રાજસ્થાનને ફળ્યો નવો કેપ્ટન, મુંબઈને 5 વિકેટે પરાજય આપ્યો

સ્મિથની કેપ્ટન્સ ઈનિંગ્સ, રૉયલ્સે મુંબઈને હરાવ્યું

રહાણે સ્થાને કેપ્ટન બનેલા સ્ટિવ સ્મિથની શાનદાર બેટિંગના સહારે રાજસ્થાન રૉયલ્સે મજબૂત ગણાતી મુંબઈ ઈન્ડિયન્સને IPL12 36મી મેચમાં 5 વિકેટે પરાજય આપ્યો. મુંબઈએ આપેલા 162 રનના ટાર્ગેટને રાજસ્થાને 19.1 ઓવરમાં 5 વિકેટ ગુમાવી પાર કરી લીધો. રૉયલ્સ માટે કેપ્ટન સ્મિથે અણનમ 59 જ્યારે રિયાન પરાગે 43 રનની ઈનિંગ્સ રમી. આ રાજસ્થાનનો આ સીઝને ત્રીજો વિજય છે. આ સીઝનમાં પ્રથમવાર અજિંક્ય રહાણેને સ્થાને સ્ટિવ સ્મિથને કેપ્ટનશિપ સોંપાઈ જે રૉયલ્સને ફળી.

સ્મિથ-પરાગની વિજયી ભાગાદારી

162 રનના ટાર્ગેટનો પીછો કરતા રાજસ્થાનની ટીમ શરૂઆત સારી રહી હતી. અજિંક્ય રહાણે(12) અને સંજુ સેમસન (35) વચ્ચે 39 રનની ઓપનિંગ ભાદીદારી નોંધાઈ હતી. બાદમાં સેમસન અને કેપ્ટન સ્ટિવ સ્મિથ (59) વચ્ચે પણ એક સારી પાર્ટનરશિપ થતી દેખાતી હતી પણ રાહુલ ચહરે એક જ ઓવરમાં પહેલા સેમસન અને બાદ બેન સ્ટોક્સ (0)ની વિકેટ ઝડપી રાજસ્થાનના મુશ્કેલીમાં લાવી દીધું હતું. જોકે બાદમાં સ્મિથ અને રિયાન પરાગ(43)એ મળીને ટીમને 70 રનની મહત્વપૂર્ણ ભાગીદારી નોંધાવી જીત તરફ આગળ વધારી હતી. 147 રનના સ્કોરે પરાગ આઉટ થયો હતો પણ સ્મિથે છેક સુધી ઊભા રહી ટીમને જીત અપાવી હતી.

ડી કૉકના 65, મુંબઈએ બનાવ્યા 161 રન

અગાઉ રાજસ્થાન રૉયલ્સે ટૉસ જીતી મુંબઈને બેટિંગ માટે આમંત્રણ આપ્યું હતું. કેપ્ટન રોહિત શર્મા(5) ફરી એકવાર નિષ્ફળ રહ્યો હતો. ક્વિન્ટન ડી કૉકે ફોર્મ જાળવી રાખ્યું હતું અને 47 બોલમાં છ ચોગ્ગા અને 2 છગ્ગા સાથે 65 રનની ઈનિંગ્સ રમી હતી. તેણે સૂર્યકુમાર યાદવ (34) સાથે 97 રનની ભાગીદારી નોંધાવી હતી, બાદમાં બંને ત્રણ રનના ગાળામાં આઉટ થઈ ગયા હતા. છેલ્લી ઓવરોમાં હાર્દિકના ઉપયોગી 23 રનની મદદથી મુંબઈએ 20 ઓવરના અંતે 5 વિકેટે 161 રનનો સ્કોર બનાવ્યો હતો.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2USmPLy