HRITHIKના માર્કેટ-કેપમાં વર્ષમાં ₹11 લાખ કરોડની વૃદ્ધિ

69125899

ભાર્ગવ ત્રિવેદી

અમદાવાદ:ભારતીય શેરબજાર સ્પષ્ટપણે બે ભાગમાં વહેંચાયેલું જોવા મળે છે. જેમાં એક બાજુ સાત લાર્જ-કેપ્સ છે અને બીજી બાજુ સમગ્ર બજારનો સમાવેશ થાય છે. આવું એટલી હદે છે કે છેલ્લાં એક વર્ષની વાત કરીએ તો બજાર જેને છેલ્લા કેટલાક મહિનાઓથી ઋતિક (HRITHIK) ફેક્ટર તરીકે ઓળખે છે તેના માર્કેટ-કેપમાં ₹11 લાખ કરોડનો તીવ્ર વધારો થયો છે.

જ્યારે બીજી બાજુ બીએસઇના માર્કેટ-કેપમાં ₹24 હજાર કરોડનો ઘટાડો નોંધાયો છે. ટોચની સાત કંપનીઓ – એચડીએફસી, રિલાયન્સ, ICICI, TCS, HIL, ઇન્ફોસિસ અને કોટક બેન્કના સમૂહને HRITHIK કહે છે. એક્સ્ચેન્જનું માર્કેટ-કેપ મુખ્યત્વે મિડ-કેપ્સ અને સ્મોલ-કેપ્સમાં સતત વેચવાલીને કારણે ઘટ્યું છે. હાલમાં આ તમામ HRITHIK શેર્સ તેમની વાર્ષિક ટોચ નજીક ટ્રેડ થઈ રહ્યા છે.

મંગળવારે બંધ ભાવે HRITHIK શેર્સનું માર્કેટ-કેપ એક વર્ષ અગાઉના તેમના માર્કેટ-કેપ કરતાં ₹11 લાખ કરોડની વૃદ્ધિ સૂચવતું હતું. આમાં સૌથી વધુ વૃદ્ધિ રિલાયન્સ ઇન્ડસ્ટ્રીઝના કારણે જોવા મળે છે. હાલમાં દેશમાં ₹8.82 લાખ કરોડના માર્કેટ-કેપ સાથે રિલાયન્સ ઇન્ડ સૌથી ઊંચું માર્કેટ-કેપ ધરાવે છે. તેણે છેલ્લા એક વર્ષમાં ₹4.11 કરોડની વૃદ્ધિ નોંધાવી છે. આમ HRITHIK શેર્સના 11 લાખ કરોડના માર્કેટ-કેપ વૃદ્ધિમાંથી ₹4 લાખથી વધુનું યોગદાન રિલાયન્સ ઇન્ડ તરફથી છે.

માર્કેટ-કેપમાં અન્ય HRITHIK કંપનીઓના યોગદાનની વાત કરીએ તો ટીસીએસ (₹2.81 લાખ કરોડ), આઇસીઆઇસીઆઇ બેંક (₹1.21 લાખ કરોડ), ઇન્ફોસિસ (₹94 હજાર કરોડ), એચડીએફસી બેંક (₹90 હજાર કરોડ) અને કોટક બેંક (₹38 હજાર કરોડ)નો સમાવેશ થાય છે. રિલાયન્સ ઇન્ડ બાદ ટીસીએસ અન્ય કંપની છે જેનું માર્કેટ-કેપ ₹8 લાખ કરોડથી ઉપર છે.

આમ બંને કંપનીઓ 100 અબજ ડોલરના માર્કેટ-કેપ ક્લબમાં સ્થાન ધરાવે છે. HRITHIK શેર્સમાં માર્કેટ-કેપની રીતે ત્રીજા ક્રમે એચડીએફસી બેંક આવે છે. ખાનગી ક્ષેત્રની સૌથી મોટી બેંકનું માર્કેટ-કેપ મંગળવારે ₹6.31 લાખ કરોડ હતું. જે દેશની અન્ય બે મોટી બેંક એસબીઆઇ અને આઇસીઆઇસીઆઇ બેંકના સંયુક્ત માર્કેટ-કેપથી પણ વધુ છે.

એક બાજુ HRITHIK કંપનીઓનું માર્કેટ-કેપ ગગનચુંબી રહ્યું છે ત્યારે બીએસઇનું માર્કેટ-કેપ વાર્ષિક ધોરણે ઘટાડો દર્શાવે છે. 30 એપ્રિલ 2018ના રોજ ₹1,52,79,535 કરોડ પર જોવા મળતું એક્સચેન્જનું માર્કેટ-કેપ મંગળવારે ₹24,113 કરોડના ઘટાડા સાથે ₹1,52,55,433 કરોડના સ્તર પર નોંધાયું હતું.
ઉલ્લેખનીય છે કે બેંચમાર્ક્સ જ્યારે ચાલુ કેલેન્ડરમાં 7 ટકાનો સુધારો દર્શાવી રહ્યા છે ત્યારે મિડ-કેપ્સ અને સ્મોલ-કેપ્સમાં કોઈ સુધારો નથી નોંધાયો. વાર્ષિક ધોરણે મિડ-કેપ ઇન્ડેક્સ 17 ટકા જેટલો ઘટાડો દર્શાવી રહ્યો છે.

from Page Array – I Am Gujarat http://bit.ly/2Y20rMP