મૂવી રિવ્યૂ : જાણો કેવી છે PM મોદી પર બનેલી ફિલ્મ

આખરે રિલીઝ થઈ ‘PM નરેન્દ્ર મોદી’

‘જીતવાની મજા ત્યારે આવે છે જ્યારે તમે હારવાની આશા રાખો છો!’ ફિલ્મ ‘PM નરેન્દ્ર મોદી’નો આ ડાયલૉગ ફિલ્મની આખી વાર્તા કહી દે છે. બે મહિનાથી પણ ઓછા સમયમાં તૈયાર થયેલી આ ફિલ્મ આમ તો 11 એપ્રિલના રોજ રિલીઝ થવાની હતી પણ વિપક્ષી પાર્ટિઓના વિરોધને કારણે ચૂંટણીપંચે આચારસંહિત દરમિયાન તેની રિલીઝ પર રોક લગાવી દીધી હતી. આખરે હવે આ ફિલ્મ રિલીઝ થઈ રહી છે. લોકસભા ચૂંટણીમાં 23 મેના રોજ મોદીની બમ્પर જીત થઈ, પણ ફિલ્મના નિર્માતાઓએ પહેલેથી જ પોતાની ફિલ્મનો પોસ્ટરો પર નરેન્દ્ર મોદીની વાપસીની ભવિષ્યવાણી કરી દીધી હતી.

ફિલ્મની સ્ટોરી

નરેન્દ્ર મોદીના બાળપણથ લઈને વડાપ્રધાન બનવા સુધીની વાર્તા કહેતી આ ફિલ્મની શરૂઆત 2013ની ભાજપની તે બેઠકથી થાય છે, જેમાં નરેન્દ્ર મોદી (વિવેક ઓબેરૉય)ને વડાપ્રધાનના ઉમેદવાર જાહેર કરવામાં આવે છે. ત્યારબાદ ફિલ્મ ફ્લેશબેકમાં ચાલી જાય છે, જ્યારે મોદી રેલવે સ્ટેશન પર ચા વેચતા હતા. મોદીના પિતા ચાની દુકાન ચલવતા હતા અને માતા ઘરમાં વાસણ માંજતા હતા. થોડા મોટા થયા બાદ નરેન્દ્રએ પોતાના ઘરવાળાઓ પાસે સન્યાસની પરવાનગી માગી ત્યારે ઘરવાળાઓએ તેમને લગ્નના બંધનમાં બાંધવાનું વિચાર્યું. પણ નરેન્દ્રએ લગ્ન પહેલા જ ઘર છોડી દીધું. હિમાલયના પર્વતોમાં પોતાના જીવનનો ઉદ્દેશ્ય શોધવા માટે નરેન્દ્રએ RSS વર્કર તરીકે ગુજરાતમાં વાપસી કરી અને પછી પાછા વળીને ક્યારેય ન જોયું.

રિવ્યૂ

મોદીએ કેવી રીતે ગુજરાતના મુખ્યમંત્રીથી લઈને ભારતના વડાપ્રધાનની ખુરશી મેળવી? આ જાણવા માટે તમારે થિયેટર્સમાં જવું પડશે. ખાસ કરીને ફિલ્મમાં મોદી સાથે જોડાયેલા ચા વેચવાળો, લગ્ન, ગુજરાતના રમખાણ અને તેમની જિંદગી સાથે જોડાયેલા તમામ અન્ય સવાલોના જવાબ આપવાના પ્રયત્ન કરાયા છે. બીજી તરફ ફિલ્મ મોદીની જિંદગીના ઘણા અજાણ્યા પાસાઓથી પણ રૂબરુ કરાવે છે. ફિલ્મને સત્યઘટનાઓથી પ્રેરિત કહેવામાં આવી રહી છે, પણ વિવાદોથી બચવા માટે શરૂઆતમાં લાંબુ-પહોળું ડિસ્ક્લેઈમર આપવામાં આવ્યું છે.

ડિરેક્શન અને સ્ક્રીનપ્લે

ફિલ્મની વાર્તા તેના ક્રિએટિવ પ્રોડ્યૂસર સંદીપ સિંહે લખી છે તો ડાયલૉગ્સ અને સ્ક્રીનપ્લેમાં વિવેક ઓબેરૉયને પણ ક્રેડિટ મળી છે, માત્ર સવા બે કલાકની આ સ્ટોરીમાં મોદીના ચિતપરિચિત અંદાજને સમેટવામાં આવ્યો છે. ફર્સ્ટ હાફમાં ફિલ્મની વાર્તા મોદીના બાળપણથી ગુજરાતના કોમી રમખાણો સુધી જાય છે, તો સેકન્ડ હાફમાં તેમના ભારતના વડાપ્રધાન બનવાની સફર દેખાડવામાં આવી છે. ફિલ્મના કેટલાક ડૉક્યૂમેન્ટ્રી સીન્સ જેવા સીન્સને છોડી દેવામાં આવે તો સમગ્ર ફિલ્મ તમને બાંધીને રાખે છે. ‘મેરી કૉમ’ અને ‘સરબજીત’ જેવી બાયોપિક ફિલ્મો બનાવી ચૂકેલા ઉમંગ કુમારે વડાપ્રધાન મોદી પર શાનદાર ફિલ્મ બનાવી છે.

વિવેક-મનોજની એક્ટિંગ પ્રશંસનીય

બીજી તરફ ફિલ્મમાં વિવેકે પણ મોદીના રોલમાં સારી એક્ટિંગ કરી છે. વહેલી સવારે 2 વાગ્યે ઉઠીને પ્રોસ્થેટિક મેકઅપ કરાવનારો વિવેક મહદઅંશે મોદીનો લુક અપનાવવામાં સફળ રહ્યો છે. તેણે મોદીના અવાજને કૉપી કરવાના પણ સંપૂર્ણ પ્રયત્ન કર્યા છે. બીજી તરફ અમિત શાહના રોલમાં મનોજ જોશી પણ ફિટ બેસી રહ્યાં છે. ફિલ્મના ડાયલૉગ જોરદાર છે અને સ્ક્રીપ્ટ તથા સ્ક્રીનપ્લે પણ કસેલા છે. ફિલ્મના લોકેશન્સ સુંદર દેખાઈ રહ્યાં છે. ખાસ કરીને હિમાલયમાં ફિલ્માવવામાં આવેલા સીન્સની સિનેમેટોગ્રાફી જબરદસ્ત છે. ફિલ્મનું સંગીત સ્ટોરીને ગતિ આપે છે, બેકગ્રાઉન્ડ સ્કોર પણ ઘણો સારો છે.

from Entertainment News in Gujarati: Latest Entertainment News, Read Breaking Entertainment News – Page Array – I Am Gujarat http://bit.ly/2M8Bn5x