મહેનત લેખે લાગી: રેસિડેન્ટ ડૉક્ટરોની કોવિડ ડ્યૂટી પીજી મેડિકલ ઈન્ટર્નશીપ તરીકે ગણાશે!

ભરત યાજ્ઞિક, અમદાવાદ: છેલ્લા બે મહિનાથી રેસિડેન્ટ ડૉક્ટરો ફ્રંટલાઈન કોરોના વોરિયર્સ તરીકે કોવિડ-19 વોર્ડ્સમાં સખત મહેનત કરી રહ્યા છે. અણીની વેળાએ મદદ કરી રહેલા આ ડૉક્ટરોને જોતાં રાજ્ય સરકારે મેડિકલ કાઉન્સિલ ઓફ ઈન્ડિયા (MCI)ને પોસ્ટ ગ્રેજ્યુએશનના ત્રીજા વર્ષના મેડિકલ સ્ટુડન્ટ્સની ફાઈનલ પરીક્ષા મુલતવી રાખવાની વિનંતી કરી છે. લાગી રહ્યું છે કે, રાજ્ય સરકારે રેસિડેન્ટ ડૉક્ટરોની પરીક્ષા પાછળ કરાવીને તેમને આ ડ્યૂટીનું વળતર ચૂકવવાનું મન બનાવ્યું છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

આ ડૉક્ટરોની કોવિડ-19 ડ્યૂટીના સમયગાળાને તેમની ફરજિયાત ઈન્ટર્નશીપ તરીકે ગણી લેવાનો નિર્ણય કર્યો છે. સામાન્ય રીતે પરીક્ષા પૂરી થાય પછી તરત જ તેમને ગ્રામ્ય વિસ્તારોમાં એક વર્ષ માટે ઈન્ટર્નશીપ આપવામાં આવે છે. ઘણા ડૉક્ટરો 30 લાખ રૂપિયાના બોન્ડ ચૂકવીને આ ઈન્ટર્નશીપ છોડી દે છે. મહત્વનું છે કે, સરકાર વિદ્યાર્થીઓને એડમિશન આપે ત્યારે તેમની પાસે આ બોન્ડ પર સહી કરાવે છે. જો કે, રાજ્ય સરકારે હાલ આ ડૉક્ટરોને છૂટછાટ આપી છે.

કોવિડ-19ના દર્દીઓની સારવાર મુખ્યત્વે આ રેસિડેન્ટ ડૉક્ટરો જ કરે છે. ગયા મહિને આ ડૉક્ટરોએ એક અનામી પત્ર લખીને તેમને પડતી મુશ્કેલીઓ વિશે ગુજરાત હાઈકોર્ટને જાણ કરી હતી.

કોવિડ-19ની હેક્ટિક ડ્યૂટી કરતાં આ ડૉક્ટરોની સેવાને જતી ના કરાય તેવું સરકાર માને છે. માટે જ તેઓ આ વિદ્યાર્થીઓને ફાઈનલ પરીક્ષાની તૈયારી માટે સમય આપવા માગે છે. સામાન્ય રીતે આ પરીક્ષા એપ્રિલથી મે વચ્ચે લેવાતી હોય છે. જો કે, આ વખતે પરીક્ષા ઓગસ્ટ પહેલા નહીં યોજાય. આરોગ્ય અગ્ર સચિવ જયંતી રવિએ જણાવ્યું, “કોવિડ-19ની ડ્યૂટીને વિદ્યાર્થીઓને ઈન્ટર્નશીપ પીરિયડમાં ગણીશું અને આ કેવી રીતે કરવું તે અંગે ચર્ચા ચાલી રહી છે. આમ કરવા પાછળનો હેતુ છે કે વિદ્યાર્થીઓને કોઈ નુકસાન ના થાય. ગુજરાતની જેમ અન્ય રાજ્યોએ પણ સેન્ટ્રલ ઓથોરિટીને ત્રીજા વર્ષના વિદ્યાર્થીઓની ફાઈનલ પરીક્ષા મોડી લેવા વિનંતી કરી છે.”

આ મુદ્દે જૂનિયર ડૉક્ટર્સ અસોસિએશનના પ્રમુખ પિંકેશ ડામોરે કહ્યું, “તમામ સિનિયર ડૉક્ટરો કોવિડ ડ્યૂટીમાં વ્યસ્ત છે ત્યારે આ માહોલમાં પરીક્ષા લેવી શક્ય નથી. અન્ય કેંદ્રોમાંથી પણ તેમને બોલાવી શકાય તેવી સ્થિતિ નથી. અમે માગ કરી છે કે, રેસિડેન્ટ ડૉક્ટરોની કોવિડ ડ્યૂટીને તેમની ઈન્ટર્નશીપનો ભાગ ગણી લેવામાં આવે.”

from Page Array – I Am Gujarat https://ift.tt/2A2jLmO