2020માં ગેઇલના શેરમાં ઊંચા વળતરની ધારણા

73119811

રાજેશ માસ્કરન્હસ

મુંબઈ:એડ્જસ્ટેડ ગ્રોસ રેવન્યૂ (AGR) સંબંધિત 1.7 લાખ કરોડના પેમેન્ટમાં રાહત મળશે તો ગેઇલનો શેર 2020માં નોંધપાત્ર વળતર આપી શકે છે. કંપનીનો શેર હાલમાં તેના લાંબા ગાળાના પ્રાઇસ ટુ અર્નિંગ વેલ્યુએશનના સરેરાશથી 38 ટકા ડિસ્કાઉન્ટે ટ્રેડ થઈ રહ્યો છે, એમ એનાલિસ્ટ્સે જણાવ્યું હતું. દૂરસંચાર વિભાગે કંપની પાસેથી ₹1.7 લાખ કરોડની AGRની માગણી કરેલી છે.

એનાલિસ્ટ્સે જણાવ્યું હતું કે દેશમાં ડોમેસ્ટિક ગેસની માગ અને એલએનજીના ઉત્પાદનમાં વધારાથી જાહેર ક્ષેત્રની આ ગેસ માર્કેટિંગ કંપનીને સૌથી વધુ લાભ થશે. જોકે શેરમાં છેલ્લા એક વર્ષમાં 17 ટકા કરેક્શન આવ્યું છે. બિઝનેસ સેગમેન્ટના સંભવિત પુનર્ગઠન, ધારણા કરતાં નબળા નાણાકીય પરિણામ અને તાજેતરમાં AGR સંબંધિત ડિમાન્ડને કારણે શેરને નેગેટિવ અસર થઈ છે.

સુપ્રીમ કોર્ટે AGRની વ્યાખ્યાને વિસ્તૃત બનાવ્યા બાદ દૂરસંચાર વિભાગે આ રકમની માંગણી કરી છે. સુપ્રીમ કોર્ટના આદેશને પગલે ટેલિકોમ લાઇન્સ હોલ્ડર્સે સરકારને
લાઇસન્સ ફી આપવી પડશે. AGRમાં હવે ટેલિકોમ સિવાયના બિઝનેસની આવકનો પણ સમાવેશ થાય છે. તેથી ગેઇલ અને પાવર ગ્રિડ કોર્પ જેવી લાઇસન્સ ધરાવતી નોન ટેલિકોમ કંપનીઓ માટે પણ ચિંતા ઊભી થઈ છે.

એમ્કે ગ્લોબલના એનાલિસ્ટ સબરી હઝારિકાએ જણાવ્યું હતું કે, “DoT-AGR મુદ્દાને કારણે ગેઇલના શેરમાં નરમાઈ આવી હોય તેમ લાગે છે. અમે માનીએ છીએ કે AGRની માંગણી ટકી શકે તેમ નથી. શેર હાલમાં આકર્ષક વેલ્યુએશન છે અને અમે ₹160ના ટાર્ગેટ ભાવ સાથે બાય રેટિંગ જાળવી રાખીએ છીએ.”

શુક્રવારે કંપનીનો શેર બીએસઇમાં ₹125.70એ બંધ આવ્યો હતો. શેર હાલમાં 2020-’21ના અંદાજિત Ebitdaના છ ગણા સ્તરે ટ્રેડ થાય છે. આ વેલ્યુએશન પાંચ વર્ષના સરેરાશ 7.4 ગણા વેલ્યુએશન કરતાં 19 ટકા સસ્તું છે. પ્રાઇસ ટુ અર્નિંગના સંદર્ભમાં જોઈએ તો ગેઇલનો શેર આગામી વર્ષની અંદાજિત કમાણીના 8.7ના પીઇ રેશિયોએ ટ્રેડ થાય છે, જે 10 વર્ષના સરેરાશ 14ના પીઇ રેશિયો કરતાં 38 ટકા ડિસ્કાઉન્ટ છે. કંપનીએ 2018-’19ના નાણાકીય વર્ષમાં 35 ટકા ડિવિડન્ડ પેઆઉટ રેશિયો જાળવી રાખ્યો હતો. તેનાથી શેર દીઠ કમાણી 3.2 ટકા થાય છે.

મોતીલાલ ઓસ્વાલ ફાઇનાન્શિયલ સર્વિસિસના રિસર્ચ વડા સિદ્ધાર્થ ખેમ્કાએ જણાવ્યું હતું કે, “અમે માનીએ છીએ કે દેશમાં ગેસ અને એલએનજીના ઉત્પાદનમાં વધારાથી ગેઇલને સૌથી વધુ લાભ થશે. ઔદ્યોગિક પ્રદૂષણ અંગેના આકરા નિયમોથી પણ લાંબા ગાળે ગેસ ટ્રાન્સમિશન સેગમેન્ટને મદદ મળશે.”

જોકે તેમણે જણાવ્યું હતું કે AGR સંબંધિત મુદ્દે રાહત નહીં મળે તો તેનાથી કંપનીના નાણાકીય દેખાવને પ્રતિકૂળ અસર થશે.” એનાલિસ્ટ્સ માને છે કે FY 2020-22માં કંપનીના Ebidtaમાં 14 ટકા CAGRએ વધારો થશે. Ebidtaમાં ટ્રાન્સમિશન સેગમેન્ટ મુખ્ય યોગદાન આપે છે. FY2022માં ગેસ વોલ્યુમ વધીને 135 મિલિયન
સ્ટાન્ડર્ડ ક્યુબિક મીટર પર ડે થવાની ધારણા છે.

સપ્ટેમ્બર ક્વાર્ટરમાં ગેઇલનું સંયુક્ત ચોખ્ખું વેચાણ છ ટકા ઘટીને ₹18,235 કરોડ થયું હતું. ઓપરેટિંગ પ્રોફિટ માર્જિન આ સમયગાળામાં 530 બેસિસ પોઇન્ટ્સ ઘટીને 9.1 ટકા થયું હતું. તેનાથી ઓપરેટિંગ પ્રોફિટ 40 ટકા વધીને ₹1,654.14 કરોડ થયો હતો. સપ્ટેમ્બર ક્વાર્ટરમાં PBDIT 35 ટકા ઘટીને ₹1,889.43 કરોડ થયું હતું.

from Page Array – I Am Gujarat https://ift.tt/2QV3J2r