉદ્યોગના KYC નિયમ કડક કરવા જરૂરી છે. હજુ ઉદ્યોગમાં ઘણા બિનસંગઠિત ખેલાડીઓ છે. કેટલાક વોલ્ટ પ્રોવાઇડર્સ ગ્રાહકોના રેકોર્ડ રાખતા નથી. તેને લીધે સમગ્ર ઉદ્યોગનું નામ ખરાબ થાય છે.” નવકેતન અને દિલ્હી સેફ ડિપોઝિટ કંપની જેવા અગ્રણી સર્વિસ પ્રોવાઇડર્સ ગ્રાહક તરીકે વધુ કોર્પોરેટ્સને સામેલ કરી રહ્યા છે.
from Page Array – I Am Gujarat http://bit.ly/2VZabtP
No comments:
Post a Comment