નવી દિલ્હી: ભારતમાં કોરોના વાયરસના કેસમાં ઝડપી વૃદ્ધિ જોવા મળી રહી છે. ગુરુવારે દેશભરમાં કોરોનાના 781 નવા કેસ સામે આવ્યા હતા. એક જ દિવસમાં કોરોનાના નવા કેસનો આ સૌથી મોટો આંકડો છે. આ પહેલા બુધવારે એક જ દિવસમાં 598 નવા કેસ કન્ફર્મ થયા હતા. ગઈકાલે દેશમાં જેટલા દર્દીઓનો રિપોર્ટ પોઝિટિવ આવ્યો હતો તેમાં 10 ટકા જેટલા માત્ર ગુજરાતમાં છે.
ગુરુવારે મહારાષ્ટ્રમાં સૌથી વધુ 229 કેસ જોવા મળ્યા હતા. દેશમાં પહેલીવાર કોઈ રાજ્યમાં એક જ દિવસમાં સામે આવેલા આ સૌથી વધારે કેસ છે. આ ઉપરાંત, તમિલનાડુમાં 96, રાજસ્થાનમાં 80, ગુજરાતમાં 76 અને દિલ્હીમાં 51 દર્દીના રિપોર્ટ પોઝિટિવ આવ્યા હતા. આમ, ગુરુવારના દિવસે દેશમાં રેકોર્ડસ્તરે નવા કેસ નોંધાયા હતા. કેટલાક રાજ્યોમાં પણ એક જ દિવસમાં સૌથી વધુ કેસ ગુરુવારે જ જોવા મળ્યા હતા.
ગયા સપ્તાહ દરમિયાન કોરોનાના નવા કેસની સંખ્યા 500-600ની રેન્જમાં રહેતી હતી, પરંતુ ગુરુવારે આ પેટર્ન પણ તૂટી હતી. એટલું જ નહીં, ગુરુવારે મૃત્યુ પામનારા પેશન્ટ્સની સંખ્યા પણ દેશભરમાં 31 રહી હતી. આ સાથે જ આ ઘાતક વાયરસની ઝપેટમાં આવી મોતને ભેટનારા લોકોનો આંકડો દેશમાં 232 પર પહોંચી ગયો છે. માત્ર મહારાષ્ટ્રમાં જ ગઈકાલે 15 લોકોના મોત થયા હતા, અને રાજ્યમાં કુલ મૃતકોનો આંકડો 97 પર પહોંચી ગયો છે.
કદાચ અન્ય દેશો જેટલો ભારતમાં નહીં વકરે કોરોના: હર્ષવર્ધન
કોરોના વાયરસના કન્ફર્મ કેસની સંખ્યા દેશભરમાં દિવસેને દિવસે વધી રહી છે ત્યારે કેન્દ્રિય સ્વાસ્થ્ય મંત્રી હર્ષવર્ધને ગઈકાલે બેનેટ યુનિ.ની કોરોના પર થયેલી ઓનલાઈન કોન્ફરન્સમાં જણાવ્યું હતું કે, ભારતમાં સરકારે લીધેલા પગલાંને કારણે કદાચ કોરોના અન્ય દેશોમાં જોવા મળ્યો છે તેટલો નહીં વકરે. તેમણે એમ પણ કહ્યું હતું કે હાલ આપણી પાસે તેની કોઈ રસી ના હોવાથી સોશિયલ ડિસ્ટન્સિંગ અને લોકડાઉન જ કોરોનાથી બચવાના ઈલાજ છે.
કેમ અચાનક વધી રહ્યા છે કેસ?
મોટાભાગના રાજ્યોએ કોરોના હોટસ્પોટ્સને આઈડેન્ટિફાય કરીને ડોર ટુ ડોર તપાસ શરુ કરી છે. પોઝિટિવ કેસના સંપર્કમાં આવનારા લોકોના પણ મોટી સંખ્યામાં ટેસ્ટ થઈ રહ્યા છે. મહારાષ્ટ્ર અને ગુજરાત જેવા રાજ્યોમાં તો રોજબરોજ કરાતા ટેસ્ટની સંખ્યા ચાર આંકડામાં પહોંચી ગઈ છે. ટેસ્ટિંગ વધવાને કારણે આ રાજ્યોમાં નવા કેસમાં પણ અચાનક ઉછાળો આવ્યો છે. અન્ય રાજ્યોમાં પણ આ જ સ્થિતિ જોવા મળી રહી છે. જેના કારણે આગામી ચારેક દિવસ સુધી નવા કેસનો આંકડો સતત ઉંચો રહે તેવી શક્યતા છે.
from Page Array – I Am Gujarat https://ift.tt/2JZooz3
No comments:
Post a Comment