ધોની જે બોલ્યો તે જ થયું, કુલદીપ યાદવ પણ અચંબો પામી ગયો!

ધોનીના ક્રિકેટિંગ બ્રેઈનને સલામ

ઑસ્ટ્રેલિયા સામે ધોનીએ પોતાની બેટિંગની કમાલ દેખાડીને આલોચકાના મ્હોં તો સીવી જ લીધા છે અને હવે તેણે પોતાની ક્રિકેટ અંગેની સમજનું એક જોરદાર ઉદાહરણ પણ આપ્યું છે. ન્યૂઝીલેન્ડ સામેની પ્રથમ વન-ડેમાં ફિલ્ડીંગ દરમિયાન ધોનીએ સ્પમ્પની પાછળથી એક વાત કહી અને કુલદીપે તેને ફોલો કરતા બીજા જ બોલે વિકેટ મેળવી. આ સમગ્ર કિસ્સો જાણશો તો તમને પણ ધોનીને સલામ કરવાની ઈચ્છા થઈ જશે.

ધોનીએ કુલદીપને આપી આવી સલાહ

અસલમાં ન્યૂઝીલેન્ડની બેટિંગ ચાલી રહી હતી અને સ્કોર હતો નવ વિકેટે 157 રન. છેલ્લી જોડી ક્રિઝ પર હતી. સ્ટ્રાઈક પર કીવી ટીમના છેલ્લા બેટ્સમેન તરીકે ટ્રેન્ટ બોલ્ટ હતો. ભારતીય સ્પિનર કુલદીપ યાદવ બોલિંગ કરવા માટે તૈયાર હતો. તે રાઉન્ડ ધ વિકેટ બોલિંગ કરવા માગતો હતો પણ ધોનીએ તેને અટકાવતા કહ્યું કે, ‘આ બોલને ડિફેન્ડ કરશે, ઓવર ધ વિકેટ નાખ.’

…અને એ થયું જે ધોનીએ કહ્યું

કુલદીપ ધોનીનો પડ્યો બોલ ઝીલે છે અને તેને અગાઉ પણ આના સારા પરિણામ મળી ચૂક્યા છે. આ વખતે પણ તેણે કંઈ જ પૂછ્યા વિના ધોનીની સલાહને અનુસરી. બીજા જ બોલે કુલદીપને પરિણામ પણ મળ્યું. ધોનીની આગાહી પ્રમાણે બોલ્ટે બોલને ડિફેન્ડ કર્યો. કુલદીપે બોલ રૉન્ગ વન ફેંક્યો હતો જે પડીને થોડો બહાર નીકળ્યો અને બોલ્ટના બેટને અડીને સ્લિપમાં ગયો જ્યાં રોહિત શર્માએ આબાદ કેચ ઝડપી લીધો. વિકેટ પડતા ધોનીએ કુલદીપ સામે હાથ ફેલાવી ઈશારો કર્યો, જાણે તે કહી રહ્યો હોય કે, જોયું, કહ્યું હતું ને!

કુલદીપ પણ હસી પડ્યો

બાદમાં કુલદીપે પણ હસીને પોતાનું માથું પકડી લીધું હતું અને ધોની સાથે સેલિબ્રેટ કરવા લાગ્યો હતો. આ બાબતથી એ તો સ્પષ્ટ છે કે, ધોની વિકેટની પાછળ ઊભો રહી માત્ર કીપિંગ જ નથી કરતો. તે બેટ્સમેનોના મગજ પણ વાંચી લે છે. જોકે, વધારે આશ્ચર્ય પમાડનારી વાત એ છે કે, ધોની 11મા ક્રમના ખેલાડીની માનસિકતાને પણ આટલી શાનદાર રીતે જાણી શકે છે.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2sIA2Ww