મુંબઈ:નેશનલ સ્ટોક એક્સચેન્જ (એનએસઇ)એ 31 માર્ચ 2019ના રોજ પૂરા થયેલા ત્રિમાસિક સમયગાળા માટે વિવિધ લિસ્ટિંગ નિયમોનું પાલન નહીં કરવા બદલ આશરે 250 કંપનીને દંડ કર્યો છે. આ કંપનીઓમાં ઇન્ડિયન ઓઇલ, એચપીસીએલ, બીપીસીએલ, પાવર ગ્રિડ કોર્પોરેશન, કન્ટેનર કોર્પોરેશન, એનએમડીસી, પાવર ફાઇનાન્સ, ભેલ, એનએચપીસી, ઓઇલ ઇન્ડિયાનો સમાવેશ થાય છે.
આ કંપનીઓને ₹1,000થી માંડીને ₹4.5 લાખ સુધીનો દંડ કરવામાં આવ્યો છે. બોર્ડ ઓફ ડિરેક્ટર્સની રચનાને લગતાં LODR નિયમનોની કલમ 17નો ભંગ કરવા બદલ 31 કંપનીઓને ₹4.5 લાખનો દંડ કરવામાં આવ્યો છે. લિસ્ટિંગ નિયમોનો ભંગ કરનારી અન્ય કંપનીઓમાં અદાણી પોર્ટ્સ, ઇન્ટરગ્લોબ એવિએશન, ભારતી ઇન્ફ્રાટેલ, જિન્દાલ સ્ટીલ, મણપ્પુરમ્ ફાઇનાન્સ, ફોર્ટિસ હેલ્થકેર અને અરવિંદ ફેશનનો સમાવેશ થાય છે.
એનએસઇએ પરિપત્રમાં જણાવ્યું હતું કે, 31 માર્ચ 2019 ક્વાર્ટર માટે તમામ લિસ્ટેડ કંપનીઓના કોમ્પ્લાયન્સનું મોનિટરિંગ કર્યા પછી દંડ લાદવામાં આવ્યો છે અને નિયમોનું પાલન નહીં કરનારી કંપનીઓને નોટિસ જારી કરવામાં આવી હતી. એનએસઇના પરિપત્ર પ્રમાણે દંડની રકમને સ્ટોક એક્સચેન્જના ‘ઇન્વેસ્ટર પ્રોટેક્શન ફન્ડ’માં જમા કરાવવામાં આવશે.
સેબીના નિયમો પ્રમાણે, લિસ્ટેડ કંપનીઓ લિસ્ટિંગ નિયમોનું પાલન કરવામાં નિષ્ફળ જાય અથવા તો નિર્ધારિત સમયમર્યાદામાં દંડ ન ચૂકવે તો એક્સચેન્જ પ્રતિ દિન દંડ લાદી શકે છે અને પ્રમોટરનું હોલ્ડિંગ સ્થગિત કરી શકે છે. જો સતત બે ક્વાર્ટર સુધી નિયમોનું પાલન કરવામાં નિષ્ફળ જાય તો એક્સચેન્જ એ કંપનીના શેરના ટ્રેડિંગને ‘ટ્રેડ ફોર ટ્રેડ’ સેગમેન્ટમાં નાખી શકે છે અને સમય જતાં એ કંપનીઓનાં ટ્રેડિંગને સસ્પેન્ડ પણ કરી શકે છે.
from Page Array – I Am Gujarat http://bit.ly/2WLxl3T
No comments:
Post a Comment