ગુજરાતમાં કોરોના વાયરસ કેસનો ડબલિંગ રેટ વધ્યો: સરકાર

ગુજરાતનો ડબલિંગ રેટ 31.47 દિવસ

અમદાવાદ: કોરોનાના કહેર વચ્ચે રાહતના સમાચાર સામે આવ્યા છે. ગુજરાત સરકારે મંગળવારે કહ્યું કે, તે રાજ્યમાં કોવિડ-19ના ફેલાવાને ધીમું કરવામાં સક્ષમ છે. સરકારે જણાવ્યું કે, ગુજરાતમાં કોરોના કેસનો ડબલિંગ રેટ વખ્યો છે. જે મુજબ હવે રાજ્યમાં 31.47 દિવસે કોરોનાના કેસની સંખ્યા ડબલ થઈ રહી છે. જે દેશના સરેરાશ 19.6 દિવસની સરખામણીએ ઉંચો છે. પાડોશી રાજ્યોમાં મધ્યપ્રદેશનો ડબલિંગ રેટ 39 દિવસ, રાજસ્થાનનો 28 દિવસ, કેરળનો 21 દિવસ અને દિલ્હીનો આશરે 14 દિવસનો છે.

હેલ્પલાઈન નંબર પર કોલ્સની સંખ્યા ઘટી

સરકારનું કહેવું છે કે 1 મેથી દરમાં 70% થી વધુનો ઘટાડો થયો છે. 1 મેના રોજ સંયુક્ત વિકાસ દર 7.7 હતો. જે 15 જૂન સુધીમાં તે 2.3 પર આવી ગયો હતો.104 ફિવર હેલ્પલાઈન પર આવેલા કોલ્સની સંખ્યાથી પણ અન્ય સંકેતો મળ્યા છે. કોરોનાવાયરસથી સંબંધિત કોલ્સ 18-24 માર્ચ સુધી 1,720થી ઘટીને 13 જૂન સુધીમાં 326 થઈ ગયા હતા.

મૃત્યુદર હજી પણ ચિંતાજનક

ગુજરાતમાં કોવિડ -19 દર્દીઓમાં કેસ ફેટાલિટી રેટ (CFR) હજી પણ ચિંતાજનક છે. દેશમાં 10,000થી વધુ કેસ નોંધાયેલા રાજ્યોમાં પણ ગુજરાતનો સીએફઆર આંકડો દેશમાં સૌથી વધુ છે. 16 જૂન સુધીમાં ગુજરાતનો સીએફઆર 6.25% હતો. જ્યારે મહારાષ્ટ્રનો સીએફઆર 3.73%, રાજસ્થાનનો આંકડો 2.31% છે. તેમજ દિલ્હીનો 3.27% અને સૌથી ઓછો કેરળનો 1.26% છે.

કેસ પોઝિટિવિટી રેટ 8.23%

રાજ્ય સરકાર મુજબ મોટાભાગના કોવિડ -19 કેસ રાજ્યના ચાર મોટા શહેરો અને તેના આસપાસના જિલ્લાના વિસ્તારોમાં કેન્દ્રિત છે. અમદાવાદમાં કોરોનાના સૌથી વધુ કેસ નોંધાયા છે. ગુજરાતમાં કેસ પોઝિટિવિટી રેટ (સીપીઆર) 8.23% છે જ્યારે પાડોશી રાજ્ય મહારાષ્ટ્રમાં તે 16.5% છે. ગુજરાત સરકારે મંગળવારે જણાવ્યું હતું કે, તેનો પેસેન્ટ ડિસ્ચાર્જ રેટ 69.17 છે, જે દેશના ઘણા રાજ્યોના દરની તુલનામાં પ્રભાવશાળી રહ્યો છે.

from Page Array – I Am Gujarat https://ift.tt/3d3ITXC