પાર્થ શાસ્ત્રી, અમદાવાદ: હવામાન વિભાગ દ્વારા ગુજરાતમાં વિધિવત રીતે ચોમાસું ક્યારે બેસશે તેને લઈને આગાહીઓ કરવામાં આવી છે. હવામાન વિભાગ મુજબ આ વર્ષે ચોમાસું 11 દિવસ પાછળ ધકેલાતા રાજ્યમાં ચોમાસાની શરૂઆત 26મી જૂનથી થશે. સરકાર દ્વારા સંચાલિત શાળાઓની પાઠ્યપુસ્તકોમાં એ શીખવવામાં આવ્યું છે કે, ગુજરાતમાં દક્ષિણ-પશ્ચિમ ચોમાસાની શરૂઆત 15 જૂન છે. આ તારીખ અર્ધ-શુષ્ક પ્રદેશમાં બહુ રાહ જોવાતી ચોમાસાના આગમનનો ઉલ્લેખ કરે છે, જે લગભગ 3 મહિના સુધી ચાલે છે.
ભારતીય હવામાન વિભાગ (IMD)એ ગુજરાત સહિત 11 રાજ્યો અને 63 શહેરોને આવરી લેતા નવા સંશોધન મુજબ ચોમાસાની તારીખોમાં સુધારો કર્યો છે. નિષ્ણાંતોએ જણાવ્યું હતું કે, ચોમાસાના આગમનની તારીખ 26 જૂન છે. રાજ્ય સરકાર દ્વારા ચોમાસાની તૈયારીઓને લઈને તાજેતરમાં યોજાયેલી ઉચ્ચ સ્તરીય બેઠકમાં હવામાન વિભાગના ડિરેક્ટર જયંત સરકારે આ આંકડાઓ રજૂ કર્યા હતા.
સરકારે જણાવ્યું કે, ‘આઈએમડી પુણેના નિષ્ણાંતો દ્વારા કરવામાં આવેલા અધ્યયનમાં ગુજરાતના ચાર હવામાન મથકો અમદાવાદ, સુરત, સુરેન્દ્રનગર અને ભુજનો સમાવેશ કરવામાં આવ્યો છે. નિષ્ણાંતો દ્વારા ગુજરાતમાં ચોમાસાની શરૂઆત ક્યારથી થશે અને ક્યાં સુધી રોકાશે તેનો અભ્યાસ કરીને તેની તારીખોમાં ફેરફાર કર્યો હતો. આમ ચોમાસું 11 દિવસ પાછળ ધકેલાયું છે.’
આઈએમડીના નિષ્ણાતોએ અગાઉ જણાવ્યું હતું કે, રિવિઝનનું કારણ વોટર મેનેજમેન્ટને સરળ બનાવવા અને સારી કાર્યક્ષમતા માટે કૃષિ કેલેન્ડરને ફરીથી ગોઠવવાનું હતું. નિષ્ણાંતોએ ઉમેર્યું કે, અગાઉની જે તારીખો જાહેર કરવામાં આવી હતી તે મર્યાદિત અભ્યાસ પર આધારિત હતી. પરંતુ રીયલ ટાઈમ ફેરફારોને જોવા માટે રિવિઝનની જરૂર હતી. રસપ્રદ વાત એ છે કે, કેરળના દરિયાકાંઠે ચોમાસાની શરૂઆત દર વર્ષની જેમ સમાન રહી છે. નિષ્ણાંતોએ એ પણ જણાવ્યું કે, હવામાનના ફેરફારમાં ઘણા કારણો હોઈ શકે છે.
જયંત સરકારે જણાવ્યું કે, કોઈ નિષ્કર્ષ પહેલા તે માટે અનેક પરિબળોનો સંપૂર્ણ અભ્યાસ કરવો જરૂરી છે. હવામાન વિભાગના અભ્યાસ મુજબ ગુજરાતમાં ચોમાસાની શરૂઆતની સાથે તેની વિદાયની તારીખો પણ બદલાઈ છે. જે મુજબ અમદાવાદમાં ચોમાસું 22 સપ્ટેમ્બરના રોજ વિધિવત રીતે વિદાય લે છે પરંતુ હવે તે 30 સપ્ટેમ્બર સુધી ચથાવત રહેશે. જ્યારે ભૂજમાં સામાન્ય તારીખ કરતા 11 દિવસ પછીથી ચોમાસું વિધિવત વિદાય લેશે.
from Page Array – I Am Gujarat https://ift.tt/2AMEGu8
No comments:
Post a Comment