સ્માર્ટફોન, ટીવી સહિતની અનેક વસ્તુઓ મોંઘી થશે, ડિસ્કાઉન્ટની વાત જ ભૂલી જાઓ

મેડ ઈન ચાઈનાનો વિરોધ કારણભૂત!

નવી દિલ્હી: ચીનથી આવતા માલસામાનના બહિષ્કારને કારણે દેશમાં સ્માર્ટફોન, ટીવી, કમ્પ્યુટર, લેપટોપ સહિતના ઘણા ઈલેક્ટ્રોનિક્સ ઉપકરણો મોંઘા થવાની તૈયારીમાં છે. એક તરફ ચીનથી આ ઈક્વિપમેન્ટ્સ બનાવવા માટે જે માલ આયાત કરાય છે તેની તંગી સર્જાઈ છે. બીજી તરફ, રુપિયો વધુ નબળો પડતાં પણ અન્ય દેશોમાંથી થતી આયાત પણ મોંઘી બની ગઈ છે. જેની સીધી અસર હવે ગ્રાહકોના ખિસ્સા પર જોવા મળશે.

ભારતનું 72 ટકા મોબાઈલ માર્કેટ ચીનના હાથમાં

ભારતમાં મોબાઈલ ફોનનું માર્કેટ બે લાખ કરોડનું છે. જેમાં ચાઈનીઝ કંપનીઓ 72 ટકા જેટલો જંગી હિસ્સો ધરાવે છે. ભારતમાં ચાઈનીઝ કંપનીઓ કે બીજી જે પણ મોબાઈલ બનાવતી કંપનીઓના પ્લાન્ટ આવેલા છે તેઓ પણ મોટાપાયે ચીનથી માલસામાન મગાવે છે. આમ, જો આ સામાન પર ઈમ્પોર્ટ ડ્યૂટી કે કસ્ટમ વધી જાય તો તેની સીધી અસર ગ્રાહકો પર પડશે.

ટીવીના ભાવ વધી પણ ગયા

શાઓમી, રિયલમી, નોકિયા, કોડક અને થોમ્સન જેવી કંપનીઓએ તો પોતાના ટીવીની કિંમતોમાં 12 ટકા સુધીનો વધારો કરી દીધો છે. ભારતમાં ઘણી ઈલેક્ટ્રોનિક્સ આઈટમ્સનું ઉત્પાદન થાય છે, પરંતુ તેના ઘણા કમ્પોનન્ટ્સ ચીનથી આયાત કરાય છે. દેશમાં ટીવીનું માર્કેટ 25 હજાર કરોડનું છે, અને તેમાં સ્માર્ટટીવી સેગમેન્ટનો 45 ટકા હિસ્સો ચીની કંપનીઓ પાસે છે.

ગાડીઓ પણ મોંઘી થઈ શકે

એક્સપર્ટ્સનું માનીએ તો, ચીન પરની નીર્ભરતા ઘટાડવા માટે ત્યાંથી જે માલ આવે છે તે કાચા કે તૈયાર માલનું ભારતમાં પ્રોડક્શન થઈ શકે છે. જોકે, તેના માટેની સવલતો ઉભી કરવામાં ઘણો સમય જોઈશે. મારુતિ સુઝુકીના જ કિસ્સામાં જોઈએ તો કંપની પોતે ચીનથી કશુંય નથી મગાવતી, પરંતુ તેના વેન્ડર્સ ચીનથી કમ્પોનન્ટ્સ મગાવે છે. ઓટો કમ્પોનન્ટ્સનું માર્કેટ 57 અબજ ડોલરનું મનાય છે, જેમાં ચીનનો હિસ્સો 25 ટકા જેટલો છે.

આત્મનિર્ભર બનવામાં સમય લાગશે

ભારતમાં જેટલા એસી મેન્યુફેક્ચરિંગ પ્લાન્ટ આવેલા છે તેઓ પણ ચીનથી મોટાપાયે અનેક વસ્તુઓની આયાત કરે છે. એક ટોચની એસી કંપનીના એમડીના જણાવ્યા અનુસાર, ચીન દુનિયાનું સૌથી મોટું સપ્લાયર છે. ભારતની સરકારે આત્મનિર્ભર અભિયાન શરુ કર્યું છે તે સારી વાત છે, પરંતુ આત્મનિર્ભર બનવા માટે હજુ ઘણો સમય લાગી જશે. આખી દુનિયા ઈલેક્ટ્રોનિક્સ વસ્તુના પ્રોડક્શન માટે ચીન પર જ ઉપલબ્ધ છે.

આયાત મોંઘી થઈ તો ગ્રાહકોને જ નુક્સાન

જો સરકાર ચીનથી આવતા માલ પર કસ્ટમ ડ્યૂટી વધારી દે તો પણ તેનો ફટકો તો ગ્રાહકો પર જ પડશે. કારણકે, તેનાથી આયાત મોંઘી થશે, અને પ્રોડક્શન કોસ્ટ વધી જતાં સ્માર્ટફોન સહિતની ઈલેક્ટ્રોનિક્સ વસ્તુઓ જ નહીં, પરંતુ ચીનથી જે પણ વસ્તુના પ્રોડક્શનનો કાચો માલ આવે છે તે તમામ વસ્તુઓ મોંઘી બનશે.

from Page Array – I Am Gujarat https://ift.tt/3dxB7W3