યુવતીને પેટમાં થયો ભયાનક દુ:ખાવો, રિપોર્ટ કરાવ્યો તો ખબર પડી કે તે પુરુષ છે!

ગણતરીના કલાકોમાં જિંદગી બદલાઈ ગઈ

તમામ તસવીરો પ્રતિકાત્મક છે.

કોલકાતા: 30 વર્ષ સુધી સામાન્ય જીવન જીવી રહેલી એક યુવતીને પેટમાં દુ:ખાવો શું શરુ થયો, ગણતરીના સમયમાં જ તેની આખી જિંદગી બદલાઈ ગઈ. યુવતીની તપાસ કરનારા ડોક્ટરો પણ તેના રિપોર્ટ્સ જોઈને ચોંકી ગયા. જેમાં એ વાતનો સ્પષ્ટ ઉલ્લેખ કરાયો હતો કે યુવતી શરીરે ભલે સ્ત્રી હોય, પરંતુ જિનેટિકલી તે પુરુષ છે. એટલું જ નહીં તે વૃષણના કેન્સરની પીડાઈ રહી છે.

નાની બહેનને પણ આ જ તકલીફ

યુવતીની 28 વર્ષીય બહેનના જ્યારે રિપોર્ટ કરવામાં આવ્યા ત્યારે તે પણ જિનેટિકલી પુરુષ હોવાનો ઘટસ્ફોટ થયો હતો. બંને બહેનો એન્ડ્રોજન ઈન્સેન્સિટિવ સિન્ડ્રોમની તકલીફ છે. જેમાં વ્યક્તિના જનનાંગો બિલકુલ સ્ત્રી જેવા જ હોય છે, પરંતુ તે જિનેટિકલી પુરુષ હોય છે.

નવ વર્ષ પહેલા થયા હતા લગ્ન

બંગાળના બિરભૂમ જિલ્લામાં રહેતી આ યુવતીના નવ વર્ષ પહેલા લગ્ન થયા હતા. તેને થોડા દિવસથી પેટના નીચેના ભાગમાં ભયાનક દુ:ખાવો થતાં તે ડોક્ટર પાસે પહોંચી હતી. દુ:ખાવાનું સ્પષ્ટ કારણ ના મળતાં ડોક્ટર્સે તેના કેટલાક ટેસ્ટ કર્યા હતા. જેમાં તેની સાચી જિનેટિકલ ઓળખ છત્તી થઈ હતી.

…તો સ્ત્રી જેવું શરીર કઈ રીતે બન્યું?

ડોક્ટર્સનું માનીએ તો, તે જન્મે સ્ત્રી હતી પરંતુ તેનામાં ગર્ભાશય તેમજ અંડાશય જેવા પ્રજોત્પત્તિ માટે જરુરી તેવા અંગો હતા જ નહીં. તેના શરીરમાં રહેલા વૃષણ વિકસિત ના થઈ શકવાથી તેનામાં ટેસ્ટોસ્ટેરોનનો અંત:સ્ત્રાવ ના બની શક્યો. જેથી તેના સ્ત્રૈણ હોર્મોન્સે તેનો દેખાવ એક સ્ત્રી જેવો બનાવી દીધો.

વારસાગત છે આ જિનેટિકલ ખામી

મહિલા અને તેનો પતિ ઘણા સમયથી બાળક માટે પ્રયાસ કરતા હતા, પરંતુ મહિલાને ગર્ભ નહોતો રહેતો. ચોંકાવનારી વાત એ છે કે આ મહિલાના પરિવારમાં બીજી બે સ્ત્રીઓને આ પ્રકારની જ સમસ્યા હોવાનું ભૂતકાળમાં નિદાન થયું હતું તેની બહેનને પણ તેના જેવી જ સમસ્યા હોવાનું કન્ફર્મ થઈ ચૂક્યું છે. તેવામાં આ જિનેટિકલ ડિસોર્ડર વારસાગત રીતે આ પરિવારમાં આગળ વધ્યો હોવાનું ડોક્ટર્સનું માનવું છે.

from Page Array – I Am Gujarat https://ift.tt/2YDGi2s