શિયાળામાં ઓછા બજેટમાં ફરવું હોય તો આ છે બેસ્ટ જગ્યાઓ, મળશે ભરપૂર ડિસ્કાઉન્ટ

શિયાળામાં ક્યાં ફરવા જવાય?

ભારત આખી દુનિયામાં તેની આબોહવા માટે જાણીતુ છે. અહીં સીઝન પ્રમાણે તમે ફરવાના ડેસ્ટિનેશન નક્કી કરી શકો છો. જો તમારુ બજેટ ટાઈટ હોય હોય પણ ફરવાનો શોખ હોય તો અમે તમને શિયાળામાં એવા ફરવા લાયક સ્થળો વિષે જણાવી રહ્યા છીએ જ્યાં તમને આ સીઝનમાં ભરપૂર ડિસ્કાઉન્ટ મળશે અને પ્રવાસીઓની ભીડ પણ ઓછી નડશે. ઑફ સીઝનમાં મોટા ભાગના હિલ સ્ટેશન્સ ખાલી હોય છે. આથી તમને ત્યાંનો નજારો સરસ રીતે માણવા મળશે. જો તમે શાંત રજાઓ ગાળવા માંગતા હોવ તો આ જગ્યાઓએ શિયાળામાં ફરવાની મજા આવશે.

દાર્જિલિંગઃ

જો તમે ઠંડી સહન કરી શકતા હોવ તો ડિસેમ્બરથી માર્ચ વચ્ચે દાર્જિલિંગ ફરવા માટેની શ્રેષ્ઠ જગ્યા છે. મેથી સપ્ટેમ્બર દરમિયાન અહીં યાત્રીઓની ખાસ્સી ભીડ હોય છે. નવેમ્બર એન્ડ પછી પ્રવાસીઓનો ધસારો ઓછો ઈ જાય છે. ડિસેમ્બર પછી અહીં જશો તો હોટેલના ભાડા પણ ઘટી ગયા હશે. એ વાત યાદ રાખજો કે અહીં ઘણી રેસ્ટોરાં અને બાર શિયાળામાં બંધ થઈ જાય છે.

તવાંગઃ

તવાંગમાં શિયાળો ખરેખર માણવા જેવો છે. આ ગાળામાં અહીં બરફવર્ષા થાય છે. જો તમે નસીબદાર હશો તો તમને સસ્તા ભાવે હોટેલના રૂમ મળી જશે. અરૂણાચલ પ્રદેશમાં આવેલુ તવાંગ ખરેખર ખૂબ સુંદર છે. તેમાં ટૂરિસ્ટ એટ્રેક્શન્સ પણ ઘણા છે.

મસૂરીઃ

ઉત્તરાખંડમાં આવેલુ મસૂરી શિયાળામાં ઠંડુગાર થઈ જાય છે. ડિસેમ્બરથી ફેબ્રુઆરીની ઑફ સીઝનમાં અહીં તમને બેસ્ટ ડીલ્સ મળી રહેશે. અહીં આ સમયમાં ઘણા ઓછા ટૂરિસ્ટ્સ હોય છે. આથી તમને આ જગ્યાએ સારુ એકાંત મળી રહેશે. અહીંથી બરફાચ્છાદિત હિમાલય જોશો તો પાછા આવવાનું મન નહિ થાય.

ગંગટોકઃ

દાર્જિલિંગ કરતા અહીં ઓછી ઠંડી હોય છે. આમ છતાંય ઠંડી સહન થતી હોય તો જ ગંગટોકનો પ્લાન બનાવાય. ન્યુ યર ગંગટોકમાં સેલિબ્રેટ કરશો તો તમને કોઈપણ હોટેલ અડધા ભાવે મળી જશે. શિયાળામાં અહીં ઘણા ઓછા ટૂરિસ્ટ્સ આવે છે. આ ઉપરાંત સિક્કિમમાં બરફવર્ષાને કારણે તમે બધા જ ટૂરિસ્ટ ડેસ્ટિનેશન પર નહિ જઈ શકો. આમ છતાં પ્રકૃતિનું સૌંદર્ય માણવાની તમને જબરદસ્ત મજા આવશે.

કાશ્મીરઃ

શિયાળામાં કાશ્મીરમાં બરફવર્ષા થાય છે આથી અહીં ફરવાની ગજબ મજા આવે છે. પૃથ્વી પરના સ્વર્ગ તરીકે ઓળખાતા કાશ્મીરમાં શિયાળામાં ઘણી ઠંડી પડે છે. આ ગાળામાં હિમ વર્ષાને કારણે રસ્તા પણ બ્લોક થઈ જાય છે. આ ગાળામાં તમને હોટેલ ઘણા સારા ભાવમાં મળી જશે અને અહીંનું સૌંદર્ય માણવાની કંઈક અલગ જ મજા આવશે.

from Lifestyle Tips in Gujarati, જીવનશૈલી ટીપ્સ, Daily Lifestyle Tips – Page Array – I Am Gujarat https://ift.tt/2zTpYNP