અ’વાદઃ ફેરવેલ પાર્ટીમાં PI સહિતના પોલીસકર્મીઓ માસ્ક વગર આવ્યા, તપાસના આદેશ અપાયા

PIએ કર્યું નિયમોનું ઉલ્લંઘન

અમદાવાદઃ શહેરમાં કોરોના વાયરસના કેસ વધી રહ્યા છે ત્યારે પોલીસ માસ્ક ન પહેરનારા, સોશિયલ ડિસ્ટન્સિંગનું પાલન ન કરનારા અને ભીડ ભેગી કરતાં લોકો સામે રોજ ગુનો નોંધી રહ્યા છે. પરંતુ તેઓ આ બાબતને પોતાના પર લાગુ પાડી રહ્યા હોય તેમ જરાય લાગતું નથી. નિકોલ પોલીસે ફેરવેલ પાર્ટી યોજી હતી, જેમાં આશરે 50 લોકો હાજર રહ્યા હતા. જેમાં કોઈએ પણ માસ્ક નહોતું પહેર્યું આટલું જ નહીં સોશિયલ ડિસ્ટન્સિંગનું પણ સરેઆમ ઉલ્લંઘન થતાં જોવા મળ્યું હતું.

ફેરવેલ પાર્ટીની તસવીરો થઈ વાયરલૉ

ફેરવેલ પાર્ટીની તસવીરો સોશિયલ મીડિયામાં વાયરલ થતાં ઝોન-5ના DCP (ડેપ્યુટી કમિશનર ઓફ પોલીસ) રવિ તેજા વાસમશેટ્ટીએ પોલીસ ઈન્સપેક્ટર હિતેશ ઝાલા અને નિકોલ પોલીસ સ્ટેશનના અન્ય પોલીસકર્મીઓ સામે તપાસના આદેશ આપ્યા છે.

મંગળવારે યોજાઈ હતી પાર્ટી

શહેર પોલીસના સૂત્રોના જણાવ્યા પ્રમાણે, ઝાલાએ મંગળવારે પોલીસકર્મીઓ પાસેથી ફંડ ભેગુ કરીને પાર્ટી યોજી હતી. સુરત શહેરમા તેમની બદલી થતાં આ પાર્ટી યોજવામાં આવી હતી. પાર્ટીમાં ઝાલા પોલીસકર્મીઓ સાથે હાથ મિલાવતા અને અભિવાદન સ્વીકારતા જોવા મળ્યા હતા. કેટલાક પોલીસકર્મીઓએ ફોટો ક્લિક કર્યા હતા અને વોટ્સએપ ગ્રુપ્સમાં શેર કર્યા હતા. તસવીરો વાસમશેટ્ટી સુધી પહોંચતા તેમણે I ડિવિઝનના ACP એન.એલ. દેસાઈને તપાસ હાથ ધરીને રિપોર્ટ રજૂ કરવાનો આદેશ આપ્યો હતો.

પીઆઈ અને અન્ય સામે તપાસના આદેશ

તસવીરોમાં ઝાલા અને અન્ય પોલીસકર્મીઓ શહેર પોલીસ કમિશનર આશિષ ભાટિયાએ બહાર પાડેલા જાહેરનામા અને નિયમોનો ભંગ કરતા જોવા મળ્યા હતા. ઝાલા કે અન્ય કોઈ પોલીસકર્મી સામે હજુ સુધી FIR નોંધવામાં આવી નથી.

ઝાલા સામે ઘણી ફરિયાદો છે

શહેર પોલીસ અધિકારીએ જણાવ્યું કે, ઝાલાની અત્યારસુધીમાં ઘણી ફરિયાદો આવી છે. જેમાં તેમના પર ખાનગી વહીવટદારોને મદદ કરવાનો આરોપ છે, આટલું જ નહીં કેટલાક પોલીસ કર્મીઓની તો બૂટલેગિંગમાં પણ સંડોવણી છે. ‘તેમને ટ્રાન્સફર કે સસ્પેન્ડ કરાય તે પહેલા સામેથી જ સુરત શહેરમાં ટ્રાન્સફર માટેની અરજી દાખલ કરી હતી અને સરળતાથી આ બધામાંથી નીકળી ગયા હતા’, તેમ પોલીસ અધિકારીએ જણાવ્યું.