IPL : કોલકાતાનો સતત બીજો વિજય, પંજાબને 28 રનથી હરાવ્યું

KKRનો સતત બીજો વિજય

IPL 2019ની છઠ્ઠી મેચમાં કોલકાતા નાઈટ રાઈડર્સે કિંગ્સ ઈલેવન પંજાબને 28 રનથી આસાનીથી પરાજય આપી લીગમાં સતત બીજો વિજય મેળવ્યો. KKRએ આપેલા 219 રનના વિશાળ ટાર્ગેટનો પીછો કરતા પંજાબની ટીમ 20 ઓવરમાં 6 વિકેટે 190 રન બનાવી શકી. પંજાબ તરફથી ડેવિડ મિલરે નોટઆઉટ 59 અને અગ્રવાલે 58 રન બનાવ્યા પણ તે ટીમને જીત અપાવી શક્યા નહી. કોલકાતા તરફથી આન્દ્રે રસેલે 2, પીયૂષ ચાવલા અને લૉકી ફર્ગ્યૂસને 1-1 વિકેટ લીધી હતી.

KKRના બેટ્સમેનોની ઝંઝાવાતી બેટિંગ

અગાઉ KKRએ રોબિન ઉથપ્પાના 67*, નિતીશ રાણાના 63 આન્દ્રે રસેલના તોફાની 48 રનની મદદથી કિંગ્સ ઈલેવન પંજાબ સામે 219 રનનો વિશાળ ટાર્ગેટ મૂક્યો હતો. ઈડન ગાર્ડન્સ ખાતે રમાઈ રહેલી આ મેચમાં KKRના બેટ્સમેનોએ છગ્ગા-ચોગ્ગાની વણઝાર લગાવી હતી. કોલકાતાએ છેલ્લી 5 ઓવરમાં 70થી વધુ રન ફટકાર્યા હતા.

રાણા-ઉથપ્પા ફિફ્ટી

શરૂઆતી વિકેટો ઝડપથી પડી ગયા બાદ રોબિન ઉથપ્પા અને નીતિશ રાણાએ એક છેડેથી ઉથપ્પા શાંતિથી સ્ટ્રાઈક રોટેટ કરતો રહ્યો જ્યારે બીજી બાજુથી રાણાએ ફટકાબાજી શરૂ કરી. રાણાએ જોતજોતામાં અર્ધસદી પૂરી કરી લીધી. તેણે 34 બોલમાં 7 છગ્ગા અને 2 ચોગ્ગાની મદદથી 63 રન બનાવ્યા. તેણે ઉથપ્પા સાથે મળી 11 ઓવરમાં 110 રનની ભાગીદારી નોંધાવી.

રસેલની વિજળીક ઈનિંગ

રાણાના આઉટ થયા બાદ આન્દ્રે રસેલ બેટિંગમાં આવ્યો હતો. તે જ્યારે 4 રને હતો ત્યારે તેને શમીએ બોલ્ડ કર્યો હતો. જોકે, આ નો-બોલ અપાયો હતો જેનો ભરપૂર લાભ આન્દ્રે રસેલે લીધો હતો. તેણે 17 બોલમાં 3 ચોગ્ગા અને 5 છગ્ગાની મદદથી 48 રન બનાવ્યા હતા. બીજી બાજુ રોબિન ઉથપ્પાએ એક છેડો સાચવી રાખી છેક સુધી બેટિંગ કરી હતી અને અણનમ 67 રન બનાવ્યા હતા. તેની આ ઈનિંગના સહારે કોલકાતાએ 218 રનનો સ્કોર બનાવ્યો હતો.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat https://ift.tt/2Yyp44T