બ્લેકસ્ટોન 46 કરોડ ડોલરમાં એસ્સેલ પ્રોપેક ખરીદશે

69002731

મુંબઈ:પ્રાઇવેટ ઇક્વિટી કંપની બ્લેકસ્ટોન મુંબઈમાં હેડક્વાર્ટર ધરાવતી એસ્સેલ પ્રોપેક લિ (ઇપીએલ)ને ₹3,200 કરોડ (46 કરોડ ડોલર)ના સોદામાં ખરીદશે. એસ્સેલ પ્રોપેક એ સ્પેશિયાલિટી પેકેજિંગ કંપની અને વિશ્વની સૌથી મોટી લેમિનેટેડ ટ્યૂબ ઉત્પાદક છે.

બ્લેકસ્ટોન અશોક ગોયલ ટ્રસ્ટ પાસેથી 51 ટકા શેરહોલ્ડિંગ ખરીદવા ₹134 પ્રતિ શેરનો ભાવ ચૂકવશે. અશોક ગોયલ ટ્રસ્ટ આ કંપનીનું સ્થાપક પ્રમોટર છે. આ માટે સોમવારે કરાર થયા હતા. ગોયલ છ ટકા હિસ્સો પોતાની પાસે રાખશે અને એડ્વાઇઝર તરીકે જારી રહેશે. અશોક ગોયલ ટ્રસ્ટ અને તેના સહયોગીઓ એસ્સેલ પ્રોપેકમાં હાલમાં 57ટકા હિસ્સો ધરાવે છે. ઇટીએ સોમવારની આ જાહેરાત અગાઉ ઓનલાઇન ન્યૂઝ આપી દીધા હતા.

આ ટ્રાન્ઝેક્શનના કારણે કંપનીમાં ₹139.19 પ્રતિ શેરના ભાવે વધુ 26 ટકા હિસ્સા માટે ફરજિયાત ઓપન ઓફર શરૂ થશે. ઓપન ઓફરના સબસ્ક્રિપ્શનના આધારે
ખરીદી ₹2,157કરોડથી ₹3,111 કરોડ વચ્ચે રહેશે તેમ કંપનીએ રિલીઝમાં જણાવ્યું હતું.

એસ્સેલ પ્રોપેકના મેનેજમેન્ટમાં કોઈ ફેરફાર નહીં થાય. એસ્સેલ પ્રોપેકનો શેર સોમવારે બીએસઇ પર 1.2 ટકા વધીને ₹133 બંધ આવ્યો હતો અને તેની બજારમૂડી ₹4,181 કરોડ હતી. નાણાકીય વર્ષ 2018માં તેણે ₹2,424 કરોડનું વેચાણ નોંધાવ્યું હતું જ્યારે તેનો નફો ₹172 કરોડનો હતો. માર્ચ 2018ના અંતે તેનું દેવું ₹734 કરોડનું હતું. ડિસેમ્બર 2018માં પૂરા થયેલા 12 મહિનામાં તેની આવક ₹2,642 કરોડ હતી જે એક વર્ષ અગાઉના સમયગાળાની સરખામણીમાં 10 ટકા વધી હતી.

બ્લેકસ્ટોને આ એસેટના બિડિંગમાં ફ્રેન્ચ પેકેજિંગ કંપની એલ્બિયા અને ઇન્ડોરામાને પછાડીને આ સોદો કર્યો છે. ઇટીએ ચોથી ફેબ્રુઆરીએ અહેવાલ આપ્યો હતો કે એલ્બિયા અને યુએસ પ્રાઇવેટ ઇક્વિટી ફંડ બ્લેકસ્ટોન ગ્રૂપ એસ્સેલ પ્રોપેકને હસ્તગત કરવા માટે ગંભીર વાતચીત કરી રહ્યા છે. 1982માં સ્થપાયેલી એસ્સેલ પ્રોપેકનું સંચાલન એસ્સેલ ગ્રૂપના સુભાષ ચંદ્રના ભાઈ અશોક ગોયલ સંભાળે છે. તે 10 દેશોમાં 20 ફેસિલિટી ધરાવે છે અને 3,100થી વધારે લોકો તેમાં કામ કરે છે તથા વાર્ષિક સાત અબજ ટ્યૂબ્સનું ઉત્પાદન કરે છે. તેના ક્લાયન્ટમાં અગ્રણી ઓરલ કેર, બ્યૂટી, કોસ્મેટિક્સ અને ફાર્માસ્યુટિકલ ઇન્ડસ્ટ્રીઝની કંપનીઓ જેવી કે ઓલે, લેક્યુરા, ઇમામી, ગાર્નિયર અને લોરિયલ સામેલ છે.

સિનિયર મેનેજિંગ ડિરેક્ટર અને ભારત ખાતે બ્લેકસ્ટોનના પ્રાઇવેટ ઇક્વિટી હેડ અમિત દીક્ષિતે જણાવ્યું કે, “ઇપીએલ વૈશ્વિક કસ્ટમર્સ સાથે દાયકા લાંબા સંબંધ ધરાવે છે અને પ્રોડક્ટ ઇનોવેશનમાં તેનો ઉત્તમ ટ્રેક રેકોર્ડ રહ્યો છે. ઉદ્યોગને લેમિનેટેડ ટ્યૂબ તરફ શિફ્ટ કરવાથી અને ઓરલ કેરમાં ઇપીએલની મજબૂત પોઝિશનના કારણે અમારી યોજના બ્યૂટી, કોસ્મેટિક્સ અને ફાર્માસ્યુટિકલ્સ જેવી કેટેગરીમાં વૃદ્ધિને ઉત્તેજન આપવાની છે.”બ્લેકસ્ટોન 512 અબજ ડોલરની એસેટ અંડર મેનેજમેન્ટ ધરાવે છે અને ભારતમાં તેની હાજરી મજબૂત છે.

from Page Array – I Am Gujarat http://bit.ly/2XyDrof