એન્જિનિયરિંગનો ક્રેઝ ઘટ્યો? રાજ્યમાં 65,000 હજારમાંથી અડધોઅડધ બેઠકો ખાલી રહી

અમદાવાદ: હવે એન્જિનિયરિંગની ડિમાન્ડ ઘટી રહી છે. નોકરીની પૂરતી તકોના અભાવે વિદ્યાર્થીઓ એન્જિનિયરિંગમાં એડમિશન લેવાનું ટાળી રહ્યા છે. આ વર્ષના આંકડા આ વાતની ચાડી ખાય છે. ડિગ્રી એન્જિનિયરિંગ કોર્સ માટે પહેલા રાઉન્ડમાં બેઠકોની ફાળવણી બાદ દર બીજી સીટ ખાલી રહી. એડમિશન કમિટી ફોર પ્રોફેશનલ કોર્સિઝ પાસેની કુલ 65,212માંથી 35,460 બેઠકો ખાલી રહી. એડમિશન લેવા માટે વિદ્યાર્થીઓમાં કમ્પ્યૂટર પસંદગીમાં ટોચના સ્થાને રહ્યું. ત્યારબાદ ઈન્ફર્મેશન ટેક્નોલોજી અને ઈન્ફર્મેશન એન્ડ કમ્યુનિકેશન ટેક્નોલોજી વિદ્યાર્થીઓમાં મનપસંદ રહ્યા. સતત ત્રીજા વર્ષે કમ્પ્યૂટર ટેક્નોલોજી વિદ્યાર્થીઓની પ્રથમ પસંદગી બન્યું છે. અગાઉ એડમિશન માટે વિદ્યાર્થીઓની પહેલી ચોઈસ રહેતી મિકેનિકલ એન્જિનિયરિંગ બ્રાન્ચ આ વખતે ચોથા સ્થાની રહી.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

રાજ્યમાં કુલ 137 એન્જિનિયરિંગ કોલેજમાંથી માત્ર 17 કોલેજો 100% બેઠકો ભરવામાં સફળ રહી. ત્રણ કોલેજો એવી છે જેને એકપણ વિદ્યાર્થી ના મળ્યો. 34 કોલેજો માત્ર 10% બેઠકો ભરી શકી. 19 કોલેજોમાં માત્ર 10%-25% બેઠકો ભરાઈ અને 35 કોલેજો તેમની કુલ બેઠકોની 26%-50% સીટ ભરવામાં સફળ થઈ. ACPCના અધિકારીઓએ કહ્યું, કુલ 33,271 વિદ્યાર્થીઓના નામ મેરિટ લિસ્ટમાં હતા. તેમાંથી 31,436એ ચોઈસ ફિલિંગ કર્યું. 29,753 વિદ્યાર્થીઓને ડિગ્રી એન્જિનિયરિંગ કોર્સના પહેલા વર્ષમાં એડમિશન મળ્યું. 1683 વિદ્યાર્થીઓના માર્ક્સ તેમની પહેલી પસંદગીની કોલેજ સાથે અનુરૂપ ના થતાં એડમિશન ન મળ્યું.

મેરિટ લિસ્ટ ટોપર માણેક નિધિએ ધીરુભાઈ અંબાણી ઈન્સ્ટીટ્યૂટ ઓફ ઈન્ફર્મેશન એન્ડ કમ્યુનિકેશન ટેક્નોલોજીમાં એડમિશન લીધું. અધિકારીઓના જણાવ્યા પ્રમાણે, સરકારી અને ગ્રાન્ટ-ઈન-એઈડ એન્જિનિયરિંગ કોલેજોની 13,479 બેઠકોમાંથી 11,295 સીટ ભરાઈ. આ કોલેજોમાં કુલ 2,184 બેઠકો ખાલી રહી. સેલ્ફ ફાઈનાન્સ કોલેજોની ACPC પાસે રહેલી 51,733 સીટોમાંથી 32,276 સીટો ખાલી રહી.

પહેલા રાઉન્ડમાં જે વિદ્યાર્થીઓનું નામ આવી ગયું છે તેઓ હવે ACPCની વેબસાઈટ પરથી ઈન્ફર્મેશન લેટર અને બેંક ચલણ લઈને ટોકન ફી ભરીને એડમિશન સુનિશ્ચિત કરી શકે છે. આ વખતે પહેલીવાર એડમિશન કમિટીએ આર્થિક પછાત વર્ગ (EWS)ના વિદ્યાર્થીઓ માટે બેઠકો અનામત રાખી છે. કુલ 6,164 સીટમાંથી 1,818 બેઠકો વિદ્યાર્થીઓને ફાળવાઈ છે, જ્યારે બાકીની ખાલી રહી.

from Page Array – I Am Gujarat https://ift.tt/2YjUhIk