અમદાવાદઃ છોકરીને ફોન અપાવવા ત્રણ યુવકોએ રસ્તે જતા યુવાનની છરાના ઘા મારી હત્યા કરી

અમદાવાદઃ શહેરમાં 21 વર્ષના યુવકની હત્યાના 24 કલાકમાં જ ઈસનપુર પોલીસે ગુનામાં સામેલ 3 યુવકો અને 2 સગીર છોકરીઓની પકડી લીધી છે. પ્રાથમિક તપાસમાં જાણવા મળ્યું છે કે આરોપીઓ મૃતકને ઓળખતા નહોતા. એક આરોપી છોકરીને મોબાઈલ ફોન જોઈતો હતો. આ કારણે તેમણે ત્યાંથી પસાર થતા સૌથી પહેલા વ્યક્તિને પકડીને તેની હત્યા કરી નાખી. આ રીતે શુક્રવારે રાત્રે ખોખરા ગુરુજી બ્રિજ પર 11 વાગ્યે ઉમંગ દરજીની છરાના ઘા મારીને હત્યા કરી દેવાઈ.

પોલીસે જણાવ્યું કે, ઉમંગની હત્યા કરનારા ત્રણ આરોપીઓ કૃણાલ દલવાડી, હાર્દિક અગ્રવાલ અને શ્યામ રાઠોડ પહેલાથી જ ગુનાહિત ઈતિહાસ ધરાવે છે અને તેમના વિરુદ્ધ દારૂબંધી હેઠળ પણ ગુનો નોંધાયેલો છે. પોલીસે તેમ પણ જણાવ્યું કે, બે સગીર છોકરીઓ સામે આ પહેલા નડિયાદ પોલીસે બાળ અપરાધનો કેસ નોંધ્યો હતો.

જે ડિવિઝનના એસીપી રાજપાલસિંહ રાણાએ કહ્યું કે, ‘એક છોકરીને મોબાઈલ જોઈતો હતો અને તેણે આરોપીને કહ્યું. આ બાદ શ્યામ, હાર્દિક અને કૃણાલ રસ્તાની બીજી તરફ ગયા અને ઉમંગને રોકીને છરાના ઘા મારી દીધા, આ બાદ તેનો મોબાઈલ ઝૂંટવીને ફરાર થઈ ગયા. ઉમંગનો આરોપીઓ સાથે કોઈ સંબંધ નહોતો.’ રાણાએ કહ્યું કે, ઉમંગના પિતાએ પોલીસને જણાવ્યું હતું કે તેમને ત્રણ યુવક અને બે છોકરીઓ હત્યાના ગુનામાં સામેલ હોવાની જાણકારી મળી છે.’

રાણા વધુમાં કહે છે, સદનસીબે જે વ્યક્તિએ સૌથી પહેલા ઉંમગના પિતાના ફોન કરીને છરાના ધા મારવાની જાણ કરી હતી તેઓ એક આરોપી છોકરીને પહેલાથી ઓળખતા હતા. તેના દ્વારા અમને અન્ય આરોપીઓની ઓળખ મળી. અમે કૃણાલની તેના ઘરેથી ધરપકડ કરી લીધી. પરંતુ અન્ય ત્રણ આરોપીઓ ફરાર હતા. ઈસનપુર પોલીસ સ્ટેશનના ઈન્સ્પેક્ટર જે.એમ સોલંકીએ કહ્યું કે, પોલીસને ફરાર આરોપીઓ દ્વારા વપરાતા બાઈકનું ડિસ્ક્રિપ્શન મળ્યું હતું, ઉપરાંત તેમના મોબાઈલ નંબર પણ ટ્રેક કરવામાં આવી રહ્યા હતા.

સોલંકી કહે છે, તેમના ફોન નંબર જણાવી રહ્યા હતા કે આરોપીઓ વસ્ત્રાલથી ઓઢવની વચ્ચે ક્યાંક છે. બે ટીમો વિસ્તારના સ્કેનિંગ માટે ગઈ હતી અને રસ્તાની નજીક સંગમ હોટલ પાસે બાઈક મળ્યું જેના પર બે યુવક અને એક છોકરી બેઠી હતી. પોલીસના વ્હીકલમાં રહેલી અન્ય છોકરીએ તેમની ઓળખ કરી અને પોલીસના બે વાહનોએ તેમનો પીછો કરીને અટકાવીને ધરપકડ કરી લીધી.

from Page Array – I Am Gujarat https://ift.tt/38WWijN