અમેરિકામાં ફરી કોરોના વકર્યો, દર્દીઓની પેટર્નમાં આવેલા પરિવર્તને ટેન્શન વધાર્યું

એક જ દિવસમાં 40,000+ કેસ

વોશિંગ્ટન: દુનિયામાં સૌથી વધુ કોરોનાના કેસ ધરાવતા અમેરિકામાં સ્થિતિ હજુય થાળે નથી પડી રહી. ગુરુવારે દેશમાં 40 હજારથી પણ વધુ કેસ નોંધાયા હતા, જે અત્યારસુધીનો રેકોર્ડ છે. ચિંતાની વાત એ છે કે અત્યારસુધી કોરોનાની જ્યાં ખાસ અસર નહોતી જોવા મળી તેવા રાજ્યોમાં ઝડપથી કેસો વધી રહ્યા છે. દક્ષિણ અને પશ્ચિમ અમેરિકામાં હવે આ વાયરસ ફેલાઈ રહ્યો છે.

અત્યારસુધી મુક્ત રહેલા રાજ્યોમાં વધ્યા કેસ

ગુરુવારે અલાસ્કા, અલબામા, મોન્ટાના અને ઉટાહમાં સૌથી વધારે કેસો નોંધાયા હતા. કેલિફોર્નિયામાં લોકોને ઘરમાં જ રહેવાના આદેશો જારી કરાયા છે. ત્યાં પણ કુલ કેસોનો આંકડો બે લાખને વટાવી ગયો છે. એક મહિનામાં કેલિફોર્નિયામાં કુલ કેસોની સંખ્યા ડબલ થઈ ગઈ છે. જેમાં સૌથી વધુ ચિંતાની વાત એ છે કે હવે નાની ઉમરના દર્દીઓની સંખ્યામાં ભારે ઉછાળો જોવા મળી રહ્યો છે.

નાની ઉંમરના દર્દીઓમાં મોટો ઉછાળો

માસ્ક પહેરીને જ ઘરની બહાર નીકળવા અને સોશિયલ ડિસ્ટન્સિંગ જાળવી રાખવાની સૂચના હોવા છતાંય કેસો વધી રહ્યા છે. એરિઝોના જેવા રાજ્યમાં અડધોઅડધ દર્દીઓની ઉંમર 22થી 44 વર્ષ છે. ફ્લોરિડામાં દર્દીઓની સરેરાશ ઉંમર 35 વર્ષ છે, જે માર્ચમાં 65 વર્ષ હતી. ટેક્સાસમાં પણ આવી જ સ્થિતિ જોવા મળી રહી છે. રાજ્યમાં જે પણ નવા કેસ આવી રહ્યા છે તેમાંના મોટાભાગના નાની ઉંમરના દર્દીઓ છે.

નહીં ખોલાય સ્કૂલો અને કોલેજો

એક તરફ અમેરિકાના કેટલાક રાજ્યોમાં સ્કૂલો અને કોલેજો શરુ કરવા વિચારણા કરાઈ રહી છે ત્યારે નાની ઉંમરના દર્દીઓની સંખ્યા વધતા તેના પર ફેરવિચારણા કરવાની ફરજ પડી છે. દેશની સરકાર હવે ટેસ્ટિંગ મેથડમાં પણ મોટું પરિવર્તન લાવવા વિચારી રહી છે. હવે અમેરિકામાં પુલ ટેસ્ટિંગ સ્ટ્રેટેજી અમલમાં મૂકાઈ શકે છે. જેમાં ઘણા લોકોના એકસાથે સેમ્પલ લઈ ઈન્ફેક્ટેડ લોકોને અલગ તારવી તેમને આઈસોલેટ કરાશે.

કોન્ટેક્ટ ટ્રેસિંગની નીતિ પણ બદલાશે

કોરોનાને ફેલાતો અટકાવવા માટે હવે પુલ ટેસ્ટિંગની સાથે કોન્ટેક્ટ ટ્રેસિંગની નીતિમાં પણ ફેરફાર કરવામાં આવશે. અત્યારસુધી દર્દીના સંપર્કમાં આવનારા લોકોનું ફોન પર વેરિફિકેશન થતું હતું. તેના બદલે હવે તેમને રુબરુ મળી કોઈને કોરોના થવાનું જોખમ છે કે કેમ તેની ખાતરી કરવામાં આવશે.

from Page Array – I Am Gujarat https://ift.tt/2NAY68q