અમદાવાદ: શનિવાર સાંજ સુધી છેલ્લા 24 કલાકમાં ગુજરાતમાં પહેલીવાર 600થી વધુ (615) કેસ નોંધાતા કુલ કેસોનો આંકડો 30773એ પહોંચ્યો છે. રાજ્યમાં 24 કલાકમાં કુલ 18 દર્દીઓના મોત થતા કુલ મૃત્યુઆંક 1790 થયો છે. લોકડાઉન હળવું કરાયા બાદ સમગ્ર ગુજરાત કોરોનાની ઝપેટમાં આવી ગયું હતું. જોકે તેમાંથી કેટલાક જિલ્લાઓ એવા છે જ્યાં કોરોનાને અટકાવવામાં સફળતા પણ મળી છે. મીડિયા રિપોર્ટ મુજબ ગુજરાતના 4 જિલ્લા એવા છે જ્યાં કોરોનાના કેસ હોવા છતાં હજુ સુધી એક પણ વ્યક્તિનું મોત થયું નથી. જેમાં નર્મદા, દાહોદ, તાપી અને ડાંગ જિલ્લાનો સમાવેશ થાય છે.
ગુજરાતમાં કુલ કેસોની સંખ્યા 30000ને પાર પહોંચી ગઈ છે અને મોટા શહેરોથી લઈને ઘણા જિલ્લાઓમાં મૃત્યુના આંકડામાં પણ વધારો જોવા મળ્યો છે. ત્યારે રાજ્યમાં એંકદરે કુપોષણની અન્ય જિલ્લાની સરખામણીએ વધુ સમસ્યા ધરાવતા ચાર જિલ્લા નર્મદા, તાપી, ડાંગ અને દાહોદમાં આશ્ચર્યજનક રીતે કોરોનાથી હજુ સુધી એક પણ દર્દીનું મોત નોંધાયું નથી. શહેરી વિસ્તારોની સરખામણીએ આ જિલ્લામાં દર્દીઓ સારવાર બાદ સ્વસ્થ થઈ રહ્યા છે.
જિલ્લાવાર વાત કરવામાં આવે તો મીડિયા રિપોર્ટ મુજબ દાહોદ જિલ્લામાં 26 જૂન સુધી કોરોનાના 57 કેસ, નર્મદામાં 85 કેસ, તાપીમાં 6 અને ડાંગમાં 4 કેસ નોંધાયા છે. પરંતુ ત્યાં એક પણ દર્દીનું મોત થયું નથી. આ જિલ્લાઓના અન્ય વિસ્તારો કરતા શ્રમજીવી વર્ગ વધુ હોવાથી આવકનું પ્રમાણ ઓછું છે તેમજ સેંકડો બાળકો કુપોષિત છે. તબીબી તજજ્ઞો માટે પણ આ જિલ્લાઓમાં કોરોનાના કેસ છતાં એક પણ દર્દીનું મોત નથી થયું તે રિસર્ચની બાબત છે. આ વિસ્તારોમાં શહેરોની સરખામણીએ વધુ સારી સુવિધાઓ છે કે પછી ટ્રીટમેન્ટ મેથડમાં કોઈ ફેરફાર છે તે પણ એક તપાસનો વિષય છે.
ડબલિંગ અને રિકવરી રેટ વધ્યો
છેલ્લા 24 કલાકમાં ગુજરાતમાં 379 દર્દીઓ સ્વસ્થ થઈને ઘરે પરત ફર્યા છે. જેથી હવે રાજ્યમાં કુલ 22417 વ્યક્તિઓએ કોરોના સંક્રમણને હરાવીને સ્વસ્થ થયા છે. જેથી રાજ્યમાં છેલ્લા એક અઠવાડિયામાં કોવિડ-19 રિકવરી રેટ અને ડબલિંગ રેટમાં પણ વધારો થયો છે. જ્યારે ડેથરેટમાં નોંધપાત્ર ઘટાડો થયો છે. અગાઉ રિકવરી રેટ 69.40% હતો. જે હાલ 73.08% થયો છે. ડબલીંગ રેટ પણ અગાઉ 15 દિવસનો હતો. જે હવે 28 દિવસનો થયો છે. આ ઉપરાંત મૃત્યુદર પણ 3.88% થયો છે.
from Page Array – I Am Gujarat https://ift.tt/2VqMzwv
No comments:
Post a Comment