HCL ટેક્‌નો ચોખ્ખો નફો 14% વધ્યો: FY20માં 14-16% આવકવૃદ્ધિનું ગાઇડન્સ

69263917

નવી દિલ્હી:HCL ટેક્‌નોલોજિસે ભારતની ત્રીજી સૌથી મોટી IT સર્વિસિસ કંપની તરીકેનું સ્થાન મજબૂત બનાવ્યું છે. વિવિધ એક્વિઝિશનની મદદથી કંપનીએ 2018-’19માં સૌથી ઝડપી આવકવૃદ્ધિ દર્શાવી વિપ્રો પર સરસાઈ મેળવી છે. HCL ટેકે FY19માં 11.8 ટકાની વૃદ્ધિ સાથે 8.63 અબજ ડોલરની આવક મેળવી છે. સમાન ગાળામાં વિપ્રોના IT સર્વિસિસ બિઝનેસની આવક 8.12 અબજ ડોલર હતી.

કંપનીએ ચોથા ક્વાર્ટરમાં 14.3 ટકાની વૃદ્ધિ સાથે ₹2,550 કરોડનો કોન્સોલિડેટેડ ચોખ્ખો નફો કર્યો છે. અગાઉના વર્ષના સમાન ગાળામાં કંપનીનો નફો ₹2,230 કરોડ હતો. જાન્યુઆરી-માર્ચ ક્વાર્ટરમાં કંપનીની આવક 21.3 ટકા વધીને ₹15,990 કરોડ થઈ છે, જે અગાઉના વર્ષના સમાન ગાળામાં ₹13,178 કરોડ હતી. ઉલ્લેખનીય છે કે, વિપ્રોએ છેલ્લા કેટલાક વર્ષથી અંડરપરફોર્મન્સ દર્શાવી રહેલા બિઝનેસનું રિસ્ટ્રક્ચરિંગ હાથ ધર્યું છે. તેને ટર્નએરાઉન્ડ માટે હજુ થોડા વધુ ક્વાર્ટરની જરૂર પડશે.

HCL ટેકે 2019-’20માં કોન્સ્ટન્ટ કરન્સીના આધારે 14-16 ટકાની આવકવૃદ્ધિનું ગાઇડન્સ આપ્યું છે, જે તેને 10 અબજ ડોલરનો આંકડો હાંસલ કરવામાં મદદ કરશે. કંપનીની આવકવૃદ્ધિમાં નિયમિત બિઝનેસનું યોગદાન 7-9 ટકા રહેવાનો અંદાજ છે. જ્યારે એક્વિઝિશન્સનો એકંદર આવકવૃદ્ધિમાં હિસ્સો 7 ટકા હશે. HCL ટેક્‌ના પ્રેસિડન્ટ અને સીઇઓ સી વિજયકુમારે જણાવ્યું હતું કે, “અમે ચાલુ વર્ષે ત્રીજી વખત ઓર્ડર બૂકિંગમાં નવો રેકોર્ડ બનાવ્યો છે. પરિણામ અમારી માર્કેટ સ્ટ્રેટેજીની સફળતા દર્શાવે છે.”

HCL ટેકે 2018-’19માં 16 ટકાની વૃદ્ધિ સાથે ₹10,120 કરોડનો ચોખ્ખો નફો કર્યો છે. કંપનીની આવક 19.4 ટકા વધીને ₹60,427 કરોડ થઈ છે. 2018-’19માં કંપનીની આવકમાં કોન્સ્ટન્ટ કરન્સીની રીતે 11.8 ટકા વધારો નોંધાયો છે.

કંપનીએ 2018-’19 માટે કોન્સ્ટન્ટ કરન્સીની રીતે 9.5-11.5 ટકાનું ગાઇડન્સ આપ્યું હતું. ડોલરમાં કંપનીએ જાન્યુઆરી-માર્ચ ક્વાર્ટરમાં 5.9 ટકા વૃદ્ધિ સાથે 36.43 કરોડનો ચોખ્ખો નફો કર્યો છે. કંપનીની આવક 11.8 ટકા વધીને 2.2 અબજ ડોલર થઈ છે. કંપનીના બોર્ડે શેર દીઠ ₹2નું વચગાળાનું ડિવિડન્ડ આપ્યું છે. ઉલ્લેખનીય છે કે, HCL ટેકે ડિસેમ્બરમાં IBMની આઠ સોફ્ટવેર પ્રોડક્ટ્સ 1.78 અબજ ડોલરમાં ખરીદી હતી.

HCL ટેકે ચોથા ક્વાર્ટરમાં કુલ 14,249 કર્મચારીનો ઉમેરો કર્યો છે. આ સાથે કંપનીના કર્મચારીઓની કુલ સંખ્યા 1,37,965 થઈ છે. છેલ્લા 12 મહિનામાં IT સર્વિસિસ બિઝનેસમાં એટ્રિશન 17.7 ટકા રહ્યું છે. કંપનીનું પરિણામ બજાર બંધ થયા પછી જાહેર કરાયું હતું. HCL ટેક્‌નો શેર ખાસ વધઘટ વગર ₹1,132.10ના મથાળે બંધ રહ્યો હતો.

from Page Array – I Am Gujarat http://bit.ly/2HccGj6