રામેન્દ્ર સિંહ, ભોપાલ: પરિશ્રમ એ જ પારસમણિ, આ કહેવતને સાર્થક કરી છે મધ્યપ્રદેશની 15 વર્ષીય વિદ્યાર્થિની રોશની ભદોરિયાએ. શનિવારે મધ્યપ્રદેશ બોર્ડનું ધોરણ 10નું પરિણામ જાહેર થયું. જેમાં રોશનીએ 98.5 ટકા મેળવ્યા છે. ભિંડ જિલ્લાની રોશની મેરિટ લિસ્ટમાં આઠમા ક્રમે છે. રોશની રોજ સ્કૂલે કુલ 24 કિલોમીટર સાઈકલ ચલાવીને જતી હતી.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો
ભિંડના અજનોલ ગામની રહેવાસી રોશનીની સ્કૂલ તેના ઘરથી 12 કિલોમીટર દૂર મેહગાંવમાં આવેલી છે. ધોમધખતો ઉનાળો હોય કે ધોધમાર વરસાદ કશાયની ચિંતા કર્યા વિના રોશની રોજ સ્કૂલે જતી હતી. ઘણીવાર એવું બનતું હતું કે, ભારે વરસાદના કારણે રોશની ઘરે પણ નહોતી આવી શકતી કારણકે તેના ગામ સુધી આવવાનો રસ્તો ધોવાઈ જતો હતો. રોશનીએ કહ્યું, “હું મારા સંબંધીને ત્યાં રાત રોકાઈ જતી હતી. કેટલીકવાર તો એવું બનતું કે ઘણા દિવસો પછી હું ઘરે જઈ શકતી હતી.”
રોશનીના 36 વર્ષીય પિતા વ્યવસાયે ખેડૂત છે. દીકરીના પરિણામ બાદ ગર્વથી છાતી ફુલાવીને અમારા સહયોગી અખબાર TOIને પિતા પુરુષોત્તમ ભદોરિયાએ કહ્યું, “અમારા બધા જ બાળકો હોંશિયાર છે પરંતુ દીકરીએ અમારું અભિમાન વધાર્યું છે. આ વિસ્તારમાં કોઈએ ક્યારેય પણ આટલા માર્ક્સ મેળવ્યા નથી. હું તેને આગળ ભણાવવા માગુ છું. તે ઉચ્ચ ડિગ્રીઓ મેળવે અને મોટા શહેરોમાં જઈને મોટી કંપનીઓમાં કામ કરે તેવી ઈચ્છા છે.”
રોશનીએ પોતાના ભવિષ્ય વિશે વાત કરતાં કહ્યું, “હું IAS બનવા માગુ છું. કલેક્ટર બનવાની મારી ઈચ્છા છે. મારી પાસે માહિતી છે તે મુજબ કલેક્ટર ઘણા સારા કામ કરી શકે છે. મને આ વિશે તો વધુ ખબર નથી પરંતુ હું કલેક્ટર બનીને પરિવર્તન લાવવા માગુ છું.”
રોશનીએ ગણિત અને વિજ્ઞાનમાં 100માંથી 100 માર્ક્સ મેળવ્યા છે. તેણે કહ્યું, “હું વર્ગમાં હંમેશા ધ્યાનથી ભણતી હતી અને જે શીખું તે લખતી હતી. આટલા સારા માર્ક્સ મેળવીને હું ખૂબ ખુશ છું.” ઈંગ્લિશમાં રોશનીએ 96 ગુણ મેળવ્યા છે. ગણિત અને અંગ્રેજી તેના મનપસંદ વિષયો છે. રોશનીએ કહ્યું, “હું IASની પરીક્ષા પાસ કરવા માગુ છું અને એટલે જ ધોરણ 11માં ગણિત લેવાનો નિર્ણય પિતા સાથે મળીને કર્યો છે.” રોશનીને પૂછવામાં આવ્યું કે, ફરીથી સ્કૂલો ખુલશે ત્યારે તે સાઈકલ લઈને જશે. ત્યારે તેણે ઉત્સાહથી કહ્યું કે, “હા, હું સ્કૂલમાં રજા પાડવા નથી માગતી.”
4 એકર જમીન ધરાવતા પુરુષોત્તમભાઈ માટે ત્રણ બાળકોને સ્કૂલે મોકલવા મુશ્કેલ હતા પરંતુ તેમણે ક્યારેય રોશનીનું શિક્ષણ છોડાવી દેવાનો વિચાર નથી કર્યો. તેમનો સૌથી મોટો દીકરો ધોરણ 12મા છે અને સૌથી નાનો દીકરો ધોરણ 4માં અભ્યાસ કરે છે. તેમણે કહ્યું, “આજના જમાનામાં ત્રણ બાળકોને ભણાવવા અઘરા છે પરંતુ હું મારા પરિવારને કોઈ મુશ્કેલી નહીં પડવા દઉં. મારા બાળકો પણ મજબૂત મનોબળના છે.”
ચોમાસા દરમિયાન રોશનીને સ્કૂલે આવવા-જવાનું કુલ 24 કિલોમીટરનું અંતર ના કાપવું પડે એટલે એક સંબંધી તેને પોતાના ઘરે રાખવા તૈયાર થયા છે. રોશનીની સફળતા અને તેના પરિવારનો સાથ નોંધપાત્ર છે કારણકે ભીંડમા ડ્રોપઆઉટ રેટ વધારે છે, ખાસ કરીને છોકરીઓનો. 2011ની વસ્તી પ્રમાણે, ગ્રામ્ય વિસ્તારોમાં 1000 છોકરાની સામે માત્ર 837 છોકરીઓ છે અને મહિલાઓનો સાક્ષરતા દર 64 ટકા છે. રોશનીની માતા સરિતા દેવી (34 વર્ષ) ધોરણ 12 પાસ છે. આ એ વર્ષની વાત છે જ્યારે ભિંડમાં સાક્ષરતા દર 55 ટકા હતો. રોશનીના પિતા પણ ગ્રેજ્યુએટ છે. રોશનીના માતા-પિતાને આજે એ જ વાતનો અફસોસ છે કે તેઓ વધુ ના ભણી શક્યા. પુરુષોત્તમભાઈએ કહ્યું, “અમે અમારા બાળકોને ખૂબ ભણાવવા માગીએ છીએ, તેમને જે ભણવું હોય તે ભણવાની છૂટ છે.”
from Page Array – I Am Gujarat https://ift.tt/3e2al8L
No comments:
Post a Comment