દિવાળી તો ગઈ પણ ક્રિસમસ સુરતના હીરા માર્કેટ માટે ખુશખબર લઈ આવશે

સુરતઃ વિશ્વનો સૌથી મોટો હીરા ઉદ્યોગ ધરાવતા સુરતમાં દિવાળી તો મંદીના ઓછાયા હેઠળ ગઈ પરંતુ હવે અગ્રણી વૈશ્વિક કન્સલ્ટન્સી કંપની ડીલોઈટ દ્વારા કરવામાં આવેલી આગાહી હીરાઘસુઓના ચહેરા પર સ્મિત લાવી છે. ડીલોઈટ દ્વારા કરવામાં આવેલી આગાહી મુજબ આગામી ક્રિસમસના તહેવારોને લઈને અમેરિકામાં હીરા જડીત આભૂષોની માગમાં જબરજસ્ત વધારો થવાની શક્યતા છે. એકલા અમેરિકામાં જ ઈ-કોમર્સ દ્વારા આવી જ્વેલરીનું વેચાણ આગામી સમયમાં 18% વધે તેવી શક્યતા વચ્ચે ક્રિસમસના તહેવારો દરમિયાન 5% વધારો જોવા મળી શકે છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

યુએસ સ્થિત રેપાપોર્ટ ગ્રુપના જણાવ્યા મજુબ, ડીલોઇટ દ્વારા કરવામાં આવેલ આગાહી વર્ષ 2018ના આંકડાની તુલનાએ ઈકોમર્સમાં વેચાણ 11% વધીને 149 અબજ થવાનું જણાવે છે. હીરા ઉદ્યોગના સૂત્રોએ જણાવ્યું કે હીરા અને હીરાથી જડેલા ઝવેરાતની નિકાસ માટે યુએસ સૌથી મોટું બજાર છે.

ત્યારે USના માર્કેટમાં ગ્રાહકો દ્વાર કરવામાં આવતા ખર્ચમાં થોડાઘણા પણ પોઝીટિવ ફેરફાર સ્થાનિક નિકાસકારો માટે ખૂબ મોટો ફાયદો લઈ આવે છે. જેથી હીરા ઉદ્યોગ આ સમયગાળા દરમિયાન વેપારમાં 15-20% વૃદ્ધિની અપેક્ષા રાખી રહ્યો છે.

સુરત ડાયમંડ એસોસિએશન(SDA)ના પ્રમુખ બાબુ કથીરિયાએ જણાવ્યું હતું કે, “અમે લાંબા સમયથી બજાર સુધારો આવે તેની રાહ જોઈ રહ્યા હતા. યુ.એસ. સૌથી મોટું બજાર હોવાથી, અમને આશા છે કે ક્રિસમસ દરમિયાન હીરાની નિકાસમાં 15% – 20%નો વધારો થશે. જેથી ડિસેમ્બર સુધીમાં ડાયમંડ માર્કેટમાં થોડી રિકવરી થવી જોઈએ.”

ડાયમંડ ઉદ્યોગના એનાલિસ્ટ અનિરુદ્ધ લિબિડે કહ્યું, “યુએસ-ચીન વેપાર યુદ્ધને કારણે ભારતીય ડાયમંડ અને જ્વેલરી ઉદ્યોગનો સીધો ફાયદો મળશે. ચીની પ્રોડક્ટ્સ પર આકરી આયાત ડ્યૂટી છે, જ્યારે ભારત હજી પણ તમામ ડ્યૂટી લાભો ભોગવે છે. હીરા ઉદ્યોગ માટે ક્રિસમસમાં ખૂબ સારી તક છે.’

from Page Array – I Am Gujarat https://ift.tt/2WheG0j