ગાયક અભિજીત ભટ્ટાચાર્યના કેટલાક ગીતોના રસપ્રદ કિસ્સા

ગાયક અભિજીતે ગાયેલા હિન્દી ફિલ્મોના હજારો ગીતો હિટ રહ્યા છે. અભિજીતે અંદાજે 6000 ગીતો ગાયા છે પણ એમાં એવા ગીતો સામેલ છે જે ફિલ્મો બની નહીં કે રજૂ ના થઈ હોય. રેશમ જૈસી રાહેં, મેં ચાહતા હૂં તુઝે જેવા ઘણા ગીતો રેકોર્ડ થયા હતા પણ એ ફિલ્મો બની ન હતી. અભિજીતે એક મુલાકાતમાં કેટલાક ગીતોની રસપ્રદ વાતો જણાવી હતી. ફિલ્મ ‘તેજાબ’ (1988) નું ‘સો ગયા યે જહાં’ અભિજીતના હાથમાંથી જતું રહ્યું હતું. આ એ સમય પછીની વાત છે જ્યારે અભિજીતે દેવ આનંદની ફિલ્મ ‘આનંદ ઔર આનંદ’ (1984) માટે ‘મેં આવારા હી સહી’ ગીત ગાયું હતું પણ ફિલ્મ ફ્લોપ થઈ ચૂકી હતી.

અભિજીતના અવાજને વખાણવામાં આવ્યો હતો પરંતુ એનું નામ થયું ન હોવાથી કોઈ કામ આપવા તૈયાર ન હતું. સંગીતકાર લક્ષ્મીકાંતે અભિજીતને બોલાવીને કહ્યું હતું કે ‘સો ગયા યે જહાં’ ગીત કિશોરકુમાર પાસે ગવડાવવાનું છે પણ તારે પહેલાં ડબ કરવાનું છે. આ રીતે ડબ થયેલા ગીતો ઘણી વખત સારા ગવાયા હોય તો એ જ ગાયકના અવાજમાં રહેવા દેવામાં આવતા હતા. પરંતુ લક્ષ્મીકાંતે જે તારીખ આપી એ જ દિવસે અભિજીતે દુર્ગાપૂજા માટે કાર્યક્રમ કરવાના કામના એડવાન્સ રૂપિયા લઈ લીધા હતા. એ સમય પર અભિજીતનું નામ ના હોવા છતાં એની મોટાપાયે જાહેરાત કરી દેવામાં આવી હતી એટલે એમણે જવું પડે એમ હતું. એટલે અભિજીતે લક્ષ્મીકાંતને એમ કહેવું પડ્યું હતું કે તમે બીજા પાસે ડબ કરાવી લેજો. પછી એ ગીત બજારમાં આવ્યું ત્યારે નિતીન મુકેશના સ્વરમાં હતું. કિશોરકુમારના અવાજમાં કેમ ના આવ્યું એની અભિજીતને ખબર નથી.

અભિજીત માને છે કે નિતીને ખરેખર એ ગીતને ન્યાય આપ્યો હતો. અભિજીતે ‘અનાડી નં.1’ (1999) નું ‘મૈં લૈલા લૈલા ચિલ્લાઉંગા કુર્તા ફાડકે’ ગીત મજબૂરીમાં ગાવું પડ્યું હતું. અસલમાં આ ગીત અન્ય ગાયક પાસે ગવડાવવામાં આવ્યું હતું. પરંતુ દિલીપ સેન- સમીર સેનને મજા આવી ન હતી. અભિજીતે ગીતના શબ્દો વાંચીને એમને કહ્યું હતું કે આવું ગીત મારી પાસે ના ગવડાવો. હું ક્લાસીક ગીતો ગાવા માંગું છું. અગાઉ ‘ટન ટના ટન’ ગાઈને પસ્તાયો છું. અભિજીતે એમના આગ્રહને વશ થઈ ગાવું પડ્યું હતું. ફિલ્મ ‘રાજાબાબુ’ (1994) નું ‘અ આ ઇ ઉ ઉ ઊ, મેરા દિલ ના તોડો’ ગીત અભિજીતે શબ્દોને ધ્યાનમાં રાખીને એક રોમેન્ટિક ગીત તરીકે ગાયું હતું. ત્યારે ખબર ન હતી કે નિર્દેશક ડેવિડ ધવનના કોરિયોગ્રાફર એમાં સ્ત્રી કલાકારો પાસે ઘાઘરો ઊંચો કરાવી ડાન્સ કરાવશે. અભિજીતના ઘણા ગીતો અપેક્ષા ન હોવા છતાં લોકપ્રિય થઈ ગયા હતા.

અભિજીતે એ ગીત હીરો માટે ગાઈ રહ્યા હોવાના વહેમમાં ગાયા હતા પણ એને ફિલ્મના બીજા હીરો પર ફિલ્માવવામાં આવ્યા હતા. ‘જોશ’ (2000) નું ‘મેરે ખયાલો કી મલિકા’ ગીત અભિજીતે શાહરૂખને ધ્યાનમાં રાખીને ગાયું હતું. એને ચંદ્રચૂડસિંહ પર રાખવામાં આવ્યું હતું. ‘ફરેબ’ (2018) ના ‘યે તેરી આંખે ઝૂકી ઝૂકી’ ને પણ હીરો પર ફિલ્માવાયું ન હતું. સંગીતકાર નદીમ- શ્રવણે ઘણા વર્ષો સુધી માત્ર કુમાર સાનૂ પાસે જ ગીતો ગવડાવ્યા હતા. પણ પછી જ્યારે અભિજીત સાથે ‘જુદાઇ’ (1996) ના ‘હાં મુઝે પ્યાર હુઆ પ્યાર હુઆ અલ્લાહ-મિયાં’ ગીતથી શરૂઆત કરી ત્યાર પછી કહ્યું હતું કે પહેલાં એમના પર કુમાર સાનૂ પાસે ગવડાવવાનું દબાણ રહેતું હતું.

from chitralekha https://ift.tt/Z90Rr7e
via