કોરોના સામે લડવામાં ફિંડલાથી બનતી દવા અસરકાર નીવડી શકે, ક્લિનિકલ ટ્રાયલની માગી મંજૂરી

ભરત યાજ્ઞિક, અમદાવાદ: SARS-CoV-2ની દવા જંગલી થોર પર થતાં મગદળાકારના કાંટાળા ફળમાં હોઈ શકે છે. ફાડિયા થોરનું ફળ સૌરાષ્ટ્રમાં વિપુલ માત્રામાં ઉગે છે. ગુજરાત ટેક્નોલોજિકલ યુનિવર્સિટી (GTU)ની ગ્રેજ્યુએટ સ્કૂલ ઓફ ફાર્મસીના પ્રોફેસર અને SPHERO હેલ્થ એલએલપીના કો-ફાઉન્ડર સંજય ચૌહાણે સૂકી આબોહવાળા વિસ્તારમાં થતા કાંટાળા થોરના લાલ ફળ કે જેને થોરના ડોડા અથવા ફિંડલા (Prickly pear) કહેવાય છે તેમાંથી અર્ક કાઢ્યો છે. આ અર્કમાંથી અનીમિઆ સામે લડવાની દવા બનાવી છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

38 વર્ષીય સંજય ચૌહાણે આ દવાનો ઉપયોગ કોવિડ-19ના દર્દીઓની સારવારમાં કરવા માટે રજૂઆત કરી છે. સંજય ચૌહાણે Hempoin નામની દવા તૈયાર કરી છે જે ગર્ભવતી મહિલાઓ અને બાળકો સહિત ઘણા દર્દીઓને ડૉક્ટર લખી આપે છે.

સંજય ચૌહાણે કહ્યું, “આ દવાની અસરકારકતા ચકાસવા માટે કોવિડ-19ના દર્દીઓ પર ક્લિનિકલ ટ્રાયલ કરવું જરૂરી છે. કોવિડ-19ના દર્દીઓની સારવારમાં આ દવાના ઉપયોગ માટે ફેઝ 3 ક્લિનિકલ ટ્રાયલ કરવા મેં કેંદ્ર સરકાર પાસે મંજૂરી માગી છે.” હાલ આ દવા માર્કેટમાં ઉપલબ્ધ છે ત્યારે ફેઝ-1 અને ફેઝ-2ના ક્લિનિકલ ટ્રાયલની જરૂર નથી.

મહત્વનું છે કે, છેલ્લા થોડા વર્ષોથી અનીમિઆના દર્દીઓની સારવારમાં આ દવાનો ઉપયોગ કરવામાં આવી રહ્યો છે. જો કે, આની પેટન્ટ હજી મળી નથી. સંજય ચૌહાણનો દાવો છે કે, આ દવા કોવિડ-19ના દર્દીઓની સારવારમાં ત્રણ પ્રકારે કામ કરી શકે છે.

વાંચો, ફિંડલા એક એવું ચમત્કારિક ફળ છે જે રોગોને જડમૂળથી કરે છે દૂર

સંજય ચૌહાણના જણાવ્યા અનુસાર, એન્ટી-વાયરલ તરીકે સેલ્સની સપાટી પર પ્રોટીનનું સ્તર અંકુશમાં રાખીને વાયરસની એન્ટ્રી રોકી શકે છે અને કોવિડ-19ના પ્રોટીઝને નિયંત્રિત કરી શકે છે. સાથે જ માસ્ટ સેલ સ્ટેબિલાઈઝેશનના સ્તરે પણ કામ કરી શકે છે. જેમાં lgEનું ઉત્પાદન અટકાવવાનો અને માસ્ટ સેલ ડિગ્રેન્યુલેશન એન્ટીઓક્સિડન્ટને રોકવાનો સમાવેશ થાય છે. સાથે જ આ દવા હોસ્ટમાં રિડોક્સ બેલેન્સ ઝડપથી પુનઃસ્થાપિત કરી શકે છે.

સંજય ચૌહાણનું કોવિડ-19 પરનું રિસર્ચ મહદ્અંશે કમ્પ્યુટરની મદદથી ડ્રગ ડિઝાઈનિંગ ટૂલના ઉપયોગ દ્વારા થયેલા સંશોધનને આધારિત છે. ચૌહાણના મતે, આ દવા કોવિડ-19ના દર્દીઓમાં ઈમ્યુનોમોડ્યુલેટર તરીકે તેમજ એન્ટીઓક્સિડન્ટ તરીકે અસરકારક રહી શકે છે. આ દવા રોગપ્રતિકારક શક્તિ વધારે છે એવામાં જો ક્લિનિકલી પ્રમાણિત થઈ જાય તો તકેદારીના પગલા રૂપે પણ લઈ શકાય છે.

SPHERO હેલ્થ એલએલપી GTUની ઈનોવેશન કાઉન્સિલ અને સ્ટાર્ટ અપ વિંગ હસ્તગત કાર્યરત છે. તેને સ્ટાર્ટ અપ ઈન્ડિયા પોલીસી હેઠળ નાણાંકીય મદદ મળે છે. GTUના વાઈસ ચાન્સેલર ડૉ. એન. આર. શેઠના માર્ગદર્શન હેઠળ 12 વર્ષ પહેલા પ્રોફેસર ચૌહાણે રિસર્ચ શરૂ કર્યું હતું. ફાડિયા થોરના ફળ અથવા થોરના ડોડાનું ફાયટોકેમિકલ અને ફાર્માલોજિકલ સ્ક્રીનિંગ કર્યું હતું.

from Page Array – I Am Gujarat https://ift.tt/2ByOgAW