ધોનીએ ફટકારી IPL12ની સૌથી લાંબી સિક્સર, મેદાનની બહાર જઈને પડ્યો બોલ

ધોનીનો 111 મીટર લાંબો છગ્ગો

રવિવારે ચેન્નઈ સુપર કિંગ્સ અને રૉયલ ચેલેન્જર્સ બેંગ્લોર વચ્ચે રમાયેલી મેચમાં મહેન્દ્ર સિંહ ધોનીએ આ IPL સિઝનનો સૌથી લાંબો છગ્ગા ફટકાર્યો. ધોનીએ મેચની 20મી ઓવરમાં 111 મીટર લાંબી સિક્સર ફટકારી. જોકે, IPL12માં ધોની 112 મીટર લાંબી સિક્સ ફટકારી ચૂક્યો છે. આ સિઝનની વાત કરીએ તો આ પહેલા હાર્દિક પંડ્યાએ સૌથી લાંબી સિક્સ ફટકારી હતી જે 104 મીટર લાંબી હતી.

સિક્સર્સની બેવડી સદી પૂરી કરી

RCB વિરુદ્ધ મેચમાં છેલ્લી ઓવરમાં CSKને જીત માટે 26 રનની જરૂર હતી. મહેન્દ્ર સિંહ ધોની સ્ટ્રાઈક પર હતો અને ઉમેશ યાદવ બોલિંગ કરી રહ્યો હતો. પહેલા જ બોલ પર ધોનીએ ચોગ્ગો ફટકાર્યો. બાદમાં તેણે ઉમેશ યાદવના શોર્ટ બોલ પર છગ્ગો લગાવ્યો. ધોનીની ધમાકેદાર બેટિંગની મદદથી CSK જીતની એકદમ નજીક પહોંચીને એક રનથી હારી ગઈ. આ મેચમાં ધોનીએ સાત છગ્ગા અને પાંચ ચોગ્ગાની મદદથી 84 રન બનાવ્યા અને તેણે સિક્સરની ડબલ સેન્ચુરી પૂરી કરી લીધી. ધોની IPLમાં અત્યાર સુધી 203 છગ્ગા લગાવી ચૂક્યો છે.

લિન અને ગેઈલ પણ છે આ યાદીમાં

આ સિઝનમાં સૌથી લાંબો છગ્ગો ત્રીજા સ્થાને KKRનો ક્રિસ લિન છે, જેણે 102 મીટર લાંબો છગ્ગો ફટકાર્યો હતો. બાદમાં ચોથા સ્થાને KXIPનો ક્રિસ ગેઈલ છે જેણે 101 મીટર લાંબી સિક્સ ફટકારી હતી.

IPL ઈતિહાસની સૌથી લાંબી સિક્સ ગેઈલના નામે

જો IPLના અત્યાર સુધીના ઈતિહાસની વાત કરીએ તો સૌથી લાંબી સિક્સ ક્રિસ ગેઈલે જ ફટકારી છે. 2013માં તેણે રૉયલ ચેલેન્જર્સ બેંગ્લોર તરફથી રમતા 119 મીટર લાંબી સિક્સ ફટકારી હતી. આ રેકોર્ડ હજુ સુધી કોઈ બેટ્સમેન તોડી શક્યો નથી. બાદમાં 2016ની સિઝનમાં બેન કટિંગે બોલને 117 મીટર દૂર ફેંકી દીધો હતો.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2IM8qce