મૃત પિતાને રોજ મેસેજ મોકલતી હતી દીકરી, પિતાની ચોથી વરસી પર આવ્યો રિપ્લાય

અમેરિકાના અર્કાંસસમાં રહેતી એક મહિલાના પિતાનું 4 વર્ષ પહેલા મોત થયું હતું. પોતાના પિતાને ગુમાવવાનું દુઃખ સૌને હોય છે અને દુઃખનો સામનો પણ પોતાની રીતે કરે છે. છેલ્લા 4 વર્ષથી 23 વર્ષની ચેસ્ટટી પેટરસન પોતાના પિતાને રોજ યાદ કરતી હતી અને તેના મોબાઈલ નંબર પર મેસેજ મોકલતી હતી. મેસેજમાં ચેસ્ટટી રોજ પિતાના જીવનમાં શું નવું થયું તે વિશે અપડેટ મોકલતી હતી. જો કે, 4 વર્ષ બાદ પિતાના મોબાઈલ નંબર પરથી રિપ્લાય આવ્યો.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

એ દિવસે પિતાની ચોથી વરસી હતી

ગયા ગુરુવારે ચેસ્ટટીના પિતાની ચોથી વરસી હતી. આ દિવસે પણ તેણે રોજની જેમ મૃત પિતાના મોબાઈલ નંબર પર મેસેજ મોકલ્યો હતો. મેસેજમાં તેણે લખ્યું, “પપ્પા, આવતીકાલનો દિવસ મુશ્કેલ રહેવાનો છે. હું તમને ખૂબ પ્રેમ કરું છું. ચાર વર્ષ થઈ ગયા અને કદાચ જ કોઈ દિવસ એવો હશે જ્યારે મેં તમને યાદ નહીં કર્યા હોય. મને માફ કરજો, જ્યારે તમને મારી જરૂર હતી ત્યારે હું તમારી પાસે નહોતી.”

ચેસ્ટટીએ મેસેજમાં પોતાના ગ્રેજ્યુએશનથી માંડીને કેન્સરને માત આપવા સુધીની વાતનો ઉલ્લેખ કર્યો હતો. જો કે, આ વખતે પિતાના નંબર પરથી રિપ્લાય આવ્યો. આ ચોંકાવનારી વાત હતી. ચેસ્ટટીને મેસેજ આવ્યો તેમાં લખ્યું હતું, “મારું નામ બ્રેડ છે અને 2014માં એક કાર એક્સિડન્ટમાં મારી દીકરીનું મોત થયું હતું. તારે મોકલેલા મેસેજે મને જીવતો રાખ્યો છે. જ્યારે પણ તારો મેસેજ આવતો ત્યારે મને લાગતું કે આ ભગવાને મોકલેલો સંદેશો છે.”

મેસેજમાં બ્રેડે આગળ લખ્યું, “હું વર્ષોથી તારા મેસેજ વાંચી રહ્યો છું. મેં તને આગળ વધતા જોઈ છે. હું ઘણા સમયથી તને મેસેજ કરવા માગતો હતો પરંતુ હું તારું દિલ તોડવા માગતો નહોતો. જો આજે મારી દીકરી જીવતી હોત તો કદાચ તારા જેવી જ હોત. તારા જીવનમાં રોજ શું થાય છે તે જણાવવા માટે આભાર.”

ચેસ્ટટીએ મેસેજના સ્ક્રીનશોટ ફેસબુક પર શેર કર્યા છે. આ ગજબનો સંયોગ કહી શકાય કે એક તરફ મૃત પિતાને મોકલેલા મેસેજ દીકરીને મનોબળ આપતા હતા અને બીજી તરફ દીકરી ગુમવનારા પિતાને હિંમત મળતી હતી. માહિતી મુજબ, ચેસ્ટટી અને બ્રેડ હવે રોજ એકબીજા સાથે વાત કરે છે. ચેસ્ટટીએ 25 ઓક્ટોબરે આ પોસ્ટ શેર કરી હતી. ખબર લખાઈ ત્યાં સુધીમાં ફેસબુક પર 281K શેર મળી ચૂક્યા છે. 148K યૂઝર્સે રિએક્શન આપ્યા છે. જ્યારે 19 હજારથી વધુ કોમેન્ટ પોસ્ટ પર આવી છે. યૂઝર્સ ભાવુક થઈ રહ્યા છે અને ચેસ્ટટી-બ્રેડને હિંમત આપી રહ્યા છે.

from Page Array – I Am Gujarat https://ift.tt/2PqfFde