સવંત 2075: સોનાના રોકાણકારો માટે છેલ્લાં આઠ વર્ષમાં શ્રેષ્ઠ વર્ષ રહ્યું

71754827

ભાર્ગવ ત્રિવેદી

અમદાવાદ:સોનાના રોકાણકારો માટે સંવત 2075 બમ્પર ફાયદાકારક પુરવાર થયું છે. પૂર્ણ થવા જઈ રહેલા સંવતમાં પીળી ધાતુએ 20 ટકાથી વધુ રિટર્ન આપ્યું છે જે છેલ્લાં આઠ સંવતમાં સૌથી ઊંચું છે. જ્યારે છેલ્લાં 11 વર્ષમાં તે ચોથા ક્રમે આવે છે. ઇટીએ એમસીએક્સના ભાવની કરેલી સમીક્ષા પ્રમાણે, સંવતની શરૂઆતમાં સોનાના ભાવ ₹31,589 પ્રતિ 10 ગ્રામના ભાવે ટ્રેડ થઈ રહ્યા હતા.

ગુરુવારે સંવત પૂરું થવામાં ત્રણ દિવસ બાકી છે ત્યારે ભાવ ₹38,060ના સ્તર પર હતા. સંવત દરમિયાન સોનાનો ભાવ ₹40,000ની તેની સર્વોચ્ચ સપાટીને પાર કરી ગયો હતો અને છેલ્લા દોઢેક મહિનાથી તે સાંકડી રેન્જમાં અથડાઈ રહ્યા છે. જોકે સોનાને લઈને એનાલિસ્ટ્સ તેજીનો મત ધરાવે છે અને નવા સંવતમાં તે વર્તમાન સપાટીથી 10 ટકા જેટલું રિટર્ન આપે તેવી શક્યતા પણ વ્યક્ત કરે છે.

“વૈશ્વિક સ્તરે આર્થિક વૃદ્ધિદરમાં ઘટાડાની વ્યક્ત થઈ રહેલી શક્યતાઓને જોતાં તમામ એસેટ ક્લાસિસમાં સોનું ઊંચું આકર્ષણ ધરાવે છે. યુએસ ફેડ રિઝર્વ તરફથી રેટ કટની ઊંચી શક્યતાના કારણે સોનામાં ખરીદી ચાલુ રહેવાની સંભાવના છે.” એમ કોમોડિટીઝ એન્ડ કરન્સિઝના ડેપ્યુટી વાઇસ પ્રેસિડન્ટ(રિસર્ચ) અનુજ ગુપ્તા જણાવે છે.

તેમણે કહ્યું કે, સોનું ₹44,500ની સપાટી સુધી સુધારો દર્શાવી શકે છે. જ્યારે વૈશ્વિક બજારમાં સોનું 1,750 ડોલર પ્રતિ ટ્રોય ઔંસ પર જઈ શકે છે. બજારમાં કેલેન્ડર 2012માં સોનું 1,900 ડોલરની સર્વોચ્ચ સપાટી પર પહોંચ્યું હતું. જોકે ત્યાર બાદ તેમાં કરેક્શન આવ્યું હતું. ચાલુ સંવતમાં તેણે 6 વર્ષ બાદ 1,500 ડોલરની સપાટી વટાવી હતી અને 1,545 ડોલરની ટોચ દર્શાવી હતી.

છેલ્લાં આઠમાંથી ચાર સંવત દરમિયાન માર્કેટે નેગેટિવ રિટર્ન દર્શાવ્યું હતું, જ્યારે ચારમાં પોઝિટિવ રિટર્ન મળ્યું હતું. તેમાં 2072માં તેણે 18 ટકા રિટર્ન નોંધાવ્યું હતું. જ્યારે 2068માં 15 ટકા અને 2074માં 6.84 ટકા વળતર આપ્યું હતું. સંવત 2070 (-9 ટકા) અને 2071 (-6 ટકા)માં નેગેટિવ રિટર્ન હતું. છેલ્લાં 11 સંવતની વાત કરીએ તો સંવત 2065થી 2068 સુધી સતત ચાર વર્ષો દરમિયાન તેણે સતત ઉત્કૃષ્ટ દેખાવ દર્શાવ્યો હતો. જેમાં 2067માં 38.58 ટકા અને 2065માં 32.46 ટકા જેટલું ઊંચું વળતર આપ્યું હતું. 2066માં પણ 25.53 ટકાનું રિટર્ન આપ્યું હતું.

અમદાવાદ સ્થિત ટ્રેડબુલ્સ સિક્યોરિટીઝના સિનિયર કોમોડિટી એનાલિસ્ટ ભાવિક પટેલના જણાવ્યા પ્રમાણે વૈશ્વિક ડેટ માર્કેટમાં નેગેટિવ યીલ્ડ્સ અને રેટ્સમાં સતત ઘટાડાને કારણે સોનામાં નાણાં રોકવા સુરક્ષિત રહેશે.

આમ રોકાણકારો તેમનાં નાણાંની ફાળવણી ઇક્વિટીઝ જેવા પરંપરાગત એસેટ ક્લાસમાંથી સોના જેવી સેફ હેવન એસેટમાં કરશે અને સોનામાં તેજીનો નવો તબક્કો જોવા મળી શકે છે. ચાલુ કેલેન્ડરના ત્રીજા ક્વાર્ટરમાં રોકાણકારોએ ઇક્વિટીમાંથી 60 અબજ ડોલરનું રોકાણ પરત ખેંચ્યું હતું. જે કેલેન્ડર 2009 પછીનું સૌથી મોટું હતું એમ તેઓ જણાવે છે.

from Page Array – I Am Gujarat https://ift.tt/2WgaOgc